仲記得 邊域山谷 嗎？去年11月我就同大家講到，響電腦以 灰熊山谷 作為藍本設計咗一個園區。呢一刻，香港迪士尼樂園 嘅 迷離莊園 快將開幕，而我自己就率先設計咗另一個全新主題園區！
延續上一次嘅 邊域山谷，我繼續響自己嘅樂園 Wonderland 夢幻樂園 進行粉飾工程。今次，呢個園區叫做 Ancient Land 迷失世界，參考咗 香港迪士尼樂園 嘅 迷離莊園、探險世界。
迷失世界 被分為兩個部份，其中一邊係 阿拉伯古城，不過我想講咗另一邊嘅 神秘島 先。事實上，除咗參考位於香港嘅兩個園區之外，仲有其他創作靈感係黎自其他 迪士尼主題公園；神秘島 嘅地標，神秘巨樹，就係參考咗 華特迪士尼世界 動物王國 裡面嘅 生命之樹 Tree of Life！
我地入去啦！神秘島 呢邊有一個入口，但因為旁邊嘅園區稍後亦會展開粉飾工程，所以暫時封咗。咁賓客而家可以點入去 迷失世界 呢？一陣會再講，嘿嘿！
響登上 神秘島 之前，不如我地先睇下呢邊嘅岸上有咩設施啦！有一條探險徑沿住河邊建成喎！旁邊有多間小食店，名為 Mystic River Trail Snack Bar 神秘河畔探險徑小食亭。
介紹 邊域山谷 嘅時候，都提及到會有 夢幻樂園單軌列車 Wonderland Monorail 環繞整個樂園；呢個新園區當然都會有車站，就係 Ancient Land Monorail Station 迷失世界單軌鐵路站。
呢邊嘅岸上仲有好多其他服務設施，洗手間一定要有啦，另外仲有資料亭等等。園區內嘅不同位置亦設有演藝人員入口，俾演藝人員進入地底通道，方便佢地穿梭於不同園區。
係時候上船，踏上 神秘島 啦！參考咗 香港迪士尼樂園 嘅 泰山船屋，一定要坐船先可以過到去。不過我地就唔係坐木筏，而係坐 神秘島運輸船 Mystic Island Ferry，碼頭嘅牆壁上都畫有波浪！
過到去 神秘島，有咩做呢？可以響高高低低嘅橋上，近距離欣賞龐大嘅 神秘巨樹！仲可以去探訪島上嘅部落，購買特式嘅紀念品、珍藏品 - Mystic Island Tribe Collection！
島上都設有洗手間，咁賓客就唔需要過返對面岸先可以去洗手間啦！除此之外，呢到亦有一個演藝人員入口，俾演藝人員經由地底來往湖畔同埋 神秘島。
而家，讓我為大家介紹 神秘島 最好玩嘅遊樂設施：神秘河流探險之旅 Mystic River Cruise！相信大家聽完個名之後，都估到呢個遊樂設施係參考咗 迪士尼樂園 嘅 森林河流之旅！
經過等待區之後，就黎到碼頭，比較特別嘅係，呢個碼頭雖然響室外，不過係有蓋架！等我地登上探險船先！由呢一刻開始，我將會化身成各位嘅船長兼導遊！
「大家好！歡迎黎到 神秘河流探險之旅！呢到就係世界聞名嘅 神秘河！大家準備好探險未呢？」
「呢到就係部落嘅神廟，大家要靜啲啊，唔好騷擾到佢地... 我地繼續前進啦... 」
「嘩！你地真係好彩！竟然可以響到見到罕有嘅天堂鳥！一定係幸運嘅徵兆啦！」
「咦！個瀑布好靚喎，不如我將艘船駛近啲，俾大家睇清楚啦！我地去啦！」
「大件事！原來係陷阱黎架！個瀑布不斷將我地艘船推入去火坑入面！點算啊？」
「丫丫丫！火啊！我地要快啲走啊！開盡引擎，全速前進！衝啊！衝過火坑啊！」
「唉，終於逃過一劫！下次都係要提高警覺，唔好俾美麗嘅假象吸引到... 」
「我地繼續往前走... 嗯，見到湖畔啦！有冇人未食飯？未食嘅話，一陣落船後可以去買野食！」
「我地返到碼頭啦！話咁快，我地嘅旅程黎到尾聲啦！大家玩得開唔開心呢？我地下次再見啦！」
其實，響呢個遊樂設施入面，都有隱藏咗一個緊急出口，但專登整到唔會俾賓客見到。順便講下，響水上進行建設有較多限制，所以我建造 神秘河流探險之旅 嘅時候都花咗好多心機！
