又有一排冇出 樂園事物仔細尋，上次已經係分享 詭墳學院 校訓，但其實呢排真係尋唔到啲咩... 哈哈，上星期四行下行下，又咁啱俾我響 大街糖果店 發現到一樣之前留意唔到嘅物件！佢放咗響到咁耐，又冇咩理由留意唔到丫... 可能我成日俾啲商品吸引住，所以去到而家先注意到。
我相信呢個小屋模型都有佢本身嘅歷史或者特別嘅存在意義，如果唔係佢都唔會被放響到啦！但我真係唔太清楚佢背後嘅故事，所以惟有用純粹觀賞角度去睇下呢間小屋入面嘅野啦！
首先我地睇下客廳，牆上掛咗 米奇家族 迪士尼朋友 嘅相片，實物都整得幾細幾精緻，好得意。
另一旁就有茶几，茶几上面有一個茶煲，好似曾相識喎！原來係來自 美女與野獸 嘅 茶煲太太！
響佢嘅背後，就有 睡公主城堡 畫作，睡公主、灰姑娘 擺設；睇真啲，仲有 美女與野獸 嘅玫瑰！
咦！究竟係邊個咁冇手尾！睇完 木偶奇遇記、小飛俠 呢啲故事書之後，就咁扔響地下！
返返去小屋入口嘅位置，門口旁邊有一個專係掛帽嘅地方，你認唔認得出呢啲帽係屬於邊個嘅呢？
樓梯上有 獅子王 小辛巴 坐咗響到！但係... 獅子可以用黎做寵物？呢間小屋嘅主人真係夠膽識！
至於廚房入面就有啲 101斑點狗 嘅狗仔；不過，留意下狗糧碗，呢間屋好似唔只得呢幾隻狗仔喎！( 左邊嗰個比較朦糊，其實係寫住 Pluto，而右邊就係寫住來自 小姐與流氓 嘅 Lady。)
上到去睡房，有我鍾意嘅 Winnie the Pooh，好可愛啊！佢旁邊當然唔少得佢最愛嘅蜜糖啦！
我嗰日冇用到太多時間欣賞，如果你都覺得呢間屋好興緻嘅話，都可以去 大街糖果店 睇下；相信仲有更多嘅 迪士尼朋友 等緊你去發掘，話唔定你甚至會發現到自己喜愛嘅 迪士尼朋友！
沒有留言:
張貼留言