好啦！迪士尼黑色世界2012 昨日終於都正式開始啦！昨日我都有入去再次親身體驗。不過響講昨日嘅野之前，要講返上次試玩先。本身諗住最遲星期二要出架啦，不過又係因為懶...
上星期六，我去咗更新做成人身份證，之後就搭巴士入樂園啦！( 我都係第一次坐巴士入去咋！) 一落車，又係一支箭咁衝去樂園正門；而我嘅9月29日黑色世界試玩日亦正式開始！
一入到去，就俾一位演藝人員哥哥叫停我，佢問我幾多歲；我答佢18歲之後，佢就話想做個調查。( 嘿嘿！我知道佢地要嗰位賓客18歲或以上先會做調查，我啱啱先過咗生日冇幾耐！) 響完咗調查之後，佢仲送咗一個杯墊同埋一啲貼紙俾我！杯墊上嘅圖片係 反斗奇兵大本營 黎架！
冇見兩個禮拜，又去睇下樂園有咩唔同先！小熊維尼歷險之旅 門口旁邊新加咗個地圖喎！呢幅咁靚嘅 百畂森林 嘅地圖，我響 東京迪士尼樂園 小熊維尼獵蜜記 見過架！
至於 迷離大宅 亦都繼續揭開佢嘅面紗，慢慢展現響大家嘅眼前。真係期待佢下年開幕！
之後去搵下啲穿上萬聖節服裝嘅 迪士尼朋友 先！睇下 米奇、米妮、奇奇、帝帝 佢地套衫幾靚！
影完佢地之後，兩間鬼屋都未夠鐘開放，所以又去搵啲野搞先！呢一日終於攞到 米奇 貼紙！
今日亦都終於拎到我超鍾意食嘅 Dole 果乾，當日食咗好多包，仲好貪心咁拎多四包返屋企食！原諒我啦！我去過好多間大型超級市場，搵咗成年，都買唔到呢種咁好味嘅果乾！>_<
鬼屋開啦！我梗係去玩咗上次冇玩到嘅 黑色馬戲班 先啦！有幸成為全日第一位賓客進入馬戲班！其實我未試過自己一個入鬼屋，仲要行最頭！後面啲人又行得比較慢，成日唔見咗，都咪話 唔驚... 第一次玩 黑色馬戲班 2012年版本嘅時候我唔係睇得太清楚，再玩多次先睇到同上年有咩分別。有一個位我真係俾佢呃到！我望住前面，諗住同上年一樣嘛，點知佢突然響我後面嚇我！上年玩過 黑色馬戲班，又已經玩埋2012版本嘅朋友應該知道我講緊邊個位架啦！;)
呢一日亦都再玩下 詭墳學院，發現同上次試玩又有啲唔同，今次玩得比較詳盡啲，幾得意。上次應該係因為已經過咗樂園關閉時間，都仲有好多人響出面等緊，所以要玩得快啲清人。之後又再玩，響學院入面再慢慢發現到更多有趣嘅佈置！所以大家有機會的話都可以玩多幾次！
開始日落，我亦都係時候變身啦！我穿上自己嘅萬聖節飾物後，去咗 明日世界 嗰塊魔鏡影相。奇妙處處通 會員只要去影一影相，影完之後就可以去會員服務中心拎禮物，詭墳學院 書帶。估唔到都幾大條，仲幾靚添！我仲順便拎埋另一份會員專享禮物，兩大魔黨嘅紋身貼紙！
換完禮物，響 美國小鎮大街 行下，見到 阿積Jack 同埋 莎莉Sally 響大街廣場同大家見面喎！
我嘅策略係響日落前要玩哂兩間鬼屋，避開夜間進場嘅賓客，如果唔係就要等多好多時間。咁兩間鬼屋都玩哂啦，又有咩可以做呢？時間充足，可以俾我慢慢睇返哂上次錯過咗嘅表演！第一個表演嘅規模比較細，不過都好精彩架！就係一班 迪士尼朋友 會響 幻想世界 跳舞！調皮嘅音樂響起，米奇 同佢班老友記就行出黎，跟隨節奏跳舞，齊齊開一個萬聖節派對！
