相信各位尋日睇新聞報導嗰陣都會覺得好驚喜！因為財政預算案竟然有提及樂園未來動向！預算案講到，香港迪士尼樂園 將會展開新一輪擴建，興建全球首個以Marvel為主題嘅園區；呢個新園區預計會於2017年落成開幕，而另一方面，樂園亦會響未來幾年內推出夜間巡遊！
其實一直對Marvel都冇咩興趣，之前知道 迪士尼公司 收購咗，心中都冇咩特別感覺... 但係聽到 香港迪士尼樂園 落實興建Marvel主題園區嗰陣，我即時係感到有啲錯愕嘅… 因為我自己真係唔太鍾意呢啲漫畫英雄，整個感覺亦同 迪士尼樂園 嘅童話國度格格不入。
不過，既然已成定局，我都主動上網睇下究竟Marvel嘅背景資料，俾自己有一個心理準備。響官方網站見到一啲Marvel嘅漫畫英雄角色，惟一比較熟悉嘅就係 蜘蛛俠 Spiderman；其餘亦有 美國隊長 Captain America、變種特工 X-Men、鐵甲奇俠 Iron-man 等等。
總係覺得同 迪士尼 一貫風格唔太合襯，始終都唔太想Marvel園區響 香港迪士尼樂園 出現；但係我都對一班 幻想工程師 有信心，相信佢地可以再次創造出一個令人讚嘆嘅主題園區！
反而我對夜間巡遊就充滿期望，上次響東京咁啱落雨，冇得睇，好想快啲可以響香港睇！都係因為同一個概念，迪士尼樂園 嘅所有事物，配合夜晚嘅燈光效果都會變得更有生命力！以下係美國 神奇王國 Magic Kingdom 所舉行嘅夜間巡遊，剩係睇相都已經覺得好夢幻！
擴建Marvel主題園區之餘亦增設夜間巡遊，知道呢個樂園將會繼續成長，真係好開心啊！希望之後會陸續有更多有關資料公佈啦！現階段，就等我地繼續期待 迷離莊園 開幕！
沒有留言:
張貼留言