東京迪士尼渡假區: 30週年慶典 幸福歡樂年 / 米奇和Duffy的春日巡航2013!

今日想同大家飛去日本，再次去到 東京迪士尼渡假區，睇下嗰邊兩大主題樂園嘅最新動態！4月15日將會係 東京迪士尼樂園 開幕30週年嘅日子，整個渡假區響一整年都會有大型慶祝活動！同時間，東京迪士尼海洋 上年嘅 米奇和Duffy的春日巡航 特別活動，亦會響3月率先捲土重來！

等我地先睇睇30週年慶典，為期大約一年嘅慶祝活動名為「A Happiness Year」幸福歡樂年；響過去嘅三十年間，東京迪士尼渡假區 不斷將歡樂帶俾不同嘅人，今次更加會將呢份歡樂升級！

咁究竟會有咩活動內容呢？首先，一眾 迪士尼朋友 將會換上華麗嘅黃金服飾，慶祝三十週年！呢套服飾都製作得非常細緻，加上用咗金光閃閃嘅顏色，感覺上真係充滿歡樂嘅氣息呢！

現時 東京迪士尼樂園 嘅「Jubilation!」歡騰 日間巡遊表演，係響二十五週年嗰陣開始演出嘅。黎到三十週年，全新巡遊表演「Happiness is Here」歡樂在這裡，將於4月15日登重登場！東京迪士尼樂園 嘅巡遊通常都有好多 迪士尼朋友 出現，相信呢個全新巡遊亦會保留呢個特式！

至於 東京迪士尼海洋，迪士尼朋友 亦會響海上巡遊表演之中換上三十週年服飾同大家見面；以下係 東京迪士尼海洋 10週年嗰陣嘅情境，呢個項目唔算好特別，可以話係象徵式換一換衫。

另外，兩個主題樂園共用嘅煙花表演，亦會配合三十週年慶祝活動作出更新，為賓客帶來新鮮感！其實嗰邊嘅煙花表演，規模唔算好大，今次更新應該都唔會有大改動，唔知會唔會有特別驚喜呢？

東京迪士尼渡假區 嘅商品往往都係非常吸引，睇完焦點項目，又等我地睇下三十週年主題商品！唔少得嘅，當然係穿上三十週年新裝嘅 米奇、米妮 毛公仔啦！另外亦推出咗 米奇 嗰頂黃金帽！同時亦有兩件主題T恤，都設計得好靚，而兩款T恤亦有推出迷你版，可以俾 大Duffy 熊仔穿著。

講開 Duffy，呢隻人氣爆登嘅 迪士尼小熊 亦都有屬於自己嘅三十週年服飾，同樣係金光閃閃！呢套服飾都係可以俾 大Duffy 熊仔穿著，除此之外，仲有 Duffy 小熊鎖匙扣、掛繩等商品發售。

東京迪士尼渡假區 渡過咗三十年嘅歲月，過程中必定會有好多好重要、值得紀念嘅日子；渡假區亦特別趁住三十週年，推出多個系列嘅收藏品，回味過去三十年間嘅每一個特別日子！今次推出咗三款 Vinylmation，分別係三十週年版、迪士尼樂園開幕版、迪士尼海洋開幕版！

其他收藏品亦包括 米奇 造型擺設、原子筆、迪士尼徽章、紀念杯等等，全部都設計得好靚！大家可以睇睇一整套 米奇 造型擺設，每一款都係以前各個特別週年慶典嘅造型，好有意義啊！其中，迪士尼徽章、紀念杯會於一整年間逐步推出各個款式，所以要儲齊全套都唔係咁容易架！

好，三十週年慶典 A Happiness Year 暫時睇到呢到，我地而家轉去 東京迪士尼海洋 嘅特備活動！米奇和Duffy的春日巡航 響上年春季舉行嗰陣大受歡迎，所以，呢個活動響今年將會載譽歸來！話時話丫，點解人地嘅活動捲土重來，我地呢邊嘅活動又係捲土重來，但卻一啲都唔吸引，唉... 

抹走香港呢邊嘅傷痛先，我地繼續專注響 東京迪士尼海洋 米奇和Duffy的春日巡航 活動。上年活動講到 米奇 帶住 Duffy 去世界各地旅行，佢地兩個今年更加會邀請埋 米妮、ShellieMay！響官方網頁亦有推出小型相片故事，講述佢地邀請伴侶一齊去旅行、執拾行李準備出發嘅經過。

至於活動內容方面，其實今年唔算有太大分別，主要都同上年一樣，不過好野又不妨再睇嘅！今次活動嘅三個特別表演節目同上年相同，亦即：春臨里多島、紐約復活節 以及 驚喜迎春。

Duffy 春日園藝佈置都同上年差唔多，但今次嘅佈置睇黎會再度升級，比起上年設計得更有心思！春天降臨於 東京迪士尼海洋，周圍都佈滿色彩繽紛嘅花朵，充滿一種柔和、舒適嘅感覺呢！

大家記唔記得我上年去完 米奇和Duffy的春日巡航 之後，同大家分享過一啲春日園藝佈置呢？眾多佈置之中令我我最深刻嘅，就係呢個 Duffy 花盆！響官網再次見到，真係好得意好有創意！

雖然活動內容大部份都同上年冇咩分別，不過佢地都有新搞作架！就係 Duffy巡航尋寶遊戲！上年我都有分享響 東京迪士尼樂園 玩過嘅 尋找復活蛋遊戲，其實今次只係將呢個遊戲重新包裝；因為三十週年嘅關係，今年樂園嗰邊唔會有復活節活動，所以佢地將遊戲改響 迪士尼海洋 推出。

又係時候睇下包羅萬有嘅 Duffy迪士尼小熊 商品，佢係呢個活動嘅主角，當然有好多主題商品！有部份商品係同上年一樣嘅，但都有唔少新商品登場，例如：相機袋、造型花盆、文件夾等等。再次見識到 東京迪士尼渡假區 出色嘅商品設計！見到咁多 Duffy 商品，搞到我又好想買...

要去旅行喎，又點可以冇特別裝備呢？今年就推出咗行李箱、掛袋、相機供 大Duffy 熊仔佩戴。至於今年嗰套 Duffy 春日巡航服飾，造型基本上同上年完全相同，只係有少少顏色上嘅改動。

最後為大家送上一幅 Duffy迪士尼小熊 春日圖片，背景正正就係 Duffy 基地，Cape Cod！Duffy 踩著單車，載住 ShellieMay 周圍逛逛，享受春天嘅和暖，係一個好溫馨嘅情境呢！

東京迪士尼渡假區 30週年慶典 A Happiness Year 將於2013年4月15日至2014年3月20日進行；至於 東京迪士尼海洋 米奇和Duffy的春日巡航2013 活動就會響2013年3月18日至6月30日舉行。唔知你會唔會有幸參加到呢兩項活動呢？東京嗰邊嘅活動真係好正，有機會一定要去感受一下啊！