迪士尼「金」年有福 - 活動回顧

為期大約一個月嘅 金年有福 活動終於響2月24日正式結束啦！大家響活動期間入過去幾多次呢？呢個比較遜色嘅活動，真係唔係幾吸引到我入園玩，所以響二月上旬之後都已經冇再提及過...  但係，響活動期間都有發生過幾件趣事嘅，而家就等我一次過響呢篇文章入面同大家分享返啦！

樂園官方網頁先前都有公佈，由大年初一開始會向賓客派發利是，金光閃閃嘅利是封好靚呢！入面嗰塊朱古力金幣我到而家都仲未食，唔知好唔好味嘅呢？我遲啲先再食啦，應該未過期掛...

起初覺得活動好似只係局限於 美國小鎮大街，但原來 幻想世界 某個角落亦都充滿農曆新年氣氛！一眾 米奇家族 迪士尼朋友 亦穿著上年 迎龍接福 活動嘅農曆新年服飾，響 夢想花園 同大家見面！不過，上年影過嘅野我就廢時再排隊影多次啦；相反，我搵咗財神 高飛 影相，佢真係真搞鬼！

去到 金年有福 活動嘅最後一星期，估唔到園方竟然用咗 Duffy 做該期樂園時間表嘅封面主角！最後我又專登走入去樂園拎呢份咁可愛嘅時間表！今次係 Duffy 第三次做封面主角，好開心啊！

其實要講嘅野並唔多，已經講哂，哈哈！最後再次放幾張精選相片響到，做一個簡單嘅回顧啦！今次活動並冇特別表演項目，不過，美國小鎮大街 嘅佈置以及 迪士尼朋友 嘅服飾又真係唔錯嘅。

短短一個月嘅 金年有福 好快就結束咗，而黎緊嘅 迪士尼星級款待 同樣都係一個冇咩特別嘅活動...  嗚嗚...  究竟幾時先有得入去 迷離莊園 玩...  只盼望過埋呢兩個月之後就可以等到新園區嘅開幕...