呢個星期有兩篇同 迪士尼 無關嘅「隨想隨寫」文章，而今晚就等我同大家分享返一個樂園資訊啦！有一個最新消息話俾大家知，就係：繼出現於樂園時間表封面後，園方最新推出咗 Oswald 徽章！今次係 香港迪士尼樂園 首次有 Oswald 商品發售，呢隻可愛嘅兔仔再次響園內現身，值得慶賀！
Oswald 對於 華特迪士尼先生 黎講，有著重大嘅意義，可以話係首位創作自佢筆下嘅 迪士尼朋友！然而，Oswald 亦曾經失去過 迪士尼朋友 呢個身份，幸運地，最後都可以返回 迪士尼 嘅大家庭！今日響園內見到呢個徽章真係好驚喜！因為，唔係每一隻動物都係正宗嘅 迪士尼朋友 嘛！( 嘿！)
其實呢個徽章我之前上網見過，原先係響美國發售嘅，而呢個徽章背後係印著 香港迪士尼樂園；唔係自家製都無所謂啦，樂園主動引入 Oswald 商品已經算係一個新開始，今次真係不得不讚！
Oswald 主題商品首度登陸 香港迪士尼樂園，係唔係意味著遲啲將會有更多佢嘅商品上架？今日我一見到呢個徽章，我諗都冇諗就買咗落黎，如果有更多商品推出的話，我一定都會買！
唔知大家有冇察覺到，我大約響一個月前已經靜靜雞新增咗一個 Oswald幸運兔子 文章分類；呢篇文章已經係第十篇相關文章！相信未來將會有更多 Oswald 嘅文章響 Tho's Dreams 出現！香港迪士尼樂園 尋回失落的兔子，真係令我好感動！期待之後會再有更多機會見到 Oswald！
沒有留言:
張貼留言