再次感受風暴下的 香港迪士尼樂園...

黎到秋天都依然有風打，仲要係一個強颱風...  大家做足防風措施未呢？乖乖地留響屋企，唔好周圍去啦！我都好乖咁都留咗響屋企打完呢篇文章，哈哈！每次打風，我都會諗起以前嘅一次特別經歷，就係響三號風球底下，響樂園裡面細看風雲色變嘅景象...  今日，同樣係三號風球，同樣係樂園裡面，究竟遇到啲咩呢？就等我化身成特派記者，為大家直擊 風暴下的 香港迪士尼樂園！

今日我入去最主要係因為要去 香港迪士尼樂園酒店，詳情遲啲會有另一篇文章同大家分享；假如心急想知嘅話，都可以響Tho's Dreams專頁搵到答案。咁響酒店返到黎公共運輸交匯處呢邊，發現所有告示牌都已經被包上透明膠紙，用作抵禦強風！過去酒店之前都未見有架，好高效率！

好啦，入園行下啦！慢慢步向樂園中心廣場！今次呢個強颱風來勢洶洶，就連魔界之神 查立保 都要提早準備；颱風來臨之前，佢將雙翼收起，慎防被強風弄傷。

去到 探險世界、灰熊山谷，兩個 迪士尼黑色世界2013 活動項目：黑色嘉年華「異」演、灰熊山谷黑色嘉年華，都有做好防風措施，利用透明膠紙、圍布包緊裝飾。

神秘嘅樹林裡面，亨利爵士 亦都吩咐管家將戶外小食亭嘅帳篷拆走，並且對支柱作出加固。

颱風就到，但係 安仔 似乎仲未返到屋企，去後花園執返啲玩具入屋喎...  不過玩具們都打醒十二分精神，玩具兵團 收起降傘，大頭寶寶 就用繩索保護自己嘅腳枝。

當遇上惡劣天氣，戶外遊樂設施有可能需要暫停開放；而園方近期就設置咗告示牌，響以上情況嘅時候，放響戶外遊樂設施嘅入口，話俾實客知道樂園仲有邊啲室內遊樂設施會照常開放。

橫風橫雨，歡樂嘅 迪士尼飛天巡遊 都要取消演出啦...  惟有下次再睇過啦...

行咗一圈，返到黎城堡前面嘅樂園中心廣場；天氣逐漸轉差，人都愈黎愈少...

正如 迷離莊園，美國小鎮大街 嘅居民都收起建築物外面嘅帳篷，免被吹走。

時間去到下午04:40，園方透過廣播宣佈：由於風勢逐步加強，天文台會響短時間內改發八號風球，所以樂園將會即時關閉，並且邀請賓客經由 美國小鎮大街 離開樂園。

今次係我第一次遇到提早閉園嘅情況，宣佈過後，所有人都開始慢慢走往樂園正門；沿途企咗好多演藝人員，佢地擺出手勢，向賓客指示離開路徑。

明顯感受到大風咗，所以快快趣趣搭車返屋企！辛苦哂一班繼續留守嘅演藝人員！香港迪士尼樂園，期待我地下次可以響藍天白雲之下再見！