一邊用餐, 一邊欣賞 Duffy迪士尼小熊 主題表演!

繼續係 東京迪士尼之旅2013 園內遊記，今日就講下 東京迪士尼海洋 園內大受歡迎嘅舞台劇：My Friend Duffy！呢個表演嘅演出場地位於 Cape Cod，上年有睇我分享嘅網友，又或者上網睇過資料的話，應該知道 Cape Cod 係園區 美國海濱 嘅一部份。呢到被設計成為一個寧靜嘅小漁村，而近年因為 Duffy迪士尼小熊 嘅人氣爆發，園方就將呢個漁村改成 Duffy 相關項目嘅集中地。

現時，Cape Cod 有幾個專為 Duffy Fans們度身訂造嘅體驗，My Friend Duffy 正正就係其中一個！而呢個表演並唔係咁簡單嘅，因為佢係集餐飲及娛樂體驗於一身！買咗食物之後，就可以去到用餐區，演藝人員將會遞上觀賞證，上面會寫咗你嘅享用時間會去到幾多點。

呢到提供嘅食品有好多都同 Duffy 有關，我第一次入去嘅時候就買咗 Duffy 頭型蛋糕，仲會附送一隻 米奇和Duffy的春日巡航 紀念碟。第二次入去，我係食午餐嘅，所以我就買咗個套餐，另外亦可以加錢換一個紀念盤；我咁鍾意 Duffy，當然都有換到啦！

表演開始啦！Tippy Blue 出場作出旁述！佢係 Cape Cod 漁村 嘅信差，可以見到佢掛住咗信袋！

之後就到 Duffy迪士尼小熊 登場！佢著住一身水手服，亦掛住盛載幸福、幸運嘅玻璃瓶，準備同 米奇 一齊出海！但係... 佢好似對今次嘅旅程有啲疑惑喎...

見到 Duffy 咁樣，米奇 出黎為佢解開困惑啦！「我地響海上可以去到好遠，見到好多新事物！」

呢個時候，舞台頂端出現幾幅相片。「旅程上，我地可以探訪不同嘅好朋友，參觀佢地嘅家園呢！」

Duffy 終於都明白，海洋將會令佢見識更廣，擴闊眼界！然後，米妮、唐老鴨、黛絲 黎到碼頭，準備歡送 米奇、Duffy！唐老鴨 更加為佢地預備好行李添喎！

Duffy 開始對今次嘅海上之旅充滿期待！好啦，同 米妮 佢地道別啦！我地之後再見啦！

正式出海，表演亦隨之完結，布幕緩緩落下；睇完呢個表演，我都為自己嘅 Duffy小熊 影返張相先！

其實，整個 My Friend Duffy 總共有兩個劇目，以上嘅劇目係 Duffy的海上冒險，另一個就叫做 Duffy的誕生。兩個劇目每隨15分鐘輪流演出，亦即係話，基本上只要坐響到，係會不斷有表演睇嘅。我兩個劇目都有睇到，但係只係影咗 Duffy的海上冒險；不過無所謂啦，上年都已經影過了！

響到都順便同各位 Duffy Fans們分享一個資訊啦！東京迪士尼海洋 園方經已決定會於2014年1月20日 新增一個新嘅 My Friend Duffy 劇目，名為 ShellieMay的誕生，並取代原有嘅 Duffy的誕生 劇目；Duffy的誕生 將會響2014年1月5日作最後演出。

唔知大家對呢個新劇目有咩感受呢？鍾意 ShellieMay 的話應該會感到高興，但我亦知道有部份鍾意 Duffy 嘅Fans未必會同樣地咁喜歡 ShellieMay...  我自己就對呢個新劇目冇咩興趣...  亦對 Duffy的誕生 被取代感到有啲可惜...  但假如有機會，我都會去睇下嘅！