2013年9月12日 - 日間探索, 黑色力量湧現!

每逢 香港迪士尼樂園 生日，通常都已經可以響園內見到萬聖節裝飾；但係今年八週年撞正 迪士尼黑色世界2013 試玩日，唔單止會見到裝飾，我地更加可以盡情享受各個黑色世界項目！不過，叫得做黑色世界，當然係入夜後先至真真正正啟動；響日間嘅時候，都係暫時睇住裝飾先啦！

進入園內，發現正門嘅 米奇花圃 再次換上南瓜造型，話俾大家知道萬聖節好快又會來臨啦！今年，就連旁邊嘅樹下都放滿咗南瓜！

穿過火車橋底，正式進入 美國小鎮大街，我地嚟到 市鎮會堂！掛滿咗一串串暗黑蜘蛛網呢！行過少少，發現小鎮廣場嘅亭子都未能倖免！

繼續前進，不如行入商店睇下啦！一系列 米奇家族萬聖節主題商品 經已上架，不同嘅萬聖節特別佈置亦都於店內出現。

咁多樣商品之中，最能吸引到我嘅就係以下兩款：米奇X阿積造型公仔、Duffy小熊 萬聖節之王造型服飾。兩樣商品都好得意，我即時買咗返屋企！

行到嚟 百貨店 附屬部份：Victorian Collection 維多利亞收藏店，呢到原來係 阿積 嘅地頭，放滿 怪誕城之夜 夜光系列商品！

Jack 同埋 Zero 係我喜愛嘅 迪士尼朋友，又到萬聖節，再次可以見到佢地，好耶！今年推出咗佢地嘅迷你毛公仔，都幾可愛！

維多利亞收藏店 呢到除咗有 Jack、Zero，另外都有 米奇造型南瓜，仲大小兼備呢！

欣賞店內嘅商品之餘，唔好唔記得出返去外面睇下啊！因為商店櫥窗都換上咗萬聖節主題，米奇家族 不同嘅成員更加會與你見面！

我覺得 鋼牙奇奇、大鼻帝帝 嘅天使魔鬼造型好搞鬼啊！好似會有毛公仔推出，好想買啊！

當然都唔少得 阿積！哦，佢好似同 莎莉 談緊情喎，咁我地都係唔好阻住佢地啦，哈哈！

再睇睇大街上嘅佈置，黑色力量為我地帶來古式街燈。雖然同上年 迪士尼黑色世界2012 係一樣款式，不過咁靚，今年又返嚟都冇所謂啦！

開始離開 美國小鎮大街，走到樂園中心廣場，有一個龐大嘅身影正在展開雙翼！佢就係其中一位經典 迪士尼大壞蛋，魔界之神 查立保！見到佢凶惡可怕嘅樣子，會否令你感到心寒？

中心廣場較前嘅花圃豎立有墓碑、石像，都係一啲較為熟悉嘅佈置，上年都有見過。至於較後嘅花圃，一棵棵魔樹向上生長，樹上吊著嘅，係一隻隻熟睡嘅蝙蝠...

下一站，嚟到 詭墳學院 嘅門前。雖然未夠鐘上堂，不過都響到逗留咗一陣；期間，詭墳校長 雕像嘅雙眼亮起紅光，望住咗我地...  情境就如上年一樣...

學院外面放咗一個告示牌，表示 奇妙處處通 會員嘅課堂將會響下午06:30開始；而最底就有 迪士尼黑色世界2013 標誌，等我影相留念先！

之後就去到 探險世界 以及 灰熊山谷 嘅交界，呢個位置出現咗幾架車仔，每一架都印有不同嘅演出介紹。睇黎，黑色馬戲班 今年將會擴大規模喎！唔知表演嗰陣會係點嘅呢？好想快啲睇！

馬戲班有新表演，不過原有表演都唔會受到影響，將會如常上演。呢一日嘅演出同樣會響下午6:30開始；黎到門口但未有得睇表演，咁又影下 迪士尼黑色世界2013 嘅標誌，打發下時間啦！

好似大部份項目都係響晚間先至開始喎...  咁日間係唔係冇野玩？睇睇樂園時間表先！其實並唔係所有活動項目都係夜晚先有得玩嘅，都有少量項目會響較早嘅時間開始！好啦，我地出發啦！

行到嚟附近嘅 灰熊山谷，山下出現咗一個個小攤位。小鎮居民們為咗令呢到變得更加熱鬧，趁住響萬聖節期間，舉行咗一個黑色嘉年華！所有人都歡迎參加架！

黑色嘉年華包含五個小型攤位遊戲，分別係：礦車滾球、釣大魚、黃金幸運計、幸運轉轉輪 以及 黃金保齡，每一個遊戲都有獨有嘅樂趣。

每次進行遊戲之後，就會獲得一張貼紙；貼紙會顯示你所進行過嘅遊戲圖畫，仲有 哥達、堅尼 添啊！

繼續向前走，經過 迷離莊園，就黎到 反斗奇兵大本營！呢個園區好似未被黑色力量侵襲喎，冇野睇，行返出去 幻想世界 啦！咦，等等先，遠處好似有一樣古怪嘅物體喎！究竟係咩黎架？

原來係黎自首集《反斗奇兵》電影，小惡霸阿薜 嘅其中一件玩具：大頭寶寶！就響臨近萬聖節嘅呢個時候，黑色力量帶領佢逃離 阿薜 嘅魔掌，走到黎 安仔 嘅後花園！安仔 究竟會唔會歡迎佢呢？

大頭寶寶 嘅腳下係幾塊字母方塊，不過今次並非拼出「TOILET」，而係顯示「HALLOWEEN」嘅字樣，亦即萬聖節嘅英文！

遇過 大頭寶寶，離開 反斗奇兵大本營，嚟到 幻想世界。黑色世界項目：幻想世界派糖大召集 已經開始咗啦！等我去齊四個派發點拎糖食先！除咗有一個派發點嘅位置改變咗之外，今年 幻想世界派糖大召集 大致同上年相同。

Trick or Treat！有糖食，可以醫下肚餓，哈哈！今年依然有我超鍾意食嘅乳酪果乾！另外亦都有派發樂園自家出品嘅棉花糖，我拎到嘅係 米妮 包裝！

幻想世界 去到晚上嘅時候會有 迪士尼朋友 出黎同大家影相，咁我地夜晚先再返去啦！跟住就去到 明日世界！太空山 嘅星際旅行再次被鬼怪侵襲，太空探險家將會經歷一次驚心動魄嘅旅程！

黑色力量唔單止入侵 太空山，仲響 明日世界 搭建咗一個大型舞台！日落過後，沈睡嘅舞台就會甦醒，舉行一場熱鬧嘅黑色派對！

環繞樂園行咗一個圈，返返黎 美國小鎮大街，但係距離夜晚都仲有一段時間，有咩可以做呢？怪獸大學 嘅藝術學會為大家呈獻萬聖節繪畫教室！快啲嚟到 動畫藝術教室，學習繪畫 吸血鬼米奇、Jack、Zero，又或者 大眼仔 啦！

今次我地畫嘅係 Jack，其實 Jack、Zero 我以前都畫過，我想試下畫 吸血鬼米奇 啊！下次再黎過先！

終於... 終於...  黑夜降臨啦！黑色世界快將正式啟動！太陽落山，只剩黑暗，黑色力量將會進一步爆發！究竟會有咩事發生？敬請留意下一篇文章！