我依然繼續趕工，務求極速完成 回望2012；不過就比我預期中需要更多時間，但我會儘快架啦... 感謝大家耐心等候，請放心，我用咗咁多時間，必定唔會求其交貨，請繼續期待一下！>_<
響回望上一年發生嘅事之前，今日想發表一篇較短嘅文章，同大家一齊回望昔日嘅 米奇家族！又考一考有睇開Tho's Dreams嘅朋友先！唔知你地記唔記得，我係最鍾意邊一款 米奇 造型呢？我成日都有提及嗰個造型，但除此之外，其實我仲有另一個造型都好喜歡，就係傳統 米奇 造型！
響園內嘅 動畫藝術廊 裡面，都放有一啲雕塑，顯示 米奇家族 當初面世嗰陣嘅傳統造型。當時嘅動畫都只係黑白顯示，造型設計亦相對比較簡樸，但係我就覺得咁樣反而更加可愛！華特迪士尼先生 初時為 米妮 戴上一頂插有花朵嘅帽子，以象徵女生，真係一個特別嘅設計！
咦！原來 唐老鴨 響初初面世嗰陣已經成日嬲爆爆咁，而設計上亦比起現時更似一隻真實嘅鴨仔；反而 高飛、布魯托 呢兩隻狗仔嘅樣貌就冇咩變化，同以前差唔多，服飾亦都冇明顯嘅改動。
我亦想趁住 Oswald幸運兔子 呢排備受注目，順便放一張傳統造型 Oswald、Mickey 嘅合照！華特迪士尼先生 係響1927年創作 Oswald 嘅，但因為失去 Oswald 嘅版權，因而創作出 Mickey；所以，Mickey 可以話係以 Oswald 為創作藍本嘅，亦因為咁，其實佢地兩個係非常似樣架！
經過多年來嘅變遷，今時今日 米奇 嘅樣貌經已同當初有明顯分別，亦衍生出多款不同嘅造型。對比之下，你又鍾意傳統嘅樸素造型丫，抑或現今設計得更加細緻嘅 米奇老鼠 呢？:)
沒有留言:
張貼留言