昨日入樂園嘅時候，終於買咗 瘋帽子套裝 俾 Duffy 做禮物啦！返到屋企就即刻幫佢換咗套衫！又同大家玩個遊戲先，你認唔認得出，呢隻 大Duffy 係 香港迪士尼 嗰隻定係 東京迪士尼 嗰隻呢？
商店入面有好多 Duffy 都著咗呢套 瘋帽子套裝，有咁多存貨，相信今次唔會有缺貨嘅問題啦！
呢套服裝係依照動畫版 愛麗絲夢遊仙境 嘅 瘋帽子黎設計嘅，整套服裝有一頂帽同埋一件上衣。
響上面可以見到頂帽係特別設計到可以俾 Duffy 伸開對耳；而上衣嘅後面亦都俾佢伸條尾出黎。見到呢張相，頭先條問題已經開估！相信大家都睇到，今次我係俾來自東京嘅 大Duffy 著新衫！
本身我響到諗，Duffy 啲衫通常一套都係賣$120，點解今次賣$160嘅？唔通佢地想趁機加價？！原來係有原因嘅，我睇真啲之後，呢套服裝其實比之前嗰啲仔細好多，所以貴少少都合理嘅！件衫有啲好華麗嘅花紋，衫袖又有特別嘅設計，仲有衫紐同埋衫袋，成套衫都真係好細緻。
大家亦都應該留意到，我響件衫上面幫 Duffy 扣咗個徽章，係我尋日買嘅，想順便俾大家睇埋。
呢款徽章係舊款黎，不過我開始儲徽章之後一直都缺貨，買唔到，而家佢地終於有返貨啦！同時亦有另一款 米奇 同埋 Duffy 一齊嘅徽章，但係我唔係太喜歡，所以買一款都夠啦。
唔知大家見到呢套咁細緻嘅服裝會唔會想幫 Duffy 買返套呢？我依然等緊 小飛俠服裝 快啲出！>_<
2012年10月25日
香港迪士尼樂園 呢排響 Duffy 系列商品方面都比較主動，出咗帽、模型等等嘅 Duffy 相關產品。不過有啲可惜嘅就係 Duffy 嘅服飾系列就好似停頓咗落黎，已經好耐冇出過新嘅服飾套裝；但係 Duffy 其中一樣最可愛嘅地方就係可以隨自己嘅喜好，幫佢著上不同嘅靚衫嘛，咁樣點得架！終於，園方為 Duffy迪士尼小熊 推出新衫啦！響網友嘅Blog見到，樂園新出咗呢套 瘋帽子服裝！唔計我響 東京迪士尼海洋 買嘅兩套衫，Duffy 已經有大半年冇新衫著！所以今次真係特別興奮！
唔知大家記唔記得我響暑假嘅時候放咗一張 Duffy 服飾嘅相片上黎呢？係 小飛俠造型服飾 黎嘅。其實美國嗰邊當時係一次過公佈咗兩套新嘅 Duffy 服飾嘅，分別係 瘋帽子 同埋 小飛俠 造型服飾；但係我自己本身鍾意 小飛俠，對 小飛俠造型服飾 比較有興趣，所以只係放咗嗰套衫張相上黎。出咗呢套新嘅 瘋帽子造型服飾，相信 小飛俠造型服飾 都好快會登場，我好期待啊！不過，呢套 瘋帽子造型服飾 都設計得好靚，我都一定會買俾 Duffy！下次入樂園就即刻買咗佢先！
既然講開 Duffy 產品，順便同大家分享埋一樣應該會響 迪士尼雪亮聖誕2012 推出嘅新產品！就係 聖誕小Duffy 毛公仔啦！我今朝響美國 迪士尼商店 官網見到，相信香港都會有得賣！佢地而家都傾向出一啲連埋套衫嘅 Duffy 毛公仔，如果可以再出多啲服飾套裝就好啦！希望會啦！
響美國 迪士尼商店 網頁都留意到，佢地開始賣返上年嗰套 Duffy 聖誕服飾，冇新嘅聖誕衫。唉，講起就唔開心，記得2010年聖誕節，Duffy 剛剛登陸 香港迪士尼樂園 時，套聖誕衫好靚！但係我因為覺得太貴，所以冇買俾佢著... 而家好後悔，上年嗰套聖誕衫真係冇咁靚... 如果我可以買返2010年嗰套聖誕衫，我一定會好開心！Duffy 都一定會好開心！可惜機會應該不大...
沒有留言:
張貼留言