2013年9月12日 - 黑暗降臨, 黑色世界強勢啟動!

太陽緩緩落下，黑暗快將降臨大地...  嚟到呢個時候，黑色力量係時候要展現佢嘅強大能量啦！所有黑色世界項目經已蓄勢待發，準備好要令所有人驚呼狂叫！但係請緊記，今年活動嘅主題係「好玩 唔好叫」，遊園時務必要將惶恐埋藏心裡！

黃昏時份，園方響樂園中心廣場嘅 候立保 塑像前面舉行 黑色世界啟動典禮，並邀請到著名電台DJ 小儀 擔任主持，為今年嘅萬聖節活動揭開序幕！開始咗冇幾耐，小儀 請出一位特別嘉賓：近期人氣爆燈嘅演藝紅人 張智霖！就響佢出場嘅一刻，全場反應熱烈，「唔好叫」行動迅速失敗！

其實我個人就覺得今年嘅活動主題有少少無聊，相比起上年嘅「黑色兩路」失色咗好多。不過呢個主題都帶嚟一個小驚喜：響啟動典禮期間，一班黑色人物聚集響中心廣場，測試大家嘅忍叫程度！平時，呢啲人物有好多都只可以響鬼屋入面見到，今次響呢度遇到佢地，都可以話係一個特別嘅經歷！

「第一日返學就遲到，完全唔可以接受！快啲同我去上堂！」咦，原來已經夠鐘要返學啦！我地返到去 詭墳學院 嘅正門！成日都俾 詭墳校長 訓話，而家企響佢嘅雕像前面，都感到強悍嘅威嚴...  至於學院裡面嘅課堂內容，今年大致上都冇咩改動，上年已經嚟過上堂的話或者會感到有少少失望...

迪士尼黑色世界 其中一個焦點項目，就係 夜光鬼魅巡遊！雖然已經睇咗好多年，但係我依然都係好鍾意睇！冇見一年，南瓜王阿積 又要出場啦！「萬聖節快樂！準備好參加黑色世界派對未？」巡遊開始咗冇幾耐，已經可以發現到一個明顯嘅改動；阿積 身後嘅一群南瓜人唔見咗啊！反而 莎莉 就企咗響花車上面！能夠更加親近自己嘅愛人，唔知佢係唔係好開心呢？

怪誕博士實驗室 花車經過後，就輪到 迪士尼大壞蛋 花車！等等先，係唔係好似有啲野又唔見咗？以前，黑巫婆 會企響城堡上面高呼一句：「今年萬聖節由我話事！」嚟到今年，原來佢決定聯同其他壞蛋朋友，合力打造一個最驚嚇嘅萬聖節；所以，佢而家已經改為企響 迪士尼大壞蛋 花車上面。

之後就係我最愛嘅一架花車：鬼貴族舞會花車！我鍾意呢架花車係因為覺得鬼貴族所跳嘅舞好有趣！突然間，花車停咗落黎，周邊嘅燈光轉暗...  嘩，係螢光演出啊！每位鬼貴族嘅晚裝響黑暗中發光，佢地再配合緊湊嘅音樂起舞，真係非常引人注目！

接著落嚟，火焰舞者、火焰花車、香港迪士尼樂園樂團 先後出場，佢地都好落力演出。最後就輪到一班海盜舞者啦！見到佢地，意味著 夜光鬼魅巡遊 快將去到尾聲；不過，而家先至係呢個巡遊表演嘅高潮！海盜船花車黎到啦！

海盜船花車上面，米奇家族 八位成員向大家揮手；佢地要帶領所有人過一個開心嘅萬聖節呢！主角固然就係著住咗海盜服裝嘅 米奇，佢見到大家咁興奮，都覺得好感動！

睇完巡遊，我地繼續黑色世界嘅旅程啦！話咁快就黎到 探險世界，日間嗰陣發現呢到有三架車仔，而家都已經亮起咗燈光啦！但係...  點解冇表演者嘅？話口未完，一列隊伍行咗出黎，正正就係我所期待嘅 黑色嘉年華「異」演 表演者！

表演者各自去到所屬嘅車仔，之後就有旁白邀請佢地逐一施展絕技！我地先睇睇第一架車仔：黑鳥夫人 為大家送上一段舞蹈演出，然後就有 蝙蝠紳士 展開雙翼前後拍動！

第二架車仔嘅表演者係 森武士 X 瘋骨妖姬，佢地兩個會同時進行「異」演。瘋骨妖姬 利用柔軟嘅身體，做出一系列高難度動作，而 森武士 嘅樹枝樹幹就變成咗 瘋骨妖姬 演出嘅障礙物。

最後一架車仔係我最期待嘅一架，因為呢兩位表演者將會令我感受到強烈嘅溫度對比！冰女王 冷酷嘅眼神，令全場溫度驟降！覺得太凍？唔洗擔心，火焰神 揮動火把，讓你體驗到烈焰嘅熾熱感覺！話時話，睇睇下覺得 火焰神 有啲熟面口...  唔通 長戲班主 係響非洲嘅動物草原招攬佢返黎嘅？

「異」演過後，每架車仔都會有一位表演者留低同大家影相，另一位就會返返入後台。當下一場演出要開始，返咗入後台嘅嗰位表演者就會出黎進行演出，表演完畢後就會輪到佢留低影相。假如你特別鍾意某位表演者的話，就要捉緊時機同佢影相啦！

