可能因為睇過套戲，令我充滿好奇，好想知道更多關於呢艘船嘅野，今次好慶幸可以黎睇展覽！
上一次黎 威尼斯人渡假村 裡面嘅 金光會展，係睇冰雕，今次終於有機會再次行呢條長長嘅走廊。
黎到展覽館入口，有一個 鐵達尼號 小型模型；一入去之後，就有一幅 鐵達尼號 首航嘅畫作。
正式進入展覽館，等我地睇睇地圖：展覽由建船過程開始，逐步講述到沉沒，再去到發現殘骸。
一開始就講解到點解會有 鐵達尼號 嘅誕生，係因為 白星航運 要面對競爭，決定開展一個計劃；呢個計劃包含三艘巨型郵輪，佢地要建造三艘世上最巨大嘅郵輪，鐵達尼號 就係當中嘅第二艘。響航運公司嘅角度黎睇，鐵達尼號 擁有一個光榮嘅任務，就係要提升公司競爭力，擊敗對手。而 鐵達尼號 作為當時其中一艘最大嘅郵輪，大眾亦都慨嘆人類嘅技術成就，期待呢艘船嘅完工。
帶著航運公司、普羅大眾嘅期望，鐵達尼號 開始咗建造工程，呢到展出多張船隻架構設計圖。
同時亦展出當時嘅珍貴相片，呢張相入面嘅，就係驅動整艘 鐵達尼號 嘅三個特大型螺旋槳。
展覽亦特別整咗一啲佈置黎模擬出一個造船廠，包括木箱、鐵鏈等等，我覺得都幾有心機。
鐵達尼號 終於完工，準備啟航；呢艘擁有特別設計嘅巨型郵輪，被譽為一艘不可能沉沒嘅船。
響首航當日，一大班群眾前來歡呼；歡送 鐵達尼號 之餘，亦希望一睹呢艘巨輪嘅真面目。
鐵達尼號 先後響三個地點接載乘客，最後帶著1259名乘客、905名船員向美國紐約進發。
鐵達尼號 響當時黎講，係一艘非常豪華嘅郵輪，華麗嘅裝潢、完善嘅設備係佢嘅一大賣點。船內分有三個等級：頭等、二等、三等，愈高等級會愈貴，但就可以享受一個更豪華嘅旅程；事實上，鐵達尼號 嘅二等艙，幾乎已經等於同期船隻嘅頭等艙，可想言之，佢真係有好大吸引力。
展覽館亦將船內各項設施響我地嘅眼前重現出黎；上船後，首先黎到嘅，就係頭等艙嘅走廊。
之後就有頭等艙客房，係一間好精緻嘅英式房間；每一樣傢俱、茶具，每一盞燈，都好華麗。
呢個展區同時展出 鐵達尼號 船內所使用嘅餐具，以下分別係三等、二等、頭等艙嘅餐具。明顯見到各個等級嘅待遇係有所不同，形成咗好強烈嘅對比，但係都可以話係理所當然嘅...
仲有展出多種銀器，見到佢地閃閃發光，再次感受到 鐵達尼號 船上嘅生活係幾咁奢華。
展區亦介紹到當時船上嘅各種設施，頭等艙有浴場、游泳池等等，不過講到最廣為人知嘅...
就係響 鐵達尼號 電影中都出現過嘅華麗階梯！展覽館都有將呢條非常出名嘅階梯重現出黎！
經過階梯之後，燈光突然變得暗淡起黎，原來我地已經黎到三等船艙，走廊只剩微弱燈光。
房間非常陝窄，有兩張雙層床，床上有薄薄嘅被鋪；呢到曾經係好多新移民響海上嘅暫時居所。
走廊末端有鐵欄阻止三等艙乘客走到其他等級嘅區域，呢啲就係當時三等艙乘客響船上嘅待遇...
之後就去到鍋爐室，工人不斷加煤，熾熱嘅火光響鍋爐入面發亮，為整艘巨型郵輪提供動力。
離開鍋爐室，我地黎到戶外；響黑夜之中，置身於甲板上，感受海風飄揚，細看繁星閃爍...
不過，優閒旅程嘅背後，其實一直都存在著危險，周邊嘅船隻不時都向 鐵達尼號 傳送冰山警告。然而船長未有加緊注意，反而命令繼續全速前進；另一方面，通訊員更加試過無視傳來嘅警告...
突然，瞭望台嘅當值船員隱約見到 鐵達尼號 前面有一個好龐大嘅物體，但係佢地睇唔清楚；寒風之中，佢地終於確認得到，前面嘅係一座冰山！佢地即時敲響警鐘，告知駕駛室嘅控制員。
佢地大叫：「冰山位於正前方！」控制室指示即時逆向行駛並且全面向左轉，可惜已經太遲...
1912年4月14日下午11時40分，鐵達尼號 船身右側與冰山擦過，船身受損，船艙開始大量入水。
總設計師評估損壞狀況後，斷定呢艘巨輪將會因入水過多而沉沒，最多只能支持一小時三十分鐘；展覽由擦過冰山開始，詳細列出 鐵達尼號 船上發生嘅事，例如救生艇嘅安排、發出求救訊號等等。當時情況十分混亂，有救生艇甚至未達到載客量嘅一半就開出，船員亦未能有效地作出指揮。當所有救生艇都開出之後，巨輪上依然載有接近1500人，響呢一刻，佢地嘅心中就只有絕望...
4月15日上午2時20分，呢艘被譽為不可能沉沒嘅船響大西洋上消失，剩下嘅就只有寂靜、黑暗。繼續參觀，黎到一個黑暗嘅展區，代表沉沒；中間只有幾個燈箱，擺放咗打撈返黎嘅遇難者物品... 再到下一個展區，係關於 鐵達尼號 沉沒嘅後記，展出遇難者名單，以及講述事件後嘅社會迴響。
響遇難者名單前面，有好多人聚精會神咁望實呢張名單，好似搵緊野咁，究竟搵緊咩呢？
其實響入場嘅時候，每位參觀者都會收到一張登船證，上面會印有其中一位乘客嘅名稱；所以，黎到呢到，大家都好落力，想睇下自己嗰張登船證上面所顯示嘅乘客，究竟有冇不幸遇難...
剛才都提及到，因為呢艘巨輪標誌著人類嘅技術成就，所以響事件發生後，普羅大眾都覺好驚訝。一艘曾經被譽為不可能沉沒嘅巨型郵輪，響首航期間就意外沉沒，所以整件事件造成咗極大迴響；鐵達尼號 嘅悲劇發生後，令人類更加注意海上安全，其中，英國政府就對救生艇法例作出修訂。
年月逝後，現今嘅科學家憑著先進的科技，進行深入分析，調查 鐵達尼號 沉沒嘅經過、起因。另外，亦有考古學家潛落深海，窺探海底裡面嘅船身殘骸，進一步了解呢艘巨輪嘅傳奇。
而響一般人嘅心中，鐵達尼號 慢慢成為咗一個經典嘅故事；相信好多人都有睇過相關電影。
睇完整個展覽，令我對呢艘巨型郵輪有更深嘅認識，亦令我感受到當時船上人們嘅絕望... 展覽館好用心咁設計燈光效果，一開始，頭幾個展區都充滿光茫，代表當時輝煌、傳奇嘅一刻；之後慢慢開始轉暗，一步一步咁描述事態發展，再去到最後船隻沉沒，只剩下黑暗的一刻...
每次去博物館或者欣賞展覽，都令我可以見識到更多野，今次亦都係一個好好嘅體驗！
沒有留言:
張貼留言