迪士尼星級款待2013 正式開始後，去到星期六，我終於有時間去到樂園入面體驗呢個特別活動！嗰日我下午先出發入去，入到去都已經係黃昏... 於是，我就響傍晚展開咗一次星級遊園記！
有別於以往，響今次活動期間，入場就會即時獲得一份 星級禮遇套裝，唔需要再另外去拎。配合返活動主題，星級禮遇套裝 嘅封面都採用咗 怪獸公司 以及 迪士尼公主 嘅圖片。
套裝裡面都包含幾樣元素，第一樣就係 星級美麗解碼鏡，可以響園內對 星級至美名言 進行解碼。大家可以留意一下以下呢張相片，唔知你留唔留意到呢幅樂園地圖有啲有趣嘅事發生咗呢？
呢個套裝嘅另一項元素就係VIP感謝卡，可以用怪獸或公主貼紙，製作一張感謝卡送俾自己嘅VIP。
舉辦 迪士尼星級款待 嘅其中一個原意，係希望可以俾賓客一個機會去感謝各位演藝人員；套裝內都繼續附有 演藝人員表揚卡，大家可以送俾一啲為自己帶來奇妙嘅演藝人員，向佢地致謝！
全新樂園指南，封面再次以 怪獸公司 做主題！睇黎暫時都係怪獸嘅天下，唔知幾時輪到公主呢？
今年，園方取消咗 星級徽章，唔知係唔係想慳錢呢？其實都冇所謂啦，嗰個徽章都冇咩特別用處。至於園內裝潢，因為活動規模唔大，所以佈置亦唔算多，但係都還可以嘅。
而 星級至美名言 展示牌就佈滿整個樂園，如果想搵齊哂每一個的話，可能都需要一段時間架！今次呢個小遊戲都算係唔錯，低成本之作，算係有啲野睇下，總好過咩都冇，不過嗰個主題就...
今次連 灰熊山谷、反斗奇兵大本營 都有份架！記得要去埋呢兩個新園區搵啊！
動畫藝術廊 嘅門口都有一個 星級至美名言 展示牌喎！既然黎到，等我順便入去嘆下冷氣先！
咦咦咦！點解呢到好似同平時有啲唔同咁嘅？有啲展品消失咗，但係又有新展品出現喎！
呢個展板整得幾華麗喎，上面就顯示咗來自電影《白雪公主》、《美女與野獸》兩位公主嘅圖片。
另一邊就係《怪獸公司》電影劇照，見到呢啲相，搞到我都有啲想重溫一下呢套電影添！
再睇真啲，原來展板上面，有好大隻眼呢！呢隻眼由 怪獸公司 嗰個「M」字標誌跳咗黎呢到！
離開 動畫藝術廊，行下行下，又黎到 皇室宴會廳；咦咦咦，點解又好似有啲野唔同咗？
一道神秘嘅門出現咗！估唔到，呢到變咗做 怪獸公司 嘅臨時工場，係時候嚇餐飽啦！以上呢兩個佈置都係為收費活動而設，作為 迪士尼朋友 嘅出場場景，可惜一般賓客應該就冇份...
活動開始後，園方都推出新貼紙，現階段有六款，每個主題園區都會分別派發一款。
除此之外，仲有好多不同款式嘅 迪士尼收藏品！等我睇下之後又會唔會有機會遇到先！
準備好體驗星級款待未呢？活動期間，園內亦會出現各種奇妙時刻，大家快快入園感受奇妙吧！
沒有留言:
張貼留言