睇完 黑色馬戲班 嘅延伸演出，當然要去睇埋原有嘅演出！馬戲班主 繼續會向大家展示傳聞嘅 斷頭騎士 頭顱！今年已經係 黑色馬戲班 第三年進行演出，上年嘅演出同前年比較就有些微嘅改動；今年都再次有一個小改動，入到去記得要留意下啦！

下一站：灰熊山谷黑色嘉年華！日間嘅時候已經玩過哂五個攤位遊戲，夜晚時份黎到，欣賞下風景就可以了！能夠響迷人嘅 灰熊山 山下輕輕鬆鬆咁玩小遊戲，氣氛相當唔錯架！所以嘉年華都吸引咗好多人聚集，好熱鬧！

又往前走啦，再一次黎到 反斗奇兵大本營；大頭寶寶，我地又見面啦！晚上時份，燈光照射住 大頭寶寶，你覺得咁樣令佢變得更詭異，抑或令佢得意咗呢？

其實呢一晚嘅路線同日間都差唔多，經過 探險世界、灰熊山谷、反斗奇兵大本營，自然就黎到 幻想世界。派糖大召集 各個派發點已經亮起燈光，嗯，始終都係夜晚靚啲！

Trick or Treat！又攞糖食，今次，演藝人員更加同時送上萬聖節主題貼紙！迪士尼黑色世界2013 第一期貼紙總共有四款，分別係 米奇、米妮、唐老鴨、黛絲，全部都係響 幻想世界派糖大召集 派發點隨機送出，不過就唔肯定日間會唔會可以響其他位置拎得到...

迪士尼朋友 出黎同大家見面啦！呢一晚，四個不同位置嘅 迪士尼朋友 分別係：米奇、米妮、鋼牙奇奇與大鼻帝帝 以及 Duffy迪士尼小熊！上年，迪士尼朋友 正式同大家影相之前，會有一個小型舞蹈表演，而今年就取消咗呢個安排...

日間已經影咗 米奇、米妮，咁唔影佢地啦，去搵 鋼牙奇奇、大鼻帝帝！今年嘅萬聖節商品，佢地以天使魔鬼造型示人，令我好期待佢地嘅新服飾！點知...  新服飾並冇天使魔鬼嘅元素，只有一件小背心...

雖然 鋼牙奇奇、大鼻帝帝 嘅新服飾冇咩驚喜，唔緊要，去搵我最愛嘅 Duffy迪士尼小熊！上年佢好似冇咩出黎同大家見面，今年能夠再次遇上穿著南瓜服飾嘅 Duffy，好開心啊！睇下佢幾可愛！

另一邊廂，響城堡嘅後面，阿積、莎莉 都出咗黎影相啊！畢竟，萬聖節係屬於佢地嘅節日嘛！我地嘅南瓜王響影相期間，都依然使出渾身解數嚇人，真係調皮！

離開 幻想世界，到達 明日世界；被鬼怪侵襲嘅 太空山 閃出綠色嘅燈光，更顯詭秘...  而沈睡嘅舞台亦經已甦醒，為大家帶嚟不同嘅演出；但係呢一晚我就未有機會欣賞到表演，反而就見到另一著名電台DJ 森美 邀請觀眾上台玩遊戲！

再一次環繞整個樂園行咗一圈，我哋嘅終點固然就係 美國小鎮大街。入夜後，又感受下魔界之神 查立保 嘅氣勢先！嘩，原來佢都收集咗唔少黑色力量喎，就連 斷頭騎士 都變成同佢同一陣線，出現於佢嘅翅膀上！

樂園中心廣場嘅其他佈置：墓碑、魔樹都被暗淡嘅燈光照射著，令人感到一陣陰森恐怖嘅感覺...  城堡響後面仍舊閃閃生輝，造成一個強烈嘅對比。

月光響夜空中閃爍，事隔一年，殭屍黨、狼人族 約定響月夜下，於大街再作比拼！兩邊嘅成員都經已聚集起來，準備好鬥個你死我活！兩大魔黨之爭又再爆發！

激戰過後，殭屍、狼人繼續響街上踱步；穿梭於大街嘅時候，一定要小心提防，否則就會被嚇個措手不及，甚至會被招攬成為佢地嘅一份子...

美國小鎮大街 嘅燈色有陣時係紅色，又有陣時會變成藍色，唔知呢個效果係唔係用作代表兩族嘅抗衡呢？由小鎮廣場嘅亭子望過去，藍色由大街一直延伸至 睡公主城堡，都幾靚！

離開前，再去 怪獸大學行政大樓 探下一班怪獸學生，同佢地說聲再見先！向左和向右，我要走啦，下次再嚟搵你地啦！( 其實我擺明就剩係去搵 向左和向右，哈哈！)

最終，呢一日要完結啦，真係一個完滿嘅八週年！由上午09:00黎到樂園，一直玩到去晚上11:00，玩足十三個鐘，好有滿足感啊！好少會玩到咁癲！

迪士尼黑色世界2013，「好玩 唔好叫」，我地約定10月4日再見，又再挑戰黑色驚嚇！