又到咗星期日，又係新一個星期嘅開始，亦即係話，又會有新一期樂園時間表推出啦！不過，我嘅願望今次並無延續落去，今期時間表已經唔係由 Oswald幸運兔子 做封面主角。其實都唔緊要啦，Oswald 都做咗兩個星期嘅主角，我已經好滿足！希望好快又再可以見到佢啦！
咁今期時間表係邊個做主角呢？俾個提示大家，今個星期四響樂園入面會有咩特別事發生呢？冇錯，黎緊嘅星期四，迪士尼星級款待 將會正式開始，所以新一期封面都特別配合返呢個活動！今次活動分開咗兩個焦點主題，怪獸公司 以及 迪士尼公主，今次就率先由怪獸 大眼仔 做主角！
大眼仔 戴住工程帽，好有型！再次感謝好朋友幫我影相，等我可以即時知道新一期時間表嘅設計！但係有樣野我就唔係好明，本身以為係因為復活節，所以先特別揀咗 Oswald 黎做封面主角；去到最後，只係維持咗兩個星期，復活節又未到，究竟點解會搵佢？背後有冇特別嘅用意呢？
2013年3月16日
估唔到，今個星期入到樂園嘅時候，發現時間表繼續係由 Oswald幸運兔子 做封面主角！我諗應該係因為今個月係復活節，所以搵呢隻兔仔黎做封面，咁可能全個月都會係佢！好耶！
今期樂園時間表同上期有少少唔同，就係響右下角附加咗「Oswald 1927」嘅介紹字樣。
已經有兩期時間表係 Oswald 啦！好開心啊！不過我鍾意上期嗰個表情多啲，睇落好似可愛啲！點算呢？如果佢真係全個月都係用 Oswald 做封面，咁我咪每個星期都要入去拎樂園時間表？！唔緊要啦，為咗 Oswald，值得嘅！但我始終都好想園內會有 Oswald 商品賣... 唔知幾時會有呢？
2013年3月7日
今日入園玩嗰陣，入場後，離遠見到樂園資訊索取處好似有一個熟悉嘅面孔，即時心諗：唔係掛... 當我行到埋去嘅時候，我整個人嚇咗一跳，因為我冇睇錯，今期樂園時間表嘅主角真係 Oswald！
今次係 Oswald 多年黎首次登上樂園時間表嘅封面，正確啲黎講，應該係首次出現響樂園印刷品。所以，假如你都鍾意 Oswald幸運兔子 的話，就要把握今次機會啦！因為唔知幾時先會再有佢份！時間表上面除咗有呢隻咁可愛嘅兔仔之外，背景亦印有「1927」字樣，亦即 Oswald 嘅出生年份；順帶一提，Oswald 係眾多 迪士尼朋友 之中，歷史最悠久嘅一個，今年已經係佢嘅86歲生日啦！
點解我會形容自己整個人嚇咗一跳呢？因為我真係完全冇諗過佢地會搵 Oswald 黎做封面主角；原因係，現階段響 香港迪士尼樂園 入面，Oswald幸運兔子 都仲未普及，而佢都唔算特別受歡迎。
另一個令我嚇親嘅原因，係因為我響一月下旬寫過一篇關於 Oswald幸運兔子 嘅文章；文章入面亦有提及到，我希望未來會有更多機會見到 Oswald，估唔到我嘅願望響咁快就成真咗！雖然今次真係好開心，但同時都希望我嘅願望可以延續落去！Oswald，你要繼續努力啊！
沒有留言:
張貼留言