踏正中午12點，亦有廣播表示為海難遇難者默哀三分鐘，可惜嘅係周邊強國人依然嘈到拆天... 唉... 另外一樣比較遺憾嘅係，園方今次並未有降半旗；唔係我要求高啊，我記得曾經試過降半旗。
不過點都好，無論呢啲象徵性嘅野，做得多定少，都冇咩大分別嘅，最緊要係有心就可以了。
2012年10月3日
樂園出咗最新公佈，表示聽日嘅 星夢奇緣 煙花表演將會取消，以悼念今次事件嘅遇難者。我本身諗緊，10月4日定為全港哀悼日，繼續 迪士尼黑色世界2012 會唔會唔係咁好呢...？不過我都明白應該就唔可能延遲架啦，因為當中都涉及好多因素，唔係話延遲就延遲嘅。但係我都好欣賞今次樂園主動取消煙花表演，作為本地景點，起碼都可以擔起應有嘅良心責任。
2012年10月2日
估唔到係咁短嘅時間之內，又要為呢個Blog換上黑白標題圖片，今次更加比上次悲慘好多... 原本開開心心諗住去睇煙花，卻遇上咁嘅意外... 我昨晚去咗送機，一直都唔知發生咗咁嘅事... 返到屋企，聽到呢單新聞之後都好震驚... 心入面好唔舒服，有時候，生命真係好脆弱... 惟一可以做嘅，只可以響心裡送上祝福；希望遇難者響天上可以得到安寧，家屬亦可以得到平安。
但係，我覺得更可惜、更痛心嘅係，有部份傳媒，甚至係議員，竟然借呢件事黎抽水。我覺得咁樣嘅行為好唔尊重遇難者，亦唔見得係體恤家屬，純粹為自己搏多啲支持；唔該彈開。
今次我換黑白圖片之外，亦特別換咗幅相，避免黑色世界呢種主題同今次嘅意外掛勾。呢幅圖會持續兩日直到10月4日；雖然唔算係長時間，不過最起碼，可以表達到我呢一刻嘅心情...
2012年9月30日
大家今日入黎呢個Blog嘅時候有冇以為自己去錯Blog呢？點解咁黑暗嘅？哈哈！放心，你的確係睇緊 Tho's Dreams，只不過係黑色力量已經入侵咗呢個Blog啦！為配合 迪士尼黑色世界2012 將會響今個星期四正式開始，我亦再次換上新嘅標題圖片！
如果大家睇真啲嘅話，兩旁更加有兩大魔黨嘅標誌！( 不過使用手機瀏覽的話就未必睇到啦... ) 另外，大家之前都應該已經留意到，左手邊亦加入咗 迪士尼黑色世界2012 一欄；只要Click一Click，就可以好方便快捷咁轉到去 迪士尼黑色世界2012 主題文章頁面。黑色力量將會繼續擴張，為大家帶來更多關於黑色世界嘅文章，以及一篇原創故事，敬請期待！
沒有留言:
張貼留言