響好耐之前，我就同大家分享過我用電腦遊戲創作咗 香港迪士尼樂園 入面嘅 沖天搖控車。事隔接近一年，隨住 灰熊山谷 開幕，我就特別以 灰熊山谷 為藍本，創作出一個全新園區！
響正式介紹呢個新園區之前，我想先講下我響遊戲入面創作嘅主題公園，Wonderland 夢幻樂園。佢係我自創嘅一個主題公園品牌，包含咗以不同主題而建成嘅主題公園，暫時我建成咗兩個。
最原先嘅就係同名主題公園 Wonderland，之後又有 Wonderland Haunted Park 夢幻詭異樂園；另外我亦計劃過 Wonderland Concept Park 夢幻故事樂園，會以比較完整嘅故事主題做主打；最後亦有諗過會有 Wonderland Aqua Park 夢幻水濺樂園，睇個名就知道係一個水上樂園啦。
而今次嘅新園區我就放咗響 Wonderland 入面，呢個主題樂園其實原先係整得比較求其；但我後來響網上知多咗關於 迪士尼幻想工程 嘅資料，所以就參考咗啲概念黎重新粉飾樂園。有機會的話再俾大家睇下 Wonderland 粉飾前後的對比啦！我自己就覺得粉飾後真係好好多！
以下呢幅圖就係 Wonderland 啦！有部份園區都仲未開始粉飾，因為我係逐個逐個園區咁更新。而呢幅圖入面見到嘅都係一啲已經粉飾完成嘅主題園區；唔知你又覺得邊樣遊樂設施最搶眼呢？
好啦，我地黎到 邊域山谷 Western Frontier 呢個園區！同 灰熊山谷 一樣都係用西部小鎮做主題。邊域山谷 嘅地標就係 邊域礦山 Frontier Mountain；佢係唔係好高呢？響整個園區都可以見到！
等我地由入口進入 邊域山谷 啦，已經可以隱約見到前面有彎彎曲曲高高低低嘅礦車路軌。
真係有好多礦車路軌喎！唔知坐上去係點嘅呢？唔好咁心急住... 最精彩嘅野梗係放響最尾架啦！
簡單介紹下 邊域山谷 裡面嘅結構啦，呢到主要分為兩部份，一邊係西部小鎮，一邊係山谷。響山谷呢邊，礦車沿住路軌走黎走去；至於賓客嘅通道，就係呢啲興建響路軌上面嘅架空橋！又考下大家先，唔知你估唔估到黑色嗰條再高啲嘅野係咩黎嘅呢？嘿嘿，一陣間開估！
架空橋仲特別設計到有一個個窿，可以俾你響橋上面見到礦車經過，係唔係好有特色呢？
而家開始同大家講下每一樣遊樂設施！響 邊域礦山 旁邊有一個小角落，嗰到有一個遊樂設施。佢叫做 邊域礦山採礦井 Frontier Mountain Mining Shaft；小心！升降台將會突然跌落礦井深處！
響呢一邊山腳有 邊域礦山炸藥儲存庫 Frontier Mountain Dynamite Storage，炸藥筒將會轉暈你！
至於響山谷嗰邊呢就有 炸彈危機 Dynamite Mania，睇佢個樣都應該知道會發生咩事啦...
響小鎮入面都有兩個遊樂設施，一個比較輕鬆啲，叫做 邊域西部秀 Frontier Show，睇下表演咁。
另一個遊樂設施就都係不斷轉到你暈，就係 牛仔轉轉圈 Cowboy Around，係繩索造型黎架！不過我諗諗下，全部都係轉下轉下好似唔係咁好，等我遲啲轉做一個啱小朋友玩嘅遊樂設施先！
又係開估時間！頭先嗰條黑色野係單軌鐵路黎嘅，Wonderland Monorail 會經個哂每一個園區。小鎮呢邊都有車站架，就係 邊域山谷單軌鐵路站 Western Frontier Monorail Station 啦！
最精彩嘅時刻到啦！因為我地即將要坐 邊域礦山採礦車 Frontier Mountain Mining Rail！呢間採用西部風格，位於 邊域礦山炸藥儲存庫 旁邊嘅建築物就係上礦車嘅地方！
上咗礦車啦！一開始會慢慢進入到礦洞裡面，出返礦洞之後就會響山谷穿插，好驚險啊！
講完遊樂設施又同大家講下其他設置先，響 邊域山谷 一個比較隱閉嘅位置有一間急救中心。點解要隱閉啲呢？其實 香港迪士尼樂園 嘅急救站都係比較隱閉，我相信係想保障返病者嘅私隱。
又再俾大家估下，究竟呢個咁有趣嘅建築物，入面有啲咩呢？今次即時開估啦，其實係洗手間黎。園區入面仲有一間快餐廳、樂園資訊亭，同埋另一個洗手間，不過我就冇影到呢幾個設施。
我同時亦希望呢個樂園營運時可以同一個真正嘅樂園相似啲，所以都整咗一啲演藝人員通道。通道會通返入後台區域，演藝人員可以好方便咁響地底去到各個園區，當然一般賓客係唔入得啦。
其中一個後台區域就係 邊域礦山 嘅背後！呢到正正就係礦車進入礦洞嘅上面，平時係睇唔到架！整個區域都俾 邊域礦山 遮蓋住，有條路俾維修人員檢查；我亦計劃緊響到加一個煙花發射區。
另外一個得意嘅位置，就係 邊域礦山採礦車 嘅緊急出口，又係用咗特別嘅方法去遮住佢。其實呢啲設置係唔會用到嘅，因為遊戲入面冇相關設定，真係純粹我想令個樂園真實啲而加上去。
剛才提及過我參考過一啲 迪士尼幻想工程 嘅概念黎粉飾呢個樂園，而家同大家講下其中一個啦。迪士尼主題公園 好在乎每個園區之間嘅分隔，儘量做到響一個園區入面唔會見到另一園區嘅野；我粉飾呢個樂園嘅時候都有用一啲樹木去做分隔，盡可能令到賓客唔會睇到旁邊園區嘅建築物。
總結 邊域山谷 入面嘅每個設施，俾一張高空圖大家睇下；你又分唔分得出每一樣設施嘅位置呢？
最後，再送上幾張晚間圖片；迪士尼樂園 啲燈光效果真係做得好好，但係遊戲入面就冇咁正啦... 因為無得揀燈光顏色，亦唔能夠仔細設計燈光嘅分佈同埋映照方式；不過我覺得都還可以嘅。
當然呢個園區就絕對比唔上 灰熊山谷 啦！畢竟每一位 迪士尼幻想工程師 都係專業架喎！現實亦都唔會好玩遊戲咁易，不過如果能夠將呢個園區搬到去現實，我都有興趣想去玩下！哈哈！
沒有留言:
張貼留言