世界上首個 幽靈公館 座落於加洲嘅 迪士尼樂園 Disneyland Park,係響1969年開幕嘅。數數手指,原來呢個遊樂設施已經有超過四十年歷史!果然係一個 迪士尼 經典!
![](https://blogger.googleusercontent.com/img/b/R29vZ2xl/AVvXsEiFxoTY-HKbAhbvkU1Bhvw1tNFbr4xXGkGfnm0NRnMOklHzue4RbXcxNZxYuWN0Y_jiNDW2rmDsnt1UpQw-BDlneScoFVdrmQNMEj9enNVLmJ5kRXlVuCi8faaaxxMosa0H8aMR-NmFGfQ/s400/01.jpg)
而響兩年後,即1971年,另一座 幽靈公館 響 華特迪士尼世界 神奇王國 Magic Kingdom 開幕;基本上,內裡嘅設計概念係非常相近嘅,但呢座新公館嘅外型就參考返美國東岸嘅建築風格。
去到1983年,再有一座新嘅 幽靈公館 建於 東京迪士尼樂園 ,去到而家都已經有三十年歷史!值得一提嘅係,建設 東京迪士尼樂園 嘅時候,好多方面都係以 神奇王國 為設計藍本嘅;園內有好幾個遊樂設施嘅結構佈局都係同 神奇王國 嘅版本完全一樣,幽靈公館 正正係其中之一。
![](https://blogger.googleusercontent.com/img/b/R29vZ2xl/AVvXsEh30BTUdU1Nf2-UBJ_50OOByfln09-Kcyu9GWg27GlMloCYLH-LlLsUy-MMgu6YZyXnvLM5y9zHTlG2Wor_rLOD6OmMTBxIFrAnrP6rDtBkhLwaN7qvCCxPqEzRmy8XwQO-LvKHjQlaWZg/s400/02.jpg)
聽到 幽靈公館 呢個名字就知道呢間大屋入面住滿幽靈,第一時間就會俾人一種詭異、可怕嘅感覺。但係,響恐怖嘅氣氛入面,點樣可以令到呢個遊樂設施同時亦不失傳統嘅 迪士尼 元素呢?
其實呢間大屋嘅其中一個故事背景,係根據一套 米奇老鼠 動畫,Lonesome Ghosts 黎設計嘅;
米奇 同佢嘅朋友接受咗聘請,去到一個大間入面驅鬼,而裡面嘅鬼魂就設法嚇佢地,令自己發笑。一般人都覺得鬼魂好可怕,然而,華特迪士尼先生 就響呢套動畫之中為鬼魂賦予一種調皮嘅性格。響現實嘅 幽靈公館,就講述一班鬼魂響大屋入面開派對,延續咗動畫入面嘅概念!
![](https://blogger.googleusercontent.com/img/b/R29vZ2xl/AVvXsEgu8RlD5XDLlBamma37Io430UULb81Cd_HowPNjirfOdB66l9fwu_zBIrZY8rqW05EtkCcLiA5_8qh1z1S-Apw9riMh6N5sxwvVFAtPv5hREL7afpq_IN5Bf5Qlp9igICmV8PyEWviz_jQ/s400/03.jpg)
睇返資料,原來 幽靈公館 亦都有 迪士尼壞蛋 出現,其中一個例子就係 小飛俠 裡面嘅 鐵勾船長;另一個故事概念就係由 斷頭騎士 發展出黎嘅,呢個角色相信大家都唔會陌生,因為響香港出現過。不過,我上次響東京玩 幽靈公館 就見唔到呢啲角色,遲啲再去嗰陣要再認真睇清楚啲先得!
![](https://blogger.googleusercontent.com/img/b/R29vZ2xl/AVvXsEgFgD_eFQ5J9uxjJCgRm1Rsg6LbXLUgHmRDx23pALwxGxQZ0TelNgTV-RSjEnWHcc-H20Zyu1puHj6DJoLv46o5yWPFUGvroOmxEvPECXt_MX4STiTB_nnKiEDtb4S3Ux7pj7onMdJlLJw/s400/05.jpg)
![](https://blogger.googleusercontent.com/img/b/R29vZ2xl/AVvXsEgPLEEIj1lIZRDjkFDkGSXYwgkExhtZM1j-kQrQXK16hmsvF480HIXXSUJTAvXo9-XWtPojhoXeJMDJYZL1HKVlPtp3eDaJCmTr2osV9aBW2Jhti4JKZCZf-veYfL81H8mV6ASxHAwGXbQ/s400/04.jpg)
幽靈公館 裡面嘅各個場景我就唔多講啦,惟獨有一個好特別嘅場景想同大家分享一下!
