我突然發現原來我上次出嗰篇關於花園嘅文章係錯架，因為錯咗次序... 應該出咗呢篇先... 不過唔緊要啦，都唔一定要跟次序嘅... 還掂而家都已經響酒店同埋 Duffy 遊園之間跳黎跳去...
穿過大門，就黎到好華麗嘅酒店大堂。( 嗰日其實都幾多人響大堂到，以下張相係晚上先影嘅。）
咁，黎到酒店，第一件要做嘅事係咩呢？當然就係登記入住啦！於是我地就行埋去櫃檯到啦！響辦理登記入住手續嘅時候，我都不忘留意一下周圍嘅佈置，後面牆上嘅圖畫好靚；明日世界 嗰啲海報嘅畫風同呢幅差唔多，我特別鐘意呢種咁有時尚感嘅畫！
登記完就攞到房卡，係用咗 灰熊山谷 做設計架！離開嘅時候更加可以拎走黎做紀念品！
拎完房卡，我地就搭升降機上樓，升降機更加有 米奇、米妮 做配音，話俾你知去到邊一層。到達我地嘅樓層，一出升降機就見到掛住咗張電影海報，係 101斑點狗 嘅海報黎架！
沿著走廊行，尋找我地間房，估唔到條走廊都幾長！響外面睇，都唔覺得呢間酒店特別大。
我地間房係7708號，係呢一間啦！緊張地插入房卡，期待可以睇下 迪士尼酒店 嘅房間係點樣嘅！
入到去，可以見到整間房間都散發溫暖嘅陽光；而最搶眼嘅，就莫過於正中間嘅 米奇 米妮 銅板。
因為我地揀嘅係 迪士尼樂園景觀客房，由窗口望出去，可以隱約見到 反斗奇兵大本營 遊樂設施。再望過啲，就係 香港迪士尼樂園酒店，背景更加係港島嘅高樓大廈，可以話係現實同夢幻嘅結合！
黎到呢間咁精緻嘅房間，Duffy 都即刻走上床嘆下！個枕頭軟棉棉，睇黎佢覺得好舒服喎！
響房間入面睇風景睇咗一陣，突然有人敲門喎！原來係一位房間服務員。應該係剛才登記入住嘅時候知道我生日，所以特別通知服務員，為我送上一份好有心思嘅禮物！有一張生日卡，同埋一個用毛巾砌成嘅生日蛋糕！好得意啊！收到呢份禮物我好開心啊！
其實響登記嘅時候都已經收到各種不同嘅禮物，有貼紙、襟章、生日卡等等，我全部都好鍾意！
繼續睇下房間入面嘅擺設先！檯面上有一本服務指南，入面仲有好多好靚嘅 灰熊山谷 信紙！
當然唔少得嘅就係房間掛牌，兩面分別係 請勿打擾 同埋 請打掃房間，同時亦用上日與夜做設計。
房間內亦有一個小水吧，放滿咖啡包、茶包，仲有印上 迪士尼好萊塢酒店 標誌嘅紙巾。
之後轉移到浴室入面繼續參觀！有各種梳洗用品，不過我覺得最有趣嘅係 米奇 頭型沐浴露樽！
呢個杯應該係俾我地刷牙嘅時候用，不過咁靚，我又點捨得用呢？所以我就拎咗返屋企。拎到返去先知，原來唔係一個杯黎，裡面仲有兩個細杯，杯上嘅圖案亦都唔同架！
房間亦備有拖鞋，更加特別叫你拎返屋企「用」；我當然都好聽話咁拎返去「收藏」啦！哈哈！
成間房都參觀得七七八八啦，等我又陪下 Duffy 訓響床上面嘆先！順便睇下電視。迪士尼酒店 當然就會有 迪士尼頻道 DisneyChannel 啦！仲咁啱響到播緊 反斗奇兵3！
另外仲有一個 Have-A-Laugh 歡笑一刻頻道，會播啲迪士尼卡通動畫短片；同埋有一個 香港迪士尼樂園頻道，就會播一啲樂園廣告同埋介紹片段。不過兩個頻道都係重複播放幾個一樣嘅節目，好快就睇哂，所以都係 迪士尼頻道 吸引啲。
睇完間房，就再落返大堂睇野啦！首先去咗睇下間商店 影星禮品店，唐老鴨 整亂咗啲菲林！0_0
呢到嘅裝飾亦特別配合返主題，用咗酒店行李車黎做設計，上面個行李箱仲有 米奇 同埋 勞蘇！
之後就去到剛剛開幕冇幾耐嘅 馬布遊戲室，裡面放滿咗各式各樣嘅遊戲機！不過要換金幣先玩得。呢到有啲好靚嘅盒仔，係用黎裝住金幣嘅。 我就冇咩興趣想玩，所以冇換金幣，廢時哂錢啦。
最後黎到 好萊塢快餐店，呢到又係放咗好多迪士尼電影海報！有經典之作，亦有近代作品。
其實唔單止得呢間快餐店有放電影海報，而係酒店通道都放滿海報，仲有我愛嘅 Pooh Pooh！
除咗海報外，酒店大堂嘅兩邊分別亦放咗 米奇 米妮 銅像；作為大明星，佢地兩個都著得好靚架！
整間酒店都有好多華麗嘅佈置，同時亦滲透出迪士尼風格。能夠有機會響到住一晚，真係好難忘！
沒有留言:
張貼留言