Here We Go!! Duffy小飛俠造型服飾終於登場!!

我自己都已經唔太記得，之前曾經響幾多篇文章入面提及過 Duffy小飛俠造型服飾...  應該都唔少...  等咗咁耐，終於俾我等到啦！今日入園嘅時候發現，呢套服飾經已上架啦！真係好開心啊！

呢套係我近期比較期待嘅一套 Duffy 服飾，見到有得賣，我當然諗都唔洗諗就買咗返屋企！能夠將 Duffy迪士尼小熊 以及 小飛俠 呢兩位我喜歡嘅 迪士尼朋友 配合起黎，好得意、好可愛啊！

呢套服飾用咗一個盒黎裝住嘅，做法同前嗰排推出嘅 睡衣套裝 相同；而配件亦都相當齊全架！

而家又等我地仔細睇下每一樣配件！首先係帽子，綠色嘅高帽上面釘有一條紅色嘅羽毛，好靚！

上衣睇起黎非常閃亮，亦有索繩、腰帶等裝飾；旁邊嘅短劍更加可以拔出黎俾 Duffy 拎住架！

至於背後，亦都繡有 Duffy迪士尼小熊 標誌性圖案：米奇頭型圖案。同時亦釘有 Duffy 招牌。

條褲就冇咩特別，深綠色，襯返件上衣；同平時一樣，都係有一個位俾 Duffy 伸返條尾出黎嘅。

呢對鞋就用咗皮質製成，底部有 Duffy 腳印。基本上，整套服飾都係完全參照返 小飛俠 嘅造型。

而我覺得比較特別嘅一件配件，就係呢個奇妙星粉布袋，上面印有一堆星粉，仲有 奇妙仙子！

另一邊就印有《小飛俠》電影嘅經典對白：「你所需要嘅，就係信念、信心，同埋奇妙星粉！」

我嘅 Duffy迪士尼小熊 經已化身成 小飛俠，準備好翱翔天際，向著夢幻島進發啦！Here We Go！憑著信念、信心，同埋奇妙星粉，我地都可以響天空飛翔！齊齊讓自己嘅 Duffy 帶領你飛上半空！