響正式登上遊覽車之前,賓客會首先進入一間房間,牆壁會慢慢拉長,展示一幅幅畫作嘅真相;呢個設計嘅背後係有特別用途嘅,原因就係同當時加洲 迪士尼樂園 嘅土地有關!
當初興建 迪士尼樂園,設計到整個樂園都係俾 迪士尼樂園鐵路 包圍,土地慢慢變得所剩無幾;於是,幻想工程師 就決定向路軌圈外發展,將門口放響圈內,幽靈公館 嘅整個結構就放響圈外。呢間房其實係一部升降機,響不知不覺間帶領賓客去到地底,之後佢地就可以穿過路軌去到圈外。事實上,響其他樂園內嘅 幽靈公館,並無穿過路軌嘅需要,但係就保留咗呢個有趣嘅場景...
![](https://blogger.googleusercontent.com/img/b/R29vZ2xl/AVvXsEg1JPIAYs1PDT38Vr7jx-E3o667hPTWHRhXeVuRQKurF_4tdM4ZrVwmL-vT-2T8Rrtx1lenJM6UxURyzspZHEYjNEM4gPGjmM7DlG3PFA-oe6YDlYq3uIoI-fOj1_4X-BpGnJZnH-dvuVE/s400/06.jpg)
![](https://blogger.googleusercontent.com/img/b/R29vZ2xl/AVvXsEhz8qW4tSasRy2EjStBstzyu0BuP8v_d_OI_WxY-xN77IR-4Dp0EfFmOzboN-fnEVmHjmCmTdMmHsmZGx-x75C4RAUKTxJMJPmjmIc9vZNIM6XTjMoBnRoyyFg10FvnVtzb6klBvNO6LXU/s400/07.jpg)
三座 幽靈公館 響不同嘅 迪士尼樂園 開幕後都大受歡迎,相隔十年,再有新嘅 幽靈公館 落成!1992年,巴黎迪士尼樂園 盛大開幕,全新嘅 幽靈公館 Phantom Manor 亦正式同賓客見面!
將 Phantom Manor 同埋 Haunted Mansion 翻譯過黎的話,其實都係解作 幽靈公館;但巴黎呢座 幽靈公館 其實係一個嶄新嘅故事,以 歌聲魅影 Phantom of the Opera 做故事背景。一眾 幻想工程師 運用佢地嘅想像力,為呢個經典遊樂設施黎一個大改造,製作出一個全新版本!咁就證明咗,維持固有嘅傳統風格之外,同一時間都可以加入新元素,為賓客帶黎新鮮感!
![](https://blogger.googleusercontent.com/img/b/R29vZ2xl/AVvXsEgTyDT2A46fhqWXFUpYXXZz3I2iwLqHwVXKq6q3rMq_Ulyn-E1ytm6hblyBMhSe_Bq3tdNGDufc2duYhW513ZTkwB4RY4Wa5s3o167_KLkn3_u1mx0S5-kb7fcP6twid1DIQVsod0eiGS0/s400/08.jpg)
但係,要帶來新鮮感係唔係一定要興建一個全新嘅遊樂設施呢?當然唔係,最重要係要有想像力!就算係響原先已經開放咗好耐嘅 幽靈公館,只要發揮想像力,亦可以創作出一個全新嘅體驗!其後響2001年,響萬聖節期間,加洲版本加入咗 怪誕城之夜 嘅角色,將佢地融入 幽靈公館!
情況就同 香港迪士尼樂園 曾經製作過嘅 小小世界過聖誕 相同,為遊樂設施設計一個節日特別版。去到2004年,東京版本嘅 幽靈公館 都開始製作節日特別版,睇黎呢個二次創作都好有吸引力呢!
由1969年,黎到現今嘅2013年,幽靈公館 經歷過好多變遷,有故事改裝,亦有節日改裝。
最新一個 幽靈公館 改裝,將會響今年五月呈現於賓客眼前,就係 香港迪士尼樂園 嘅 迷離大宅!迷離大宅 背後嘅設計概念同樣係以 幽靈公館 為藍本,不過就由幽靈改用超自然力量做主題!
![](https://blogger.googleusercontent.com/img/b/R29vZ2xl/AVvXsEg0A45lMHT0fWm7Vk1jVP_Fgwm01nxDVUPx_ne68C1Evm278e2IoD8xild7oMEVVx-CqgvenhQ9DaA4s27sC5XzvbLvxXskZJo12O5eFiMIyf_klPwqKUVdx4r-Xw__AkxFoP0H8ggpA-o/s400/11.jpg)
從恐怖變成迷離,究竟呢座香港獨家嘅 迪士尼大宅 會點樣為賓客帶來嶄新體驗呢?繼續拭目以待!
沒有留言:
張貼留言