緊貼追蹤迪士尼主題公園推出最新 Duffy 商品!

呢排我通常都會留意一下美國方面為各個 迪士尼主題公園 Disney Parks 所推出嘅 Duffy 商品；因為好多時佢地推出嘅野 香港迪士尼樂園 都會一齊推出；我地都可以買到，所以更值得留意！不過亦唔排除香港偶然會有獨家商品，之前推出嘅 Duffy Passport 套裝 就係一個好例子。相反，東京迪士尼海洋 嘅商品我就少啲留意，因為 香港迪士尼 冇得買，得個睇字又何必呢。XD

今日就想同大家分享一下之前響 迪士尼主題公園網誌 Disney Parks Blog 睇到嘅 Duffy 商品資料！佢地不時都會發表一啲最新嘅商品推出消息同埋商品預告，去睇下就可以知道未來會推出嘅商品。首先提及嘅，就係 聖誕Duffy 經已推出，香港呢邊都可以買到！大家可以帶佢返屋企一齊過聖誕！

之後，佢地都講到 瘋帽子服飾、小飛俠服飾 會響12月推出，我之前都有寫過文章同大家分享。香港迪士尼 今個月就率先推出咗 瘋帽子服飾，唔知下個月會唔會出埋 小飛俠服飾呢？好期待啊！除此之外，美國方面亦已經推出一套新嘅 Duffy 冬日服飾，包括一件藍色毛衣同埋一頂藍色帽；香港呢邊又會唔會推出呢？設計得幾樸素，Duffy 著起上黎都幾好睇，仲可以幫佢保下暖添！

而最後一樣講嘅，就係一套睡衣，配件都幾多架！有上衣、褲、帽、拖鞋、枕頭，一共五件。整件服飾上面都可以搵到好多圖案：上衣同埋褲就有 米奇、Duffy 圖案，而拖鞋上就有船錨。而值得講嘅係，枕頭上嘅雀仔係來自 東京迪士尼海洋 嘅 TippyBlue；( 原來呢個係佢個名 0_0) 佢平時響 My Friend Duffy 表演中演出，而今次就係首次響其他 迪士尼主題公園 嘅產品上出現！美國兩個 迪士尼渡假區 會響11月23日推出睡衣套裝；睇落都唔錯，如果香港都出嘅話我一定買！

咁即係未來都有機會響 香港迪士尼樂園 見到三套新服飾，但真係唔知香港方面會唔會全部都推出...  希望園方會推出啦，特別都留意到佢地開始積極推廣 Duffy 商品，出多啲新服飾就大家都開心啦！