再次黎到 澳門銀河渡假城！上次住咗 銀河酒店，而今次就係入住另一間酒店，大倉酒店！
呢次去澳門其實係因為媽媽訂咗一個優惠組合，包一晚套房同埋晚餐！我地嘅房號：1919！
嘩！呢間套房好大啊！有獨立嘅客廳同埋睡房！而房間裡面亦都佈置得非常精緻！
枕頭上面仲放咗一隻紙鶴，係用和式花紙摺嘅！好靚！我拎咗返屋企做紀念品！
呢間套房嘅浴室都唔簡單架！有迷你按摩池、蒸氣浴！就連沖涼都係非一般嘅享受！
一入到房，除咗覺得好大，仲發現放咗一啲小食俾我地享用；不過都食晚飯啦，梗係留肚啦！
放低行李後休息咗一陣，跟住就去到酒店二樓嘅餐廳食晚餐！都幾豐富，但係我唔詳細講啦...
食完飯就去咗平台花園散下步，睇下呢間酒店嘅夜景；呢個花園亦都整得非常華麗！
我都去到酒店嗰陣大約係晚上7:30，食完飯、散完步，時候都已經唔早，於是就返房啦...
而家我每次去旅行，不論長或短，都會帶一隻 Duffy 小熊陪我去玩，今次我就帶咗 大Duffy！
房間咁靚，休息之前梗係要同 大Duffy 影下相啦！睇黎佢都好鍾意呢間咁靚嘅房喎！
第二朝起身，梳洗後就再落餐廳食早餐；估唔到，早餐都會有三文魚食，哈哈！
澳門銀河 有一個大型游泳池，上次去嗰陣係冬天，未有機會游水；而呢排咁熱，最啱就係游水！
呢到有個人造沙灘！雖然唔係望向大海，不過望住酒店大樓，景觀都算唔錯丫！
水面本身都好平靜，過咗一陣，突然開始翻起浪花！唔好睇少佢啊，都幾大浪架！
酒店嘅設施基本上都已經用盡，我地好滿足咁離開；話咁快又到咗食午餐嘅時間！
黎到澳門，點可以唔食葡國菜呢？我地叫咗豬耳沙律、燒魚、葡式牛扒，全部都好好味！
今次冇響澳門留得太耐，食完飯就慢慢行去搭車，去碼頭坐船走；臨走前都不忘食返個木糠布甸！
旅程緊迫的話，固然可以睇到多啲野，但係一個休閒之旅都有佢嘅好處，就係唔洗搞到咁趕；不過我唔會容許 東京迪士尼之旅 都係咁休閒，因為實在有太多野想睇！要把握時間睇哂佢！>_<
沒有留言:
張貼留言