惡夢完結 - 迷離莊園 預演日抽獎

迷離莊園 預演日抽獎公佈結果啦，最後都被抽中咗，惡夢終於完結，可以去參加預演日...  不過我始終覺得，有咗 灰熊山谷 嘅經驗之後，園方都一意孤行再搞多次抽獎，係一件幾可悲嘅事...  但我響續會嘅時候亦都會遵照返自己之前嘅決定；然而，現階段我對園方依然期望不大...

每論如何，我都愛呢個樂園，好希望呢個樂園可以慢慢進步，期望佢可以茁壯地成長落去...  都係唔諗咁多啦！而家就等我繼續期待預演日嘅來臨，繼續期待踏進 迷離莊園 嘅一刻！

---

2013年4月3日

下午收到一封電郵，睇完後第一個反應係「又黎？唔好掛...」今次，迷離莊園 預演日又要抽獎...  繼上年 灰熊山谷 預演日令眾多樂園Fans不滿之後，園方都依然要搞抽獎，我都不得不佩服佢地...

曾幾何時，樂園官網係有註明過「白金卡會員可以獨家率先試玩樂園新景點及活動」，但而家呢？自從 灰熊山谷 試玩，有關字眼就即時被移除，並且要求白金卡會員都要參加抽獎先有機會試玩...  我唔知佢地響背後有冇根據級別次序黎優先抽籤，但都冇咩關係，成件事無論如何都係錯誤嘅...  先唔講係唔係白金卡「獨家」，只要佢地唔能夠確保白金卡會員可以率先試玩，就係出爾反爾；而就算佢地暗地裡係有優先次序的話，都係欺騙緊其他級別嘅會員...

事實上，今日知道呢個又係咁嘅安排之後，我冇咩特別感覺，亦冇好似 灰熊山谷 嗰次咁嬲...  或者我已經習慣咗，學會無奈地接受，亦唔敢再抱太大期望，因為園方只會一次又一次令我失望...  但係，正當我考慮緊會唔會再續白金卡嘅時候，又出現咗啲咁嘅野，咁就不如「聽園方由命」啦！抽中就白金卡，抽唔中就金卡，呢個係我嘅最後決定...  而家只可以祝自己好運，亦祝大家好運！

( 題外話：今次張官方圖片又整得唔錯喎，我覺得算整得幾靚！可以話係失望之中有少少安慰...  )