《怪獸大學》已經響7月11日正式上映啦！各位怪獸Fans係唔係第一時間衝咗去戲院上堂呢？我尋日朝早亦去咗上堂啦！睇完之後，我對呢個課堂都有少少睇法，而家就同大家分享一下啦！
開始評論之前，簡單講下《怪獸大學》嘅背景故事啦！整個故事嘅初期係以 大眼仔 做中心嘅！電影一開頭所展現嘅係 大眼仔 童年，佢由細細個開始就已經有一個夢想：要成為一位驚嚇專員！( 童年時代嘅 大眼仔，身型細細粒，又有水汪汪嘅眼睛，好得意啊！令我更加鐘意佢！)
驚嚇專員響怪獸世界入面係一個非常祟高嘅職業，要成為驚嚇專員並唔容易，要經過專業訓練。大眼仔 一直都向著呢個夢想進發，佢非常努力讀書，終於成功入讀 怪獸大學 驚嚇學系！
剛剛入學，大眼仔 響一次好偶然嘅情況之下認識咗 毛毛，佢地當時更加非常唔鍾意對方... 同時間，佢地亦都各自要面對自己嘅困難... 慢慢，成為驚嚇專員呢個夢想似乎離佢地愈黎愈遠... 究竟佢地如何堅持自己嘅夢想? 究竟佢地點樣成為一對好拍擋? 留返俾大家入戲院發掘啦！
我不嬲都幾鍾意 Pixar 嘅作品，今次睇完呢齣戲，我覺得都有幾樣野係做得比較出色嘅。首先係場景設定，大學裡面有好完整嘅學院大樓、設施，校園環境設計得好細緻，亦繪畫得好好。另一方面，故事場景亦都充分描述咗《怪獸大學》多姿多彩嘅校園生活，非常貼緊現實。
第二樣我覺得做得好用心嘅，就係有大量新角色登場！一間大學，當然有好多學生啦！當中出場比較多嘅，就有 大眼仔、毛毛 所屬嘅會社社員： 啱Key會 Oozma Kappa 四位成員！下圖由右至左，分別有 阿拱、淋支支、唐叔、向左和向右，每一位都有可愛嘅性格同埋樣貌！
最後一樣我比較喜歡嘅，就係響電影入面都可以見到部份黎自前作《怪獸公司》嘅元素！較為注目嘅就有 變色龍！除咗造型唔同，《怪獸大學》亦有交代到點解 變色龍 會咁憎恨 毛毛。其餘仲有另一啲聯繫前作嘅元素，有啲鋪排得好好，但係亦有少部份我覺得就有啲夾硬黎...
反觀整個劇情，全套戲都幾得意搞鬼，唔會令人覺得悶，不過就略嫌高潮位發展得有少少倉猝... 整體黎講，《怪獸大學》都算係一齣唔錯嘅電影，我亦相信自己好快就會忍唔住要重溫一次！但假如你冇睇過《怪獸公司》，又或者已經唔記得咗內容，強烈建議睇返先去睇《怪獸大學》！
同場加映：每套 Pixar 動畫電影上映時都會附上一齣短篇作品，今次就係關於一把 藍雨傘 嘅戀愛。呢齣作品嘅場景做得特別像真，太真了，我唔太鍾意... 如果唔講，或者會相信佢係顯示緊實景... 再加上今次嘅故事唔太吸引，唔似得上年《La Luna》咁有意境，所以今次我係有啲啲失望嘅...
睇完《怪獸大學》，佢嘅結局再次提醒我要堅持自己嘅夢想！因為，只要堅持，終有機會成功！擁有並且實現一個夢想，係人生最美好嘅事！希望大家可以同我一樣，繼續努力追尋自己嘅夢想！
沒有留言:
張貼留言