( 又要造馬啦：而家時光倒流，呢篇文章設定為9月3日18:18發表，特別紀錄18歲生日嘅來臨！)
昨晚就同爸媽、大Duffy 去咗 迪士尼好萊塢酒店 住咗一晚，今日又響樂園入面玩得好開心！唔計買返黎嗰日的話，今次其實係 Duffy 第一次去樂園玩，我幫佢影咗好多相！( 遲啲會再分享 )在此，我要多謝酒店內、園內每一位為我送上祝福，又或者為我締造奇妙一刻嘅演藝人員！當然，亦要多謝各位祝賀我嘅朋友；因為有您地，我嘅生日先會變得更加難忘！
18歲啦，正式成為大人... 大人可以做多好多野，而今日響樂園返到屋企之後就開咗一支香檳慶祝。雖然大人係可以做好多好多野，但同時亦要面對更多嘅煩惱，我亦知道有好多難關正在等待著我... 但係，無論未來係點，路始終要繼續走落去；我同時都深信我已經比起好多人幸福得多。所以，我一定要活好每一天，向著自己嘅夢想進發，讓生命變得更有意義！
渡過十八個年頭，男孩慢慢長大；或者，佢已經唔可以再使用「男孩」呢個字眼啦... 不過，長大咗嘅男孩，內心依然保持著純真；而呢一樣亦係佢自己引以為傲嘅獨特性格。迪士尼樂園、Duffy迪士尼小熊、WinnieThePooh 等，仍舊會存在於佢嘅心裡面，永不磨滅。純真，不代表天真。純真反而係一個人響經歷眾多生活挑戰之後，依然用最美好嘅一面去看世界。人往往會響長大嘅歷程之中，忘掉自己曾經擁有過嘅純真。幸運嘅係，佢並沒有遺失自己嘅純真。或者有人會覺得佢好傻，但係佢知道，只要自己活得開心，活得充實，就已經足夠... 但願，無論係去到19年，20年，21年... 佢都可以繼續堅持著呢個信念，繼續做一個純真嘅男孩...
沒有留言:
張貼留言