終於黎到9月20日啦！黑色聯盟戰 手機應用程式正式啟動！唔知大家下載咗未呢？不過今日就有少少阻滯，因為我部Android手機同埋iPod竟然都唔支援呢個應用程式... 最後要等到媽媽放工返黎先借佢部iPhone黎玩，第一時間當然就係要加入我效忠嘅殭屍黨啦！
開啟呢個應用程式之後，就會顯示動畫，同而家樂園官網嗰個一樣嘅，不過就有 黑色聯盟戰 字樣。
先唔講呢個 黑色聯盟戰 好唔好玩，只係睇到呢個咁靚畫面，就已經可以睇得出樂園所花嘅心機！
揀完陣營，就可以正式開戰！要努力拎多啲黑色力量啊！可以搵Facebook嘅朋友玩，不過暫時仲未有朋友一齊玩都唔緊要，可以隨機搵其他玩家。
搵到玩家對戰後，就會去到對戰畫面，一開頭會有一個介紹頁面，為你介紹有關人物同埋玩法。
畫面中有八個寶物，其中一個係詛咒寶物，你嘅目標就係唔好揀中。兩位玩家會輪流揀。一共會有六種對戰畫面，每個人物都會有屬於佢自己嘅畫面，不過玩法都係一樣嘅。六位人物分別係：長「戲」班主、圖書館姥姥、詭墳校長、魔咒女巫師、勾魂使者、苦頭蛇仔。
有兩個情況會蠃，其中一個當然係人地揀中詛咒寶物啦！至於另一個就係你揀中第七個潔淨寶物。
反轉過黎，假如自己揀中詛咒寶物，又或者人地揀中第七個潔淨寶物，就會輸啦。
每一次蠃都會有黑色力量增長，另外亦可以響全港不同地方以及樂園入面搜集黑色印記；部分印記除咗會加黑色力量之外，更加可以幫助你響對戰之中拎到更多黑色力量！仲有一個叫做追尋殭屍狼人，但係要響指定地點先可以玩，所以未有機會嘗試。
就以先前響樂園入面拎到嘅活動指南黎做例子啦！指南上嘅黑色印記會為你帶來5000黑色力量！除此之外，呢個印記更加可以為你響戰勝嘅時候提升至3000黑色力量！仲有額外驚嚇一刻...
收集指定數量嘅黑色力量就可以獲得獎勵！獲得20000、40000黑色力量就可以獲得手機桌布。其實我唔應該放上黎，應該鼓勵大家去玩，不過應該有好多人都已經拎夠40000黑色力量。同埋我放上黎嘅最主要原因，係想講，呢啲圖真係整得好靚！個效果好正！圖中仲要有箇中玄機！兩大陣營，一邊個背景係火，另一邊係雨水，代表著水火不容！
當去到50000黑色力量，更加有機會可以響 迪士尼黑色世界 活動日，響園內同陣營首領見面！仲要留意，假如玩玩下想轉陣營，係可以轉嘅，不過之前嘅所有戰績同埋黑色力量將會被重置。不過，假如響殭屍陣營拎夠50000黑色力量，仲已經同Angelababy見面的話，都可以考慮一下轉過去狼人族，再儲50000黑色力量，再嘗試見埋狼人戰臣！
以上張相個畫面亦有黑色力量走勢，顯示最新戰況，俾你知道邊個陣營暫時高分啲。咦！只係第一日，殭屍黨好似已經佔優勢啦喎！快啲加入我地！( 借啲叫人加入自己嗰邊，嘿嘿！)
總括黎講，呢個 黑色聯盟戰 雖然玩法唔係太吸引，好快就玩悶，不過好彩啲分都唔算難拎... 玩法方面有進步空間，但係講到概念就真係好正！能夠為自己陣營出一分力都幾得意！所以，大家記得努力啲對戰，為自己陣營拎多啲黑色力量，爭取登上最終嘅黑暗寶座！
沒有留言:
張貼留言