星期一突然收到電話，於是星期二就去咗面試；完畢之後，我當然亦入咗樂園玩一陣啦，哈哈！上次就見唔到 奇奇、帝帝、高飛、布魯托，呢日入園後終於見到兩隻穿上全新聖誕裝嘅花栗鼠仔啦！
是日下午茶：草莓卷！響 大街餅店 買咗黎食，鬆軟蛋糕配上甜甜嘅士多啤梨忌廉同埋果肉，好味！
呢排成日都會去 動畫藝術教室 學畫畫，一黎自己鍾意畫畫，二黎又可以消耗時間，一舉兩得！今次畫嘅係戴上聖誕帽嘅 唐老鴨，但好似唔係畫得太靚，都係上次嗰個聖誕版 米奇 得意啲！
之前都提及過構思緊一個新類型嘅短篇故事，今次都特別響樂園為故事情節影相，好快就有得睇！響樂園入面影下相，時間好快就過去，又夠鐘睇 米奇玩具舞曲；雖然規模較細，但我都好鍾意睇。
上次就集中影表演中嘅 迪士尼朋友，今次我都有影到其他扮演各種聖誕玩具嘅演藝人員！不過 Duffy 黎到嗰陣我又忍唔住不斷影佢，佢實在太可愛啦！而 唐老鴨 嘅聖誕樹造型亦都好搞鬼！
上星期四睇完新版本嘅 大街閃雪亮燈 就令我覺得好讚嘆！呢個表演就自然成為我呢一日嘅焦點！今次企到響較前嘅位置，影 米奇 佢地嗰架雪橇花車時就清楚啲，佢地三位不斷同大家揮手呢！
開始亮燈啦！今次影到燈火效果，但我始終都係更鍾意聖誕樹嘅彩色燈光，個感覺真係超夢幻！
亮燈過後，米奇、米妮、高飛 同埋一班拎住雪花燈柱嘅演藝人員開始離開，而聖誕樹就繼續閃耀...
諗返轉頭，呢一次可能已經係我最後一次用一般賓客嘅角度黎遊園，體驗呢個奇妙國度。有人話，做咗演藝人員後，響樂園入面工作，對呢個樂園嘅感覺就會慢慢改變，唔再同以前一樣；我心裡都有擔心過，自己會唔會都感受到呢種改變呢？自己對呢個樂園嘅喜愛又會唔會減退呢？其實，成為演藝人員，同之前係唔係真係咁大分別？只要我繼續抱著純真嘅信念，就已經足夠啦...
沒有留言:
張貼留言