踏入3月，香港迪士尼樂園 迪士尼星級款待 活動即將再次捲土重來！( 心裡不禁要講：唉... ) 今日園方響官網公佈咗活動資料，由活動圖片可以睇到，今年活動將會以怪獸、公主做主角！前者就好明顯係要配合返 怪獸大學 響暑假上映而作出宣傳，而公主們就係要迎合返女孩子。
星級款待 活動令整個樂園嘅奇妙體驗進一步升級，可惜今次嘅活動圖片唔係太突顯到呢個特點；感覺上好似只係將原本 怪獸公司 以及 迪士尼公主 嘅兩張圖片加入城堡背景之中，唔算太特別。
迪士尼星級款待 活動通常都冇咩焦點，今年主要都係重施故技，一如以往都有 星級禮遇套裝。不過，今年有少少新意思，附上 星級美麗解碼鏡，唔知究竟有咩玄機呢？到時就會知道！
樂園一直都只會於 黑色世界、雪亮聖誕 活動推出手機應用程式，估唔到今次連 星級款待 都有！雖然暫時唔知呢個應用程式嘅內容，應該唔會太差嘅，希望啦... 起碼都會有啲圖片睇下掛... 今年另外亦推出咗一啲全新嘅 星級體驗旅程，不過收費都比較貴，我都唔知算唔算值得，哈哈！
迪士尼星級款待 再次回帶，令我不禁要問多次：「究竟 香港迪士尼樂園 幾時先有復活節活動？」雖然我始終相信復活節活動必定比起 迪士尼星級款待 更加吸引，不過呢個活動都有佢嘅好處嘅；除咗可以遇上各種奇妙時刻之外，亦有機會可以同演藝人員玩下得意嘅小遊戲，都幾好丫！
誰是您的VIP？響3月21日至5月19日期間，帶同自己嘅VIP響園內享受 迪士尼星級款待2013 吧！或者呢個活動未必非常吸引，但呢排比較少人入場，大家都可以考慮趁住呢段時間，入園玩餐飽！;)
沒有留言:
張貼留言