原先玩唔到嘅原因，係因為 Epic Mickey 係美國方面出版嘅遊戲，而我部Wii主機就係日本嘅；遊戲光碟一定要配合來自同一地區嘅Wii主機先至可以運作，所以之前買咗返黎都係玩唔到。最後，我決定買一部美國Wii主機返黎，俾我玩呢個遊戲！今次買咗部二手機，價錢會平少少。
究竟呢個 Epic Mickey 遊戲有咩特別吸引人嘅魅力，能夠令到我為咗佢而專登買部機返黎玩呢？介紹概念畫冊嗰陣都有講到，呢個遊戲入面嘅 荒廢世界 Wasteland，係用咗 迪士尼樂園 做藍本；Mickey 可以利用畫筆，將顏料或者稀釋劑填到去不同嘅物件上，去令到嗰樣物件出現或者消失。
佢地將一個 迪士尼樂園 嘅黑暗版本呈現出黎，感覺上好獨特，而有趣嘅遊戲設定亦都令我好想玩！而家終於玩到！遊戲期間仲發現 Oswald 其實係 Wasteland 嘅統治者！原來本身個故事都幾得意！
第一輯以及第二輯 Epic Mickey 我都有試玩咗一陣，兩輯都好好，但暫時覺得第二輯係好玩啲。第二輯相隔咗兩年先推出，遊戲系統、畫質方面相信都作出少少更新，所以好玩啲都係正常嘅！
第二輯最大嘅賣點，就係 Oswald 會響整個旅程伴隨 Mickey，兩位角色可以合作，做到更多動作！亦允許兩個人同時進行遊戲 ( 第一輯只允許單人遊玩 )，第二個人會控制 Oswald，幫助 Mickey。
但當然，自己一個人都可以玩；一個人玩嘅話，會繼續控制 Mickey，而 Oswald 會自動幫助你。每次響遊戲入面見到咁可愛嘅 Oswald 我都會好開心，佢緊張嘅表情反而令我覺得佢更加得意！我都好想試下控制 Oswald！嘿嘿，我叫咗我嘅好朋友遲啲黎陪我玩，咁咪可以控制 Oswald 囉！
只係啱啱開始玩，暫時冇太多關於遊戲嘅資料同大家分享；但原來呢個遊戲都唔係想像中咁易玩... 不過，只要我有時間，我都會努力過關！玩完之後再同大家講多啲關於 Epic Mickey 嘅野啦！
沒有留言:
張貼留言