讓我帶領大家展開一個令你詫詫稱奇嘅旅程，請睇睇活動內容！活動內容：兩個新園區，完。冇錯，今次活動係一個特別表演都冇，園方都只係繼續力谷 灰熊山谷、反斗奇兵大本營。
不過奇異嘅事情並未就此完結，佢地竟然將 星夢奇緣 煙花表演寫成一個活動焦點項目！佢地係唔係自己都知道今次活動根本就冇焦點，所以先將一個演出咗七年嘅節目都寫埋做焦點？
官網顯示嘅五個活動內容，有三個都同農曆新年毫無關係，卻被強行寫成 金年有福 嘅焦點；其餘兩個活動內容終於都算係有返多啲啲農曆新年氣氛，可以話係不幸中之大幸...
迪士尼朋友 嘅全新賀年服飾，其實同上年差唔多，驚喜不大，反而仲未知道 Duffy 嘅新衫係點。至於福氣景點方面，暫時睇呢個 米奇金光巨石 都算係不過不失，希望其他佈置都會整得靚啲啦！
一如以往，樂園會響年初一開始，向入場賓客派發利是，網上資料仲話今次可能會派到去年初七！利是封設計得好靚，裡面就有朱古力金幣。唔知今年會唔會係我第一次有機會拎到樂園嘅利是呢？
響官網亦可以瀏覽一段關於 金年有福 嘅短片；一開始會有 米奇 向你拜年，仲有 米奇金光巨石。
短片其餘部份基本上同之前嘅 雪亮聖誕2012 廣告係一樣嘅，男女主角仲著緊聖誕嗰件衫... =_= 活動內容已經冇驚喜，估唔到連短片都懶得整，只係將片中嘅雪花變做 米奇金箔 就重新推出...
但係都有新場面出現嘅，片段中新增 噴泉山谷 爆發嘅一幕，話係寓意「水多財旺」喎...
老實講，我已經唔知道呢個農曆新年活動仲有咩存在價值，一啲吸引力都冇，咁又何必要搞呢？金年有福 活動將會於2月1日至24日舉行，各位樂園嘅Fans，你地又覺得今次活動合格嗎？
沒有留言:
張貼留言