我地已經睇哂整個 神秘島 區域，而家我地去 迷失世界 嘅另一邊，阿拉伯古城！阿拉伯古城 嘅地標就係 遺忘宮殿 Forbidden Palace，究竟入面有啲咩呢？我地稍後先至入去！
古城呢邊都有入口，但同樣因為連接嘅主題園區將會展開粉飾工程，都係暫時用圍板封住咗。大家見唔見到，牆上有幾個窗呢？有時會有單軌列車經過架！以下嘅圖片就咁啱有列車經過！
現階段，賓客可以使用古城內嘅一條小巷進出 迷失世界，經由小巷去到旁邊嘅 邊域山谷；原本呢條小巷只係設計成一條小通道，預計流量唔會太大，不過而家就成為咗惟一嘅出入口。
講返 阿拉伯古城 嘅設計，呢到嘅結構其實係參考咗 東京迪士尼海洋 嘅 地中海港灣。進入古城，首先會穿越一個有蓋走廊，之後就會去到城中嘅廣場，另外亦都有一啲小巷。
古城入面，有一個室內遊樂設施：魔毯飛天之旅 Journey Of Flying Carpet。坐響毛毯上面，神燈會施展魔法令毛毯上下擺動，而四周嘅牆壁亦會投影出飛天嘅情景！
除咗遊樂設施之外，同樣都有其他服務設施，夾夾埋埋組合成一個完整嘅 阿拉伯古城；Arabian Market Place 阿拉伯古城市集、Arabian Market Foods 阿拉伯古城美食，包羅萬有。
粉飾樂園嘅時候，我都響每個園區設置一個急救站，令有需要嘅實客可以第一時間接受治理。沿用以往做法，迷失世界 嘅急救站被設置於古城內一個較為隱蔽嘅位置，保障病者私隱。
緊張嘅時刻要來臨啦！我地要進入 遺忘宮殿 啦！進入宮殿後，就開始往下走，究竟有咩睇呢？
黎到地底，有遊覽車正在等待我地；登上遊覽車，充滿謎團嘅探秘正式展開...
一開始，宮殿裡面都比較暗，好似隱藏咗好多秘密，唔知會唔會有古怪嘅事發生呢？
有燈光啦，減退咗些少緊張嘅氣氛！但其實，探秘嘅旅程只係開始咗冇幾耐...
遊覽車轉彎，進入咗一間金光閃閃嘅房間；咦... 我地好似黎錯咗地方，誤闖神聖領域...
果然不出我所料，一股神秘力量驅使遊覽車高速啟動，響黑暗之中旋轉、下墮、飛馳！
遊覽車開始稍為減速，我地再次見到燈光... 不過，惡夢並未完結，一聲巨響傳出，燈光隨即熄滅！
突然，一陣強光刺進雙眼，當我地能夠睜開眼睇清楚嘅時候，發現眼前出現了兩尊神象...
遊覽車又再因為神秘力量而高速啟動，飛快地進入咗地底，我地最終嘅命運會係...？
穿越地底，遊覽車最終都停低落黎... 原來，我地經已離開宮殿，安全返回 阿拉伯古城...
一場緊張刺激嘅探秘要結束啦，而家我地去睇睇後台區域！剛才 遺忘宮殿 嘅過山車式旅程，係響背後呢個建築物裡面進行嘅，整個範圍都幾大架！我亦有進行過特別設計，確保一般賓客響園內任何位置都唔會見到呢座野，唔會影響景觀！
新園區開幕，亦有新增演藝人員通道，連接 遺忘宮殿 建築物以及 邊域礦山 嘅後台區域。咁樣，維修人員就可以好方便咁入去進行維修工作；當出現緊急情況時，亦可以用作疏散賓客。
我好鍾意呢張相！有齊哂三個地標！包括：邊域礦山、遺忘宮殿 以及 神秘巨樹！
最後，俾大家睇下晚間嘅 迷失世界 啦！配合燈光效果，又會有截然不同嘅感覺！
完成咗 迷失世界，下一輪粉飾工程又輪到邊個園區呢？就係旁邊嘅呢兩個園區！呢兩個園區分別係 神秘古廟 Ancient Temple、遺忘森林 Forbidden Forest。( 舊版 迷失世界 )
呢兩個園區好快就完成咗拆卸工程，變返一片平地！如果起野都可以咁快完成就好啦！哈哈！
咁呢片平地響之後會有咩計劃呢？大家睇到以下呢片填咗色嘅土地，會諗到啲咩呢？
我會慢慢進行建設，繼續為 Wonderland 進行粉飾！遲啲有新進展的話再同大家分享啦！:)
沒有留言:
張貼留言