我嘅徽章都有好幾個類別，而第一類就係 迪士尼朋友！一定唔少得我最愛嘅 Duffy迪士尼小熊 啦！
之後就有 小熊維尼！嗰個油畫徽章係我幾年前覺得幾得意而買嘅，係我買嘅第一個徽章！
米奇 作為樂園嘅主角，園方都為佢出咗好多徽章，我就買咗我鍾意嘅 魔法師造型、經典造型。
其他 迪士尼朋友 徽章就有 小飛象、唐老鴨 鞋子，為咗儲齊一對鞋，我亦買咗個 米奇 鞋子徽章！
下個類別就係樂園主題徽章！用咗樂園標誌設計成簡樸嘅徽章，另外亦有 睡公主城堡 立體徽章！
2011年同埋2012年，兩個擴建園區開幕，園方都有推出相關徽章，我都將佢地歸類為樂園類。今年三月，反斗奇兵大本營 全新商店 安仔玩具箱 正式開幕，又令我買咗三個好靚嘅徽章！
繼續去到下一個類別：節日類！響一整年間，樂園會舉辦不同特別活動，亦係買徽章嘅好時機！我先後響萬聖節、聖誕節、復活節買過徽章，但因為我覺得農曆新年徽章唔係咁靚，所以冇買到...
就算唔係節日，園方都會推出不同系列嘅商品，往往都會同時推出徽章，我稱為特別主題類！最近出現咗一個新嘅商品系列，香港地標，我見到一個徽章上面印有 迪士尼線 列車，就即刻買咗！
園方呢排仲有推出兩款鐵罐徽章，相信Fans們都已經買咗啦！我自己就買咗一罐 手偶鐵罐徽章！我有 米奇、唐老鴨、小飛俠、勞蘇、史迪仔；不過我想要 小飛象 多啲，遲啲應該會換走 史迪仔。
除咗配合商品系列推出徽章，有時都會有特別主題徽章上架，近期我比較鍾意嘅就係 課室主題。呢個系列一共有六款限量版徽章，每個徽章上面都有一啲有趣嘅細節，又令我買咗四個返去...
剩餘嘅一個分類，係紀念徽章，呢啲徽章都係有特別紀念價值，暫時有三個徽章被歸入呢個分類。有 樂園七週年徽章、華特迪士尼先生 生日徽章，以及我之前返工嘅時候所收到嘅 演藝人員徽章。
另外值得一提嘅係，園方不時都會推出徽章套裝，會有好靚嘅包裝盒，裝住一套幾個嘅徽章。我買嘅第一套徽章套裝，就係上年嘅聖誕節徽章套裝，亦係首度推出嘅 奇妙處處通 會員獨家套裝！
其實，響我開始儲徽章之前，每年續證嗰陣都會收到樂園送出嘅徽章套裝，而家已經有三套！分別係2010年嘅 史迪仔套裝、2011年嘅 迪士尼飛天巡遊套裝、2012嘅 反斗奇兵套裝。
最後，呢啲就係我諗住攞去交換嘅徽章！三個以 反斗奇兵大本營、灰熊山谷 做主題嘅徽章！本身係預咗去加洲嗰陣拎去交換嘅，不過而家旅程延期，都廢時擺響屋企鋪塵，拎去交換好過啦！
今年係我第一次參加 徽章交換同樂日！唔知會遇到啲咩野趣事呢？唔知會交換到啲咩呢？期待！
沒有留言:
張貼留言