一踏入商店，就會見到多款農曆新年商品！米奇 亦已經穿上新裝，等你買佢返去一齊過年！
每年嘅農曆新年活動，樂園都會推出各款利是封供賓客選購，今年嘅質素都算係幾好。
而我覺得最搞鬼嘅係，佢地竟然推出咗求籤套裝！係幾得意嘅，但我有啲懷疑究竟有冇人會買囉...
佢地另外仲推出咗一副巨型啤牌卡，成功令我買咗返屋企；原因只得一個，因為上面有 Duffy！
我特別搵黎 迷你水手Duffy 企響啤牌卡嘅旁邊比較一下；嘩！啲牌仲高過佢，真係好巨型啊！
啤牌上面嘅圖片，其實就係 金年有福 嘅活動圖片，一種有啲似彩色水墨畫嘅風格，效果都唔錯。估唔到 Duffy 而家響各個系列嘅樂園商品愈黎愈常見；今次佢拎住利是響到食糖蓮藕，好可愛！
假如一樣商品嘅圖案係靚嘅話，我好多時都會被成功引誘到，之後就會忍唔住買咗返去... 呢副卡嘅圖畫都設計得幾靚，抵讚！曾經買過一副係整得非常求其嘅，好彩今次算係有啲進步！
全副啤牌入面，有其中四張牌係印有 Duffy 巨型圖案！一見到 Duffy 就會令我好開心！哈哈！
響我心目中，金年有福 活動內容就一定唔合格，不過商品就俾佢過關啦！唔知大家又點睇呢？
沒有留言:
張貼留言