迷離音樂盒, 奏出神秘旋律...

再次為大家隆重介紹，來自 香港迪士尼樂園 迷離莊園 嘅一件珍藏品：巴里猴紋鑲寶石音樂盒！新園區響五月開幕嘅時候，樂園就推出咗一樣非常特別嘅商品，係一個仿照 亨利爵士 最新珍藏品所設計嘅小型儲物盒；推出咗之後，儲物盒即時大受歡迎，並響短時間內售罊！

咁點解今日突然又再提起呢個儲物盒呢？因為，迷離珍藏店 近日經已返咗貨啦！先前買唔到的話，今次要把握機會啦！而我自己尋日入園嘅時候都已經買咗返屋企！講完呢句野，相信部份讀者會即時有疑問；明明我響開幕嘅時候已經買咗一個，亦都有同大家分享過，點解又要買多個？好，咁就要仔細研究下呢個新嘅儲物盒啦！

拆開呢個新儲物盒嘅包裝，再拎返舊嗰個出黎比較一下先！望落好似冇咩分別咋喎！

轉到側面，都冇咩分別喎！兩個儲物盒同樣地都有好精緻嘅猴紋！究竟點解要買多個！

既然睇唔出外型有咩分別，咁就係時候打開兩個音樂盒，睇睇入面係點嘅樣！

終於有分別啦！原來新儲物盒嘅內裡係多咗一層嘅！哦？咁咪反而會令儲物空間減少咗？比起原先差咗喎，更加唔應該買多一個新架啦！請各位繼續睇落去，謎底即將解開！

原來謎底係響儲物盒嘅底部！新儲物盒有一個轉扭，相信大家都估到係有咩用啦！底部亦都貼咗一張標籤，印有歌曲「Mystic Manor 迷離大宅」嘅版權資訊。

冇錯！呢個新儲物盒多咗一個新功能，就係可以奏出音樂！內裡多咗嘅一層其實係用黎收埋啲零件，只要擰一擰底部嘅轉鈕，再打開蓋，熟悉嘅 迷離大宅 旋律隨即響起！名副其實變成咗一個真正嘅音樂盒啦！完整嘅使用示範可以觀看以下短片。

     



我而家就有兩個小型儲物盒，以及一盒遊戲卡，總共有三個 迷離莊園 巴里猴紋鑲寶石音樂盒 啦！我原本都有掙扎過究竟買唔買呢個新嘅儲物盒，因為外型同原本嗰個真係完全相同，買多個好似好無謂咁...  但係我實在太鍾意 迷離大宅 嗰段主題旋律啦！最後都係忍唔住買咗！而家響屋企成日都會打開黎聽下首歌，咁呢個新嘅珍藏品都可以話有佢嘅存在價值，哈哈！