![](https://blogger.googleusercontent.com/img/b/R29vZ2xl/AVvXsEgCb1Mwu1_NOAWJT8Z8GeegUBoNJ_wWIPt2a-yewOP9IuIgosHqDzgIjaUV-9MT4IZ2kPC3-sDWNH9CzhPRClRHc2pGAh16AtUwexPDhZy7L8wN3MorLnzWowAs1Gi_jsyOy2dE8Ohdl9oC/s400/01.jpg)
原先玩唔到嘅原因,係因為 Epic Mickey 係美國方面出版嘅遊戲,而我部Wii主機就係日本嘅;遊戲光碟一定要配合來自同一地區嘅Wii主機先至可以運作,所以之前買咗返黎都係玩唔到。最後,我決定買一部美國Wii主機返黎,俾我玩呢個遊戲!今次買咗部二手機,價錢會平少少。
![](https://blogger.googleusercontent.com/img/b/R29vZ2xl/AVvXsEik2VtusL1Pk0DqylWVml64w3_V7swDiEZp8FysKUoc4qNJUf2qT_2PAGl2n7hTyWFPHNNwbP0U1UqSZEO5FSK0UFAtCrN_xUddvixfFNJZH0Bkyamrtcw3LPSdBHQ5kP4ADryz7lLM8cn7/s400/02.jpg)
究竟呢個 Epic Mickey 遊戲有咩特別吸引人嘅魅力,能夠令到我為咗佢而專登買部機返黎玩呢?介紹概念畫冊嗰陣都有講到,呢個遊戲入面嘅 荒廢世界 Wasteland,係用咗 迪士尼樂園 做藍本;Mickey 可以利用畫筆,將顏料或者稀釋劑填到去不同嘅物件上,去令到嗰樣物件出現或者消失。
![](https://blogger.googleusercontent.com/img/b/R29vZ2xl/AVvXsEjQrrsuTRLHPVJUwPZ4_nw-Wk95sVd4t9Z-wOv6ge4Emarl1bD_NDeH9erS15AkmX_p5fuN1AzGHbm1PNqTTzNy4IgKLVRQPLYsx00qwh4CRzM0hZ4diq_4328CUPV4oQbze9VMmbkHoHbA/s400/03.jpg)
佢地將一個 迪士尼樂園 嘅黑暗版本呈現出黎,感覺上好獨特,而有趣嘅遊戲設定亦都令我好想玩!而家終於玩到!遊戲期間仲發現 Oswald 其實係 Wasteland 嘅統治者!原來本身個故事都幾得意!
![](https://blogger.googleusercontent.com/img/b/R29vZ2xl/AVvXsEjihdUTkoQna5u-De0h94cONwvJU5P_KRVi_wiIdyOE45IWU5ckRIfECEn6y40ObDOOCiuBE2gs5LmuwaM1z9MGjwNw2bl4cUCEXMbomBffV4kJW__BKKQU0OM505gXA_af6U5_TrKNXIAR/s400/04.jpg)
第一輯以及第二輯 Epic Mickey 我都有試玩咗一陣,兩輯都好好,但暫時覺得第二輯係好玩啲。第二輯相隔咗兩年先推出,遊戲系統、畫質方面相信都作出少少更新,所以好玩啲都係正常嘅!
![](https://blogger.googleusercontent.com/img/b/R29vZ2xl/AVvXsEg-zAOWxvwWDgiOclC7LOl1ap-b074L2xpZUQ5M8PZv6pBt_l6gVlfq9-WkVstLnRFkobvS9zEE8ngowcp92jn9BtpTJzq4QfG3lyBf7eKOaE5GxH1d61lNHcU6-GSr-JWXGLAb1T1EveiD/s400/05.jpg)
第二輯最大嘅賣點,就係 Oswald 會響整個旅程伴隨 Mickey,兩位角色可以合作,做到更多動作!亦允許兩個人同時進行遊戲 ( 第一輯只允許單人遊玩 ),第二個人會控制 Oswald,幫助 Mickey。
![](https://blogger.googleusercontent.com/img/b/R29vZ2xl/AVvXsEiE_leIDr_fmRoXdV2Sh2PUCFBL8vE_D78F9mIO-DBc5wOz0wPQGtRTpG1pRtniJgZE3CR96ysio8iXLt4OMMdLTjl6OjiOMSxzPlbcnZ3SnxSiey7_DLuHr_Q6b9Uwrd1Qr4vOdYLyHHW6/s400/06.jpg)
但當然,自己一個人都可以玩;一個人玩嘅話,會繼續控制 Mickey,而 Oswald 會自動幫助你。每次響遊戲入面見到咁可愛嘅 Oswald 我都會好開心,佢緊張嘅表情反而令我覺得佢更加得意!我都好想試下控制 Oswald!嘿嘿,我叫咗我嘅好朋友遲啲黎陪我玩,咁咪可以控制 Oswald 囉!
![](https://blogger.googleusercontent.com/img/b/R29vZ2xl/AVvXsEiLBtIhPQlos8T6Jw-62-_N53e9KgQSKieCY1hvkKHtBUwnFio6l41NGW6IDebXCiWdys3m3PS6kRzRTsh21SjEzBdDf_-BCRB0ZkIJAHTjWSNs1UlkDQYuX_zz72tnfU-m9Bb5WU-dqBUu/s400/07.jpg)
只係啱啱開始玩,暫時冇太多關於遊戲嘅資料同大家分享;但原來呢個遊戲都唔係想像中咁易玩... 不過,只要我有時間,我都會努力過關!玩完之後再同大家講多啲關於 Epic Mickey 嘅野啦!
沒有留言:
張貼留言