之前先後帶過兩隻 大Duffy 熊仔入去樂園玩，亦幫佢地影咗好多相，今次終於輪到 小Duffy 啦！嗰次去買 復活節Duffy，特別帶埋 小Duffy 見佢嘅新細佬；而入園前，我地就去咗 迪欣湖 行咗陣！
唔記得有冇講過，其實響 香港迪士尼樂園渡假區 開幕七年幾以黎，我都冇去過 迪欣湖活動中心... 咁點解今次突然會去呢？因為呢排我由學校出發入去樂園，會選擇搭巴士，並且會途經 迪欣湖！
搭過幾次巴士，我都有諗過落車行下，但係我又驚 迪欣湖 真係冇咩睇，所以制止咗自己。最後，我趁住嗰次有 小Duffy 陪伴住我，終於首次踏入 迪欣湖活動中心！
作為 迪士尼樂園渡假區 嘅一部份，呢到嘅佈置當然都非常精緻！主色用咗純白色，感覺好清新！
雖然周圍的確係整得幾靚，不過正如我原先咁諗，呢到真係冇咩好做... 只係得個沿住湖畔行... 我圍住個湖行一圈，竟然行咗我一個半鐘！幸運地，沿途都有好多花草樹木，散下步都幾舒暢。
平時都只係同 Duffy 佢地都響園內各個主題區影相，今次終於有啲新意啦！又係時候影返輯相！即刻以湖中嘅巨型水柱作為背景，幫 小Duffy 影張靚相先！話哂呢個都係地標黎嘛！
湖嘅中心唔係剩係得巨型水柱架，再行過少少，發現有一個小島，種滿綠悠悠嘅樹木。
湖畔有啲小亭，可以坐響入面，享受一下陣陣涼風；而小亭入面嘅裝潢都設計得好靚架！
咦！小Duffy 響到睇緊啲咩呢？原來響到睇緊湖水流動，估唔到啲湖水都幾清澈喎！
迪欣湖 除咗湖水之外，最多嘅就係植物！有高高嘅樹木、幼細嘅竹子、幼嫩嘅綠葉... 林林種種！
小Duffy 有特別發現！佢要話俾大家聽，佢響燈柱上面搵到一個 隱型米奇！你睇唔睇到呢？
呢到都有好多有趣嘅園藝設置，包括一個小瀑布，水流響石堆中流出，慢慢流入湖裡面。
平時坐 迪士尼線 嘅時候，都可以見到 迪欣湖 嘅巨型水柱，今次我地就響到見返 迪士尼線 列車。
另一樣我好鍾意嘅，就係呢片大草地！之後又幫 小Duffy 搵到個靚景影相！全部都充滿春天氣息！
我地臨走之前，小Duffy 見到旁邊有一個小型遊樂場，忍唔係玩咗一陣鞦韆呢！
好啦！係時候入樂園搵新細佬啦！行返樂園嗰邊嘅途中，經過好多之前未去過嘅地方...
響 香港迪士尼渡假區 入面，行到去邊一個地方都係咁靚！遲啲得閒嘅時候要再發掘一下！今次漫步於 迪欣湖，冇咩人，幾寧靜，比我預期中好... 等我搵一日再去過，試下坐腳踏船先！
沒有留言:
張貼留言