我一聽到個音樂嘅時候，第一個反應係：嘩！個感覺咁似東京迪士尼嗰邊啲表演嘅？！連跳舞都好似，不過呢邊仲好過嗰邊，因為唔係跳得好耐，反而冇咁沈悶。有一樣野我響之前分享日本迪士尼之旅嗰陣冇特別講到嘅，係關於 迪士尼朋友 嘅街頭表演嘅；我響 東京迪士尼海洋 睇街頭表演嘅時候，就算有 Duffy 座陣，我都冇睇哂全場；因為實在係太長啦！啲舞步仲要跳黎跳去都差唔多！所以，香港迪士尼樂園 今次值得一讚！
緊接其後嘅，就係 夜光鬼魅巡遊！冇見成年，再次見面啦！巨型 Jack，為巡遊揭開序幕！就算睇咗咁多年，對我黎講，佢依然係咁有吸引力！因為嗰種詭異嘅感覺真係好正！
響大街睇完巡遊，路過又見到演藝人員響地面砌咗個 Jack，得意得黎又搞鬼！
睇完巡遊，又再去到 明日世界怪誕夜 睇下，去到嘅時候剛剛有 激光俠Laserman 嘅表演。表演完結之後，就有DJ 朱薰、迪偉 出黎同大家玩遊戲，都玩咗好幾個遊戲；最後一個遊戲係估歌仔，因為我企得比較前，台下有演藝人員見唔夠人，就問我玩唔玩；我初頭有啲猶豫，因為我聽嘅歌唔算多，所以冇咩信心，不過佢就話俾我知唔會好難，既然係咁，我就鼓起勇氣，上咗去玩啦！最後，我都估到一首歌咁大把，哈哈！安慰獎係搖搖，我雖然唔識玩，不過都留低做個記念啦！遲啲等我貼個黑色世界標誌上去先！
睇咗三個表演，係時候開餐啦！我去咗 灰熊山谷 食沙律，又叫咗杯 噴泉特飲，都幾好味。因為我平時唔飲汽水嘅，所以一直都冇試，但係嗰晚咁開心，唔理啦，即管買黎飲啦！
食完野補充完體力之後，就繼續行程啦！鬼屋玩完，表演睇得七七八八，之後主要都係影相。我由 灰熊山谷 出發，首先黎到 黑色馬戲班；馬戲班附近又有 勾魂使者 出沒！
咒怨黑森林 充斥著濃霧，鬼怪們響陰森嘅樹林出沒；不過我呢一日就冇特別行入去影相。
出到去 中央廣場，之前影相嘅時候未有燈光效果，今次有燈光啦，詭秘感即時倍增！
再次黎到 詭墳學院 嘅入口，詭墳校長 銅像嘅眼睛發出紅光，就好似想檢查呢班新學生咁...
詭墳學院 響晚上嘅等候時間都比較長，但係唔洗怕！樂園氣球師響等待區為大家帶黎歡樂！
返黎 美國小鎮大街，黑色力量經已入侵每一棟建築物，古怪嘅現象響牆上展現！
除咗黑色力量入侵小鎮之外，一眾殭屍以及狼人亦進駐大街，世紀大戰一發不可收拾。呢到亦係最後一個我要睇嘅表演；狼人叫囂，殭屍應戰，兩大陣營誓要決戰到底！我覺得呢個表演又係水準之作，無論音樂、燈光效果，又或者係舞步，我都覺得唔錯。以前嘅 群魔起舞 已經幾好睇，今次再加入對決場面，令整個表演變得更加緊張刺激！
表演完結後，殭屍們與狼人們亦繼續響街上流連，我當然要把握機會，影下佢地啦！
我特別鍾意呢兩張相，因為佢地兩個陣營通常係響大街前後各有各行，互不相干嘅；而呢兩張相就係響大街嘅中間位置影嘅，佢地偶然會有啲「交流」，哈哈！
鬼屋，Clear！表演，Clear！各個任務都順利完成，咁我都唔留咁夜啦，大約十點鐘就離開樂園。
總括黎講，今年 迪士尼黑色世界2012 俾我嘅感覺係比上年更多姿多彩，因為今年有好多新元素！兩大黑暗陣營之間嘅對決真係好有魅力！兩間鬼屋，無論新或舊，都帶俾人好多驚喜！平時黑色世界係我全年入園最密嘅日子，今年可能會仲密！XD 都係嗰句，我地樂園入面見啦！
沒有留言:
張貼留言