等咗咁耐，星期五終於率先體驗咗 迪士尼黑色世界2012 ，黑色世界始終都係我最愛嘅活動！不過我晚上七點半先落堂，響學校趕到過去，都已經係九點鐘，得返兩個鐘玩。就算我嗰日有拎到相機去，但係都因為要爭取時間玩，所以冇影到相... 冇相睇，唔好意思！唯有9月29日第二晚試玩夜嘅時候早啲入去，影返多啲相啦！唉，又要等兩個禮拜...
嗰晚其實發生咗件趣事：當我響 迪士尼站 出閘之後，就好心急咁衝去樂園啦！突然，有人響我身旁出現喎！佢走埋黎問我係唔係Thomas... 但係我明明唔識佢架喎... 原來係一位睇開呢個Blog嘅網友黎嘅。( 我唔講係邊個啦，不過佢應該都會響呢篇文章回覆 XD ) 佢話因為見到我背囊上嘅 迷你Duffy，所以估到我係Thomas；估唔到咁易就相認！我地兩個本身都係諗住一個人入去玩嘅，不過既然相認，就一齊去玩啦！
入場嘅時候，演藝人員派發咗一張 黑色世界活動指南，入面講哂今年活動有咩玩。一面封面係活動標誌，另一面封面就用咗 幻想世界派糖大召集 嘅圖，兩面都好靚！
入面仲有關於 黑色聯盟戰 手機應用程式嘅介紹，9月20號有得玩，到時下載落黎睇下點玩先！
活動指南內亦附送 怪誕復活狗 鎖匙扣換領卷，去UA戲院買兩張IMAX電影戲票就可以獲得。怪誕復活狗 將會響10月18日上映，我應該都會去睇，因為 添布頓 導演啲戲我都幾鍾意嘅。
入場後行到去資料索取處嗰到拎樂園指南同埋時間表，竟然發現兩份印刷品都換咗封面！配合 迪士尼黑色世界 活動，新一期樂園指南經已推出，封面都係由 米奇 做主角。
樂園指南換封面就冇咩出奇，但響樂園時間表響一個禮拜內換另一個封面就奇怪啦！明明9月12號入嘅時候都仲係 米奇 做封面，點解呢晚會變咗做 高飛 架呢？返屋企睇返，原來係因為兩間鬼屋嘅開放時間延遲咗半小時，所以要響樂園時間表更新返。
我地入到去嘅時候，剛剛放緊煙花；我地睇咗唔係太耐，之後就去資訊亭睇下鬼屋要等幾耐。點知，黑色馬戲班 要排105分鐘，而 詭墳學院 亦要排45分鐘！仲諗坐咁晏入去會少啲啲人添...
因為大街實在有太多人響到睇緊煙花，所以我地走咗入 明日世界，去玩 驚心動魄太空山。無論係外面佈置定係內容，咁多年黎都係冇咩大分別，但係我都幾鍾意嘅。原來今次係呢位網友第一次玩驚心版！佢玩完之後都係有一個同感，就係啲鬼影冇料到，哈哈！
新活動開始 ( 其實未正式開始 )，亦意味著，有新貼紙出場！所以我地之後就周圍行去拎貼紙啦！我覺得有啲可惜嘅係，今次貼紙用返四方設計，而唔係用之前嘅特別圖案，有點兒美中不足。撇開用返四方型呢樣野，今次貼紙啲圖畫都幾靚！暫時有五款，不過我地嗰晚只係拎到四款。除咗普通版貼紙之外，每年黑色世界亦會推出幾種不同嘅特別版貼紙，下次入園時又要尋下寶啦！
去到 幻想世界，響搵貼紙嘅時候，派糖大召集 仲未完，既然經過，又去拎下糖先！除咗一如以往嘅綿花糖之外，今年仲有Skittles贊助，有得派彩虹糖！唔知大家鍾唔鍾意呢？我都鍾意彩虹糖嘅，不過就對上年派過嘅Dole果乾更有興趣，又好味又健康！上年食過一次後就愛上咗！呢一年黎我不斷咁搵，但係都買唔到；知道今年有得派時特別興奮！呢一次就拎唔到，未有機會再試食，但係我下一次入去嘅時候會再接再厲！
好啦，搞完一大輪之後，我地終於都去玩鬼屋啦！因為等候時間短啲，所以我地選擇 詭墳學院。大約係10:30去排隊，排咗30分鐘，有人一齊一路排隊一路傾計，就冇咁悶！鬼屋入面嘅內容請恕我未能透露，因為要自己體驗先好玩嘛！講哂出黎就唔好玩架啦！我只可以講，相比 大街詭異酒店，我更愛 詭墳學院！入面嘅佈置都好細緻，亦有啲新奇嘅裝飾。唔知點解，以學校做主題嘅鬧鬼故事永遠都係特別吸引嘅！今次選用呢個主題，好正！
玩完出返黎，都已經11:15；雖然只係玩咗好短時候，不過都係時候返屋企啦！返到屋企，再發現一個小驚喜，就係我之前提及過嘅 迷離莊園 小路版樂園地圖終於都通用啦！無論係樂園指南，抑或係活動指南，都用上呢一個版本嘅樂園地圖，感覺上清楚好多！
我真係玩得未夠喉啊，希望呢兩個星期快啲過去，俾我再次入園挑戰 迪士屁黑色世界2012 啦！咁呢兩個星期，呢個Blog有咩搞作？首先，當然就要繼續分享返之前嘅生日迪士尼之旅啦！之後亦會繼續留意住 迪士尼黑色世界2012 嘅最新動態！( 特別係 黑色聯盟戰 應用程式 ) 最後，奇幻小故事 呢個新分類終於都可以大派用場，因為我正在構思一個長篇故事！正正就係用黑色世界做主題，我將會用園方現時公佈咗嘅背景資料，再加入我嘅想像力；創作出一個獨一無二嘅詭魅故事！希望大家睇完之後會鍾意啦！敬請期待！:)
沒有留言:
張貼留言