農曆新年之前，園方為 奇妙處處通 會員推出額外10%購物折扣優惠，之後又突然推出六折優惠！相信各位都有趁機會將自己嘅心頭好一一帶返屋企！當然，我自己都唔例外啦！
其實我有啲瘋狂，都買咗幾多野；之前都有同大家分享過買咗返黎嘅新年產品、T恤等等。今日，想分享埋剩餘嘅 迪士尼樂園商品；當中，有一樣野我覺得係非常特別嘅！就係呢套便條簿！
點解會話佢好特別呢？係因為呢套便條簿設計到好似T恤咁，包裝上更加貼咗一啲 米奇耳朵衣架！便條簿一套三款，T恤上面分別印有 米奇、米妮、唐老鴨 可愛嘅樣子！
呢套便條簿令我諗起，三年前我響日本 迪士尼商店 都買過差唔多嘅野，就係兩套 Pooh 記事簿！一套都係T恤嘅形狀，另一套就係袋嘅形狀，同樣都係好可愛架！
近期，樂園都推出咗多個全新嘅商品系列：甜點、香港地標... 而我最鍾意嘅，就係布偶系列啦！
今次又再買咗一罐曲奇餅！上面可以見到 米奇家族 嘅各個 迪士尼朋友，以及佢地嘅布偶！
平時買糖果禮盒，通常都係貪個罐夠靚，今次終於有另一樣野吸引到我，就係綠茶味曲奇餅！我係超鍾意所有綠茶味嘅食物！不過我仲未試食，希望呢款新口味嘅曲奇餅唔會太差啦！
呢個布偶系列推出咗好多相關產品，我另外仲買咗一版貼紙！因為見到啲圖案好靚，又心郁郁買咗... 都係有各個 米奇家族 迪士尼朋友 同埋佢地嘅布偶！
除咗布偶系列貼紙之外，我睇下睇下，又搵到另一版好靚嘅貼紙，用咗主題園區 卡通城 嘅圖案！
呢個主題園區，以卡通動畫做主題，響加洲嘅 迪士尼樂園 以及 東京迪士尼樂園 都有架！不過我又唔明... 響香港都冇興建 卡通城，點解會推出有關商品？其實都冇所謂啦，最緊要係靚！
嗯，諗返轉頭，冇咗特別優惠後我都係繼續買野... 我係唔係應該遠離商店，慳返啲錢呢？哈哈！但係，有時候見到一樣心頭好，能夠買返屋企的話，真係會好開心架！所以都算係值得嘅！
沒有留言:
張貼留言