迪士尼星級款待2013 尋日已經正式開始！不過我就未有時間入園，要星期六先可以入去。其實都唔洗趕住入去，都冇咩特別野，同平日嘅樂園唔會相差好遠，等我嗰日睇下有冇驚喜啦！今年 星級款待 活動推出咗多個高收費嘅星級旅程，但係，奇妙係唔係真係要用錢先可以買得到？呢篇文章就想講返今年一月嘅一次奇妙體驗：我同一位好朋友響園內又再過咗好開心嘅一日！
呢位朋友唔係 迪士尼Fans，好耐先會去樂園玩一次，所以呢次我都盡可能同佢去玩哂所有野；響樂園入面，去玩不同嘅遊樂設施之餘，我地亦有去到各個主題園區，搵 迪士尼朋友 影相！
曾經都講過，其實我好少去搵 迪士尼朋友 影相，因為我唔太鍾意花太長時間去排隊... 但係今次有朋友一齊，可以一路排隊一路傾計，於是就去咗搵下 迪士尼朋友 影相啦！我地首先黎到 反斗奇兵大本營，見到 翠絲！影相之前，佢仲演咗一齣默劇俾我地睇，好得意！
就咁睇相可能未必覺得好特別，但置身現場，見到 迪士尼朋友 為你帶來歡笑，感覺真係好奇妙！同 翠絲 影完相，我突然有一個主意！不如買返本簽名簿，收集簽名，將一切奇妙感覺紀錄低啦！就係咁，我同我嘅朋友每人買咗一本簽名簿，另外仲買咗一支 小熊維尼造型筆，開始收集簽名！
估唔到響同一日內，我響園內做咗三樣新嘗試：第一次買簽名簿、第一次買筆、第一次收集簽名... 過去七年我都冇做過呢三樣野，竟然響一日內做齊哂！我呢個 迪士尼Fans 又再沉迷多一樣野... ( 從來唔響樂園買筆，係因為好驚一支咁靚嘅筆好快就會用完，我會好唔捨得，哈哈！)
打開簽名簿，響第一頁，有一個位置俾我寫低自己嘅名字，證明呢本簽名簿係屬於我嘅！另外亦附有 迪士尼朋友 簽名貼紙，但我唔係好明，我都準備好收集親筆簽名，呢啲貼紙有咩用？而最諷刺嘅係，有幾張 迪士尼朋友 簽名貼紙，我從未響樂園入面見過佢地會出黎同賓客見面嘅...
好啦，唔理咁多，開始收集簽名！第一位當然係我最愛嘅 迪士尼朋友，Duffy迪士尼小熊！但係因為前嗰排先影完佢，我冇特別再影多次，所以呢到用返舊相啦。至於佢嘅簽名，係一個好大嘅 Duffy 獨有掌印！仲有代表 Disney Bear 嘅「D.B.」字樣！
黎到 夢想花園，有咁多 迪士尼朋友 在場，當然要趁機會同佢地影哂相、收集哂佢地嘅簽名！響隔離嘅蜜糖小亭，有 小熊維尼 嘅好朋友，Eeyore！傻下傻下咁，好可愛！
再過啲，就係傳統中式涼亭，裡面有戴上中國帽嘅 Pluto！佢見到鏡頭，即刻坐低俾我影佢！Pluto 嘅簽名入面，「o」字變咗做一個腳印，佢仲響自己個名下面畫咗好大舊骨頭！
之後我地就搵咗 Goofy，咦，佢背向鏡頭，想做咩呢？原來係準備擺一個最有型嘅姿勢！睇下 Goofy 嘅簽名，佢加咗自己嘅名句「gawush！」喎，仲有佢嗰頂高帽添啊！
幻想世界 入面仲可以見到邊位 迪士尼朋友 呢？係喎，奇妙仙子 會響 Pixie Hollow 小花園出現嘛！嗰日都比較凍，所以佢都用樹葉整咗一件冷衫俾自己著。我好鍾意佢個簽名，好多奇妙星粉！
離開 幻想世界，黎到下一個目的地：灰熊山谷！穿上西部裝束嘅 米奇、米妮 響到同我地見面！每次當身後嘅 噴泉山谷 噴發時，佢地都會好興奮，指住嗰邊，叫大家一齊睇下！
米奇、米妮 分別幫我同我嘅朋友簽名，我係 米妮 幫我簽先嘅，之後就揭另一頁俾 米奇 簽名。我朋友就倒返轉，米奇幫佢簽先，佢本身都想揭另一頁俾 米妮，但 米妮 唔肯同 米奇 分開呢！分開兩頁，係因為想分別放一張西部裝同埋一張經典裝嘅相，而家諗返，我拆散佢地好似好衰添...
返到去 美國小鎮大街 搵著住經典裝嘅 米奇、米妮 之後，我地繼續響街上搵其他 迪士尼朋友。響 大街消防局 旁邊，有 鋼牙奇奇 同埋 大鼻帝帝！擺完姿勢之後，佢地仲衝咗埋黎！真貪玩！
過咗冇幾耐，奇奇、帝帝 返咗入後台，之後就輪到 Donald、Daisy 情侶檔出場！我地當然亦有收集佢地嘅簽名啦！Donald 簽緊名嘅時候，女朋友 Daisy 響旁邊做咗好多動作！
同 米奇家族 影完相之後，去到 明日世界，響呢個星際港口，我地見到 巴斯光年！太空戰士，一飛衝天！不過我就覺得 巴斯 嘅簽名好似有啲平凡，冇咩特色，唔算係太特別...
因為我嘅朋友唔知幾時先會有機會再入園玩，所以一定要響呢一日裡面簽哂簿入面嘅每一頁。但係，其實要響同一日內響 香港迪士尼樂園 入面搵到咁多 迪士尼朋友，係一件幾困難嘅事... 跟住我地就向公主入手！我地搵到兩位公主，白雪公主 以及 灰姑娘！兩位都儀態萬千呢！
最後，去到晚上，我地再次入到去 反斗奇兵大本營 裡面！今次見到嘅係 胡迪！我地收集咗全日最後一個簽名，但好可惜，我嘅朋友始終簽唔哂咁多頁，不過都冇辦法啦...
佢嘅簽名簿最終有兩頁空白咗，至於我呢，因為將 米奇、米妮 分開咗，就剩返一頁。但呢頁我原本已經想預留俾一位 迪士尼朋友！就係我愛嘅 小熊維尼 Winnie the Pooh！嗰日全日都見唔到 Pooh，只係見到 Eeyore，所以我響下一次入園嗰陣，就拎咗本簿去搵 Pooh！
能夠同咁多位 迪士尼朋友 見面、影相，真係好開心！收集到咁多簽名，亦都好滿足啊！經過呢次之後，我入樂園玩嗰陣亦都比過往多咗去搵 迪士尼朋友 影下相，同佢地一齊玩下！事實上，奇妙體驗，只係在乎你點樣去睇一件事；就算微不足道，只要開心過，都算係奇妙感覺！俾錢參加星級之旅可以感受奇妙，但有時響園內發掘下，我地都可以創造屬於自己嘅星級之旅！
沒有留言:
張貼留言