早前園方已經宣佈，樂園擴建計劃嘅壓軸項目，迷離莊園，將會響五月隆重開幕！好快就到啦！剩返兩個幾月，即係話呢個新園區嘅工程大致上都已經完成，而家應該進入咗最後調整階段！
每次入園，離遠望下 迷離大宅，我都會幻想遲啲入到去裡面嘅一刻，相信感覺必定會非常震撼！而上星期入到去樂園，更加有特別驚喜！響 灰熊山谷 入面，已經可以見到大宅亮起咗紫色燈光！
繼續慢慢向著 迷離莊園 嗰邊進發，迷離大宅 嘅塔頂響樹林中展露出黎，散發著神秘嘅氣氛...
黎到莊園嘅入口，大門仍然緊閉，但係就可以好清楚咁睇到大宅嘅結構，以及花園亮起嘅燈光。
再仔細睇下燈光效果先！今次選用嘅係紫藍色燈光，非常配合大宅嗰種撲朔迷離嘅主題！
其實我覺得嗰晚見到嘅應該唔係最終效果，因為夾雜咗一啲黃色光，唔係咁自然，相信仲測試緊。
另一樣值得留意嘅係，當晚響莊園內已經再見唔到任何工程設備，戶外部份可能經已大功告成。
最後兩個月倒數！唔知 奇妙處處通 會員幾時有得試玩呢？點都好，而家都係繼續等園方公佈啦！
2013年2月8日
尋日諗住返工前再去影下 安仔玩具箱，但係我最後唔夠時間影，惟有遲啲先再講呢間新商店啦... 安仔玩具箱 而家已經落成開幕，之後嘅焦點自然落返響樂園最後一個擴建園區 迷離莊園 身上！迷離莊園 係三個擴建園區之中我最期待嘅一個，因為用神秘力量做主題，故事一定會非常吸引！
前晚再次黎到 灰熊山谷 嘅邊界遠望黑夜中嘅 迷離大宅，竟然發現塔頂位置已經亮起咗燈光！唔知大宅嘅主人，亨利爵士，係唔係響塔頂辦公室入面為 迷離莊園 嘅開幕計劃緊籌備工作呢？
再望下莊園大門旁邊呢盞古式大燈，亮起嘅燈光為 迷離莊園、迷離大宅 再次增添神秘感...
呢排 反斗奇兵大本營 搶盡風頭，快將開幕嘅 迷離莊園 又愈黎愈注目，好似忽略咗 灰熊山谷 添... 響呢篇文章入面順便同場加映兩張 灰熊山谷 夜景照片啦！我成日都會沈醉響迷人嘅夜色之中...
究竟 迷離莊園 幾時先開呢？好想睇清楚呢個神秘莊園嘅日與夜！大門快啲再次打開啦！>_<
沒有留言:
張貼留言