迷你版 米奇耳朵造型帽子 可愛登場!

米奇耳朵造型帽子 可以話係 迪士尼樂園 Fans嘅標誌，你有冇擁有一頂屬於自己嘅造型帽呢？其實，我覺得頂帽有啲大，戴咗之後未必好睇，所以除咗 Duffy造型帽子，一直以黎都冇買過...  不過而家唔再需要擔心呢個問題啦！因為園方經已推出咗全新嘅 迷你版 米奇耳朵造型帽子 系列！

今次呢套帽子分為兩個類別：第一類係淨色，推出咗藍色、紅色、粉紅色，我就買咗一頂藍色嘅。

另一個類別就係依照 米奇家族 迪士尼朋友 設計嘅，有 米奇、米妮、唐老鴨、布魯托、高飛。

我當然係買 米奇 啦！呢幾款原本都有推出正常尺寸，但而家改成迷你版，感覺上輕便好多。

咁買咗返黎之後，呢啲迷你帽又有咩用呢？當我響商店買嗰陣，演藝人員已經好踴躍咁為我介紹！購買呢啲迷你帽的話，包裝盒裡面會附有三樣配件；使用配件，呢頂帽可以有三種不同嘅用法！

使用方法1，髮夾：將髮夾扣上迷你帽之後，就可以戴響頭上，變成獨一無二嘅飾物！

使用方法2，頭飾：假如唔鍾意用髮夾，都可以利用伸縮繩將迷你帽固定響頭上面架！

使用方法3，匙扣：始終唔想將佢戴響頭上？都唔緊要！用黎做鎖匙扣都幾特別丫！

至於我呢，以上三個方法都冇用到，另外自創咗一個另類用法，就係俾我嘅 Duffy 小熊戴起佢！

耳朵造型帽都算係一種幾受歡迎嘅商品，亦推出過多款設計，例如有剛才提及到嘅 Duffy 造型。

而響美國嗰邊就有更多款式！前排就見到佢地推出咗 Oswald 造型，長長嘅耳朵好可愛啊！

全新迷你版 米奇耳朵造型帽子 精緻得黎仲有多種使用方法，咁你又鍾意邊一個使用方法多啲呢？