樂園事物仔細尋 - 黑夜之中的城堡道別

呢排好似成日都講日本嘅野，今日就暫且返一返香港，講返一樣 香港迪士尼樂園 嘅野啦！呢篇文章本身的確係預咗尋晚出，但係我整黎整去都嵌入唔到影片...  而家終於都搞得掂啦！冇錯，我預告中所提及到嘅全新表示方式，就係影片！以下將會有兩段片段俾大家睇！

「樂園事物仔細尋」今次黎到一個大家都非常熟悉嘅標誌性景點：睡公主城堡！過往所分享嘅事物，通常都係固定響到，幾時去睇都得，不過呢個就要響指定時間先有得睇！吓？指定時間？莫非係講緊煙花表演？當然唔係，「仔細尋」唔會講啲所有人都知道嘅野啦！睇煙花就要等到去樂園開放時間結束先有得睇，而呢一個情景，就需要更有恆心先睇得到！唔知大家平時睇完煙花會做啲咩呢？即刻走入商店掃貨？即刻衝去搭車唔想同咁多人逼？但假如你留響城堡前面，佢就會俾一個特別驚喜你！好！而家去片啦！

     

放完煙花之後，去到樂園開放時間結束後嘅半個鐘，睡公主城堡 就會呈獻一場小型燈光表演！例如：響暑假期間，樂園會開放至21:00，煙花表演會響21:00開始，呢個就要等到21:30！
城堡配合背景音樂不斷轉色，再加上一點點星光閃過，感覺都幾奇妙！

     

原來，全球各個 迪士尼樂園 響開放時間結束後，城堡都會有同類型表演，象徵著與賓客道別！我就係上個月響 東京迪士尼樂園 首次發現呢個表演嘅！之後返到黎香港先知道有差唔多嘅野！各位樂園Fans經常有機會入去玩，都可以試下搵一晚留耐啲，睇下呢個咁有意義嘅特別表演！

整個小型表演歷時大約2-3分鐘，呢兩條片只係模擬返一小部份出黎，與實際情況會有所出入...  因為我當時冇拍片，所以只係好似製作動畫咁，將一張張相片合併成短片，整得唔好請見諒...咁 Tho's Dreams 響未來日子又會唔會有一條真係拍返黎嘅短片同大家分享呢？總有機會嘅，哈！