唔好意思，本身諗住星期五出嘅呢篇關於 雪亮聖誕2012 首日嘅體驗文章，最後遲咗幾日先至出... 但係要請鍾意 Duffy 嘅朋友再等多一日啦，因為響呢篇文章入面，Duffy 係唔會出現嘅... 我咁鍾意 Duffy，而 Duffy 又同聖誕節特別有淵源，所以佢係值得有一篇專題文章！聽日會出架啦！
響我正式開始講 迪士尼雪亮聖誕2012 之前，請容許我首先分享兩樣關於樂園嘅題外話先。第一樣係關於樂園開放安排嘅，其實上星期四我係特別10:00就入到去嘅，諗住一開門就去玩。不過嗰日就俾我發現同以前有少少唔同咗喎，以前響樂園開放前半小時就開始會俾賓客入園；賓客可以響 美國小鎮大街 行下，去到開放時間就會有樂園開放典禮，之後就可以去其他園區。
當日嘅開放時間係10:00，夠鐘先至開始俾賓客入園，同時候亦取消咗以前嘅開放倒數典禮。大家可以睇下呢兩張相，10:00嗰陣響入口都係人頭湧湧，如果早咗入去就可能要同人逼一陣啦...
而第二個題外話就係：幻想世界 嘅遊樂設施 ─ 小飛象旋轉世界 開始咗粉飾啦！終於到佢啦！其實我一直都覺得樂園嘅圍板做得好好，我地成日入去玩嘅就可能會覺得有少少睇唔慣；但假如一位賓客係第一次入園嘅話，根本就唔會覺得係做緊粉飾！因為啲圍版靚得黎又好自然！
好啦！開始講返 迪士尼雪亮聖誕2012 啦！一入到樂園，最搶眼嘅必定係呢棵巨型聖誕樹！上一次入園嘅時候，聖誕樹底部就未有裝飾，今次活動正式開始，出現咗一個個禮物盒佈置！
大街廣場 都有佈置架，響亭內就出現咗巨型聖誕佈置，分別有 米奇 同埋 米妮 嘅頭型造型飾物。
大街上嘅建築物都已經掛上林林種種嘅佈置，而燈柱上亦掛有 米奇、米妮 頭型造型掛飾。
大街兩旁嘅大樹上都唔例外，同樣掛有聖誕飾物；樹上更加有 米奇、米妮 雪人造型掛飾！
呢兩年 迪士尼雪亮聖誕 活動都只係限定響 美國小鎮大街 進行，其他園區都冇特別表演或佈置。去到 睡公主城堡 前，都仲可以見到掛咗一啲小型裝飾；但係去到 幻想世界，就同平日冇咩分別。
行行下見到有位拎住一大堆氣球嘅演藝人員行過，於是我就影咗呢張相；嘩，有聖誕雪花氣球喎！
聖誕小鎮當然唔會只係得裝飾啦，仲有不同嘅人物出現，為小鎮增添更多聖誕節日氣氛！上年出現過嘅精靈們今年都有再次返黎聖誕小鎮，佢地手上係攞住一啲好得意聖誕玩具架！
今年仲有聖誕小鎮歌唱團為大家送上聖誕樂曲！響 大街閃雪亮燈 開始前，佢地都會出黎唱幾首歌！
一眾 迪士尼朋友 亦經已換上聖誕新裝，同大家見面、影相！今年嘅服飾更加製作得非常細緻！
除咗 米奇家族 嘅 迪士尼朋友 之外，以前只會響巡遊出現嘅 薑餅人，今年都出埋黎同賓客影相！
今年 迪士尼雪亮聖誕2012 更加有新面孔出現，全新人物 白雪冬鼠 正式登場！你覺得佢可愛嗎？
上次回顧前幾年嘅 迪士尼雪亮聖誕，講到以前食過一個 米奇窩夫，不過咁耐以黎只係食過一次；今次我特別去買咗個黎食，當做午餐，順便懷念一下昔日！嗯，都依然係咁好味！
之前幾次入去都冇睇到 迪士尼飛天巡遊，今次揀咗個靚位，可以同時影到巨型聖誕樹同埋花車。
我地轉移去到商店入面啦！我地黎到早前響八月先開幕嘅新商店，Victorian Collection；玻璃屋入面放有一棵金、銀、紅色小型聖誕樹，好華麗！呢棵聖誕樹亦都掛有 米奇雪人 裝飾架！ ( 其實我相信 米奇雪人 同埋 白雪冬鼠 應該係兩個人物黎，雖然有啲似樣，但其實都有好大分別... )
大街百貨店、糖果店嘅各處都有好多得意嘅佈置；當然，各款聖誕節系列商品亦經已上架！今年 米奇、米妮 套聖誕服飾咁靚，搞到我都有興趣買返隻 米奇 留念，遲啲可能買隻鎖匙扣啦！
出返去商店外，各個櫥窗展示不同款式嘅聖誕商品，仲有 米奇家族 迪士尼朋友 嘅雕塑。
再一次見到 米奇雪人、米妮雪人！今年無論係樂園佈置抑或商品，都經常可以見到佢地嘅蹤影！
裝飾又睇完，商品又睇完，商店櫥窗都睇完，咁而家又有咩好做呢？突然俾我醒起一樣野！每次有特別活動舉行，動畫藝術教室 都會有啲特別嘅畫可以畫，於是我就去睇下今次有咩畫啦；聖誕節，梗係要幫 迪士尼朋友 們加返一頂聖誕帽啦！今次我就畫咗一幅戴咗聖誕帽嘅 米奇！
畫完畫出黎，竟然咁啱俾我撞到一位之前見過面嘅網友！真係巧合！於是我地就一齊行動啦！距離 米奇玩具舞曲 開始都仲有一段時間，所以我地就趁呢個機會去搵下 雪亮聖誕 貼紙！今次第一期貼紙一共有六款，換言之，每個主題園區都會派發一款；以下就係貼紙嘅款式。
講起貼紙就順便講埋另一樣 迪士尼收藏品 ─ 樂園指南；今年 雪亮聖誕 係由 唐老鴨 做主角。睇返兩年前嘅 雪亮聖誕 樂園指南，係 米奇 黎嘅；但原來兩款係同一系列架，背景都係糖果店！
行完全個樂園搵齊六款貼紙，我地返到去 美國小鎮大街，終於都夠鐘欣賞 米奇玩具舞曲 啦！哎呀！掛住搵貼紙，遲咗少少添，整條大街都已經企滿人；我地只好去到較後位置睇啦！今年嘅 米奇玩具舞曲 同上年冇咩分別；我今次就將焦點放響 迪士尼朋友，集中影佢地。
相比起 米奇玩具舞曲，大街閃雪亮燈 真係驚喜得多，所以我嗰晚先會急不及待即刻同大家分享！嘿嘿，我本身好期待，想快啲再睇多次今年咁精彩嘅 大街閃雪亮燈！咁唔到，聽日就有機會睇...
沒有留言:
張貼留言