好啦好啦！我去完迎新營返黎啦！之前就同大家講過話想趁9月頭分享一樣野！其實係因為我有一個新構思，就係每月揀一位 迪士尼朋友 做焦點人物，順便可以更加了解佢。但係今次9月份，就唔係一位 迪士尼朋友，而係三位！因為佢地係形影不離架！趁住 勇敢傳說之幻險森林 熱潮仲未減退，今個月就揀電影入面嘅 三胞胎小王子 啦！呢三位小王子，就好搞鬼，成日周圍搗亂、整蠱人；佢地仲好為食添！不過佢地好聽姐姐 梅利達公主 嘅話架，有時候仲可以好幫得手！我覺得佢地真係好可愛啊！特別係變咗三隻小黑熊之後！( 雖然我仲未分到佢地分別係邊個 =_=)
先前加咗好多新分類，好多都係我自己好希望運用自己嘅一啲小技能，同大家分享我嘅嗜好。今次嘅每月焦點迪士尼朋友，我亦會運用我嘅整圖技能，整下一啲電腦桌面月曆。獻醜了！唔知大家覺得靚唔靚呢？如果您鍾意嘅話，可以隨便拎去用架！分別有16:9版本以及4:3版本，只要Click一Click張圖，就可以放大張圖架啦！
除咗原裝版，仲有 香港迪士尼樂園 版本！加上樂園特別日子，以及係 奇妙處處通 會員適用日子。9月份就有樂園七週年生日以及係兩晚 迪士尼黑色世界2012 優先試玩夜，已經加咗響上面！
大家會唔會特別想見到某啲 迪士尼朋友 呢？有嘅話，可以留言同我講架！不過我就已經決定咗之後幾個月會用邊位 迪士尼朋友，所以可能都要等多幾個月先會出到... 但係各位朋友都不妨估下之後幾個月會有邊幾位 迪士尼朋友，睇下到時估唔估得中！^_^
沒有留言:
張貼留言