安仔玩具箱 話咁快就開咗一個月啦！相信各位樂園Fans都已經響過去嘅一個月內入去睇過！未有時間入園玩？都唔緊要！今日適逢開幕一個月紀念，就等我同大家分享下我影返黎嘅相啦！好，我地而家就出發，去到 香港迪士尼樂園 入面，探訪 安仔 嘅後花園，反斗奇兵大本營！
黎到全新商店 安仔玩具箱嘅門口，發現呢到有好多玩具呢！櫥窗入面都放滿林林總總嘅玩具！
入到去巨大嘅紙皮箱入面，頭頂上面原來係一副棋盤遊戲，而牆邊就有著名拼字遊戲 Scrabble。
叫得做玩具箱，當然會有好多玩具啦！皮球、玩具電話、膠圈、骰仔、模型配件... 包羅萬有！
響店內中央位置嘅貨架，原來係由骨牌以及玩具紙幣組成！玩具紙幣上面更加印有 胡迪 嘅肖像！
假如你有睇過 反斗奇兵 電影系列的話，應該都會知道，安仔 其實係一個好有天份嘅小畫家！玩具箱開幕前，佢就響工程圍板貼咗幾幅作品作為預告，而家，部份畫作已經移咗入玩具箱裡面！咦！等等！最左邊嗰位咪係 桃莉Dolly？但係響電影中，佢並非屬於 安仔 架喎，點解會響到出現？
店內不同位置亦有由 安仔 所繪畫嘅 迪士尼朋友 畫作，當中就有 玩具士兵 以及 望遠鏡Lenny。
嘩！竟然有我非常鍾意嘅 豆豆 啊！仲有同樣係響 反斗奇兵3 電影裡面出現過嘅 八爪魚Stretch！不過同 桃莉Dolly 一樣，根據電影情節，佢地唔係 安仔 所擁有，佢地響到出現係唔係有咩秘密呢？
講完店內裝潢之後，就講下商品啦！園方為配合 安仔玩具箱 開幕，特別推出多款主題商品！而最令我注目嘅，就係呢兩款 綠色小人、彈弓狗 造型帽子！好得意呢，應該會好好賣！
店內演藝人員特別推介：勞酥 X 綠色小人 袋子！只要將個袋反一反出黎，就可以轉換圖案！
另一款我覺得幾得意嘅，就係以下呢兩個 勞酥、抱抱龍 拉鏈袋，不過比較細，唔知用黎裝咩好...
仲有適合小朋友穿著嘅 胡迪警長造型套裝！穿上呢套服飾，小男孩即時化身成西部牛仔！
新店開幕，同時亦有多款新T恤發售！我覺得今次啲T恤都唔錯，特別係 薯蛋頭 情侶裝T恤！
主題商品另外仲包括糖果盒、杯、鎖匙扣等等；我幾鍾意今次呢種畫風，簡樸得黎亦幾得意。
其實呢支原子筆都幾吸引，有一隻好可愛嘅 綠色小人 企響原子筆嘅頂端！不過我最後都冇買到...
除咗以上提及過嘅 薯蛋頭 情侶裝T恤之外，仲有 奇妙處處通 會員別注版情侶裝iPhone 5手機套！
同時，園方亦有推出三款徽章慶祝 安仔玩具箱 開幕！而其中一款更加係限量版，限量800杖！
第一次入去之前，我本身以為店內會集中售賣 反斗奇兵 商品，但原來接近一半都唔係相關產品；安仔玩具箱 亦有售賣 Marvel漫畫英雄系列商品、米奇頭型原子筆 以及 智能手機保護套 等等。
因為 反斗奇兵大本營 近期都會提早關閉，所以一直都未有機會可以影到 安仔玩具箱 嘅夜景... 上星期我睇實時間，最後終於影到夜景啦！其實天空係未黑哂嘅，但係我都怕唔可以逗留得太耐。
感覺上，安仔玩具箱 好似突然變咗做 安仔美術館，一幅幅畫作被射燈照射，變成瑰麗嘅藝術品。
加入燈光效果之後，綠色小人 同埋 薯蛋頭先生 係唔係即刻變得更加有生命力，更加可愛呢？
最後，就係 安仔玩具箱 全景！再次用咗 沖天搖控車 做背景！影呢張相嗰陣，天空終於都黑哂...
安仔玩具箱 開幕後的確多咗 反斗奇兵 相關產品推出，令電影中嘅 迪士尼朋友 有多啲機會現身；但事實上，反斗奇兵 一共推出過三套電影，仲有好多角色係未響 香港迪士尼樂園 出現過！希望，終有一日能夠響呢間全新嘅主題商店入面見到更多 反斗奇兵 迪士尼朋友 嘅主題商品！
沒有留言:
張貼留言