園方響 迪士尼雪亮聖誕2012 活動期間再次推出全新聖誕主題個人化名牌，上面仲有一個小徽章！我特別鍾意呢個名牌上面嘅雪花效果，有啲閃粉閃閃下，好靚啊！最後我又買咗一個俾自己...
昨晚響樂園返到屋企，我就只係好簡單咁只係講咗一句好簡短嘅句子：我有新名牌！但呢句句子其實係有深層次意義，特別係呢篇文章突然又歸納為 夢想飛翔 分類，唔係好古怪咩？哈哈，大家將各個疑點串聯起黎之後，相信都已經知道發生緊咩事，明白我講緊啲咩。
上一篇文章我有提及到，我設定咗時間響11月20日上午11:00發表，因為嗰一刻我做緊一件事... 呢件事對我黎講真係好重要，我一定要好好把握！冇錯，我去咗 香港迪士尼樂園渡假區 面試！先前都分享過好多次，成為演藝人員係我一直以黎嘅夢想，亦有講過夢想對我黎講有幾咁重要。遇上一次又一次嘅障礙，令我一次又一次未能成為一位演藝人員；不過我並冇輕易放棄。最後，我終於獲得一個實現夢想嘅機會，俾我可以響自己喜歡嘅地方工作，為不同賓客帶來奇妙！
一句簡單嘅「我有新名牌！」，表面上係講緊新推出嘅個人化名牌，但只不過係掩飾黎嘅啫... 買過好幾個名牌，我都只係響屋企收埋佢地；而今次，我可以將一個屬於自己嘅名牌掛上身啦！面試完畢後，當知道自己可以真正成為一位 香港迪士尼樂園 嘅演藝人員，我真係好開心好感動！同時又有啲錯愕；做慣賓客，俾人稱呼做同事真係有啲唔慣，我而家有啲驚自己人格分裂！0_0 不過凡事都總有第一次，可能我當時太激動，未係好相信眼前嘅事實；相信之後會慢慢習慣。
Duffy，the Bear of Happiness and Luck，係一隻會帶來歡欣、幸運嘅 迪士尼小熊；響我生命當中，Duffy 就好似真係為我帶來歡欣、幸運，陪伴住我，一齊渡過好多不平凡嘅日子。咁樣講好似好荒謬，但其實只係視乎自己嘅信念，而呢個就係我同 Duffy 之間一個純真嘅信念。我以後亦會抱著呢個信念，做好自己；當然亦會抱著呢個信念，做好演藝人員呢個角色！
呢一刻我亦要多謝各位睇開Tho's Dreams嘅網友，大家都好關心我，為我送上好多勉勵同埋祝福！上幾次都講過一個幻想嘅情境：假如大家見到名牌上寫住Thomas嘅演藝人員，可以估下係唔係我；今次終於都可以成真啦！得閒行過商店或商品車嘅話，不妨留意有冇一個叫Thomas嘅物體！嘿嘿！
沒有留言:
張貼留言