中秋節嗰晚，同親戚們做完節食完飯之後，我同爸媽行咗一陣間先返屋企，咁啱又經過誠品。好啦，睇下有咩特別野先！點知，俾我響雜誌架嗰到，搵到呢本 DisneyFan 10月號！其實我一直都知道有呢本日本官方迪士尼雜誌嘅存在，響日本仲好似都有見到添！但係我就一直都冇買返屋企睇，因為都唔識日文... 不過今次見到封面個 米奇 咁靚，終於忍唔住！
一揭開呢本雜誌，嘩，係揭頁黎！一打開，原來係一幅相片黎，係 迪士尼加洲冒險樂園 喎！呢幅相係響 反斗車王天地 Carsland 開幕嘅時候影嘅！期待下年可以親身去到玩下！
背面都係相，呢幅係響 東京迪士尼樂園 灰姑娘城堡 影嘅，我記得呢個天文現象係叫金星凌日！
日本嘅官方迪士尼雜誌，又點少得 東京迪士尼渡假區 兩個主題公園嘅最新資訊呢？今期10月份，有兩個主題公園嘅萬聖節活動資料，仲有商品圖片，有好多 Duffy 啊！>_<
雜誌內仲有一啲全版印刷嘅特別圖片，今期有 高飛、布魯托 去咗 東京迪士尼海洋 探險。
除此之外，仲有日本 迪士尼商店 嘅最新情報，又有好多商品圖，搞到我又好想擁有佢地...
一開始講到，一揭開雜誌就見到 Carsland 嘅開幕相片，亦即係呢本雜誌都會有其他地區嘅資訊。咦！點解呢幾頁啲相，咁熟口面嘅！？原來係我地主場，香港迪士尼樂園 嘅新園區 灰熊山谷 啊！
呢本雜誌唔單止多野睇，仲有小禮物送！隨書會附送兩張明信片，仲要畫得好靚架！
睇完呢本雜誌 ( 啲圖 )，我有兩項感想總結... 一：我要再一次催促自己快啲去學識日文！二：呢本野都係唔好成日買，當我見到啲商品圖嘅時候，只會令我心思思，想快啲再去過... XD
沒有留言:
張貼留言