晶荷軒: 趣緻可愛的 迪士尼朋友 造型點心!

見到自己心愛嘅 迪士尼朋友 變身成為精緻嘅點心，你會唔會唔捨得食呢？黎到 香港迪士尼樂園酒店，佢地嘅中菜廳 晶荷軒 提供不同嘅 迪士尼朋友 造型點心，我一直想去試試，但係就未有機會...  先前 奇妙處處通 會員優惠更新，多咗生日月份優惠卷，所以上星期我終於去咗試下嗰到啲點心！

平時響 迪士尼站 出黎，都會好自然咁行去樂園嗰邊，不過我今次就行咗去另一邊，去坐酒店穿梭巴士！再次見到車身使用 迷離莊園 圖畫嘅穿梭巴士，好靚啊！

話咁快就到達 香港迪士尼樂園酒店！開餐前，走入商店行一陣先！嘩，好大隻穿著萬聖節服裝嘅 米奇、米妮！店外嘅櫥窗亦有 阿積、莎莉，仲有月球上嘅 Oogie Boogie 影像！

商店旁邊就係目的地：晶荷軒！門口擺放咗一朵朵水晶荷花，晶瑩剔透，閃出光采。接待處有螢幕，模擬荷花池嘅景象；一群金魚休悠地游水，佢地之間仲不時會有「荷」字出現。

演藝人員帶我地入座，入到去就發現 晶荷軒 嘅裝潢集時尚感、中國傳統特式於一身，係一個好特別嘅配搭。咁多裝飾之中，我最鍾意嘅係荷花吊燈，荷花、荷葉從中心延伸，亮起燈光，好靚！

坐低之後，又睇下枱上嘅物件先！全部都係雅緻嘅中式餐具，仲有摺得好靚嘅餐巾！跟住又睇睇餐牌先！但係，因為  迪士尼朋友 造型點心係需要提早預訂嘅，本身已經訂咗幾款點心，暫時都唔需要額外叫野住。

話咁快，迪士尼朋友 造型點心送到黎啦！枱上放滿一籠籠點心，全部都好得意啊！好，逐款逐款欣賞一下，然後再試食！

迪士尼朋友 造型點心，又點少得我哋嘅老鼠明星：米奇！首款點心就係 米奇煎薄餅，展現咗 米奇 嘅面型，並且配有酸辣醬。

第二款點心係 豬仔叉燒包，一籠三件，代表 三隻小豬。每隻小豬嘅耳仔顏色都唔同架！咁應該點樣分辨佢地三個呢？哈哈！

暑假嘅時候，《怪獸大學》隆重上演，再加上樂園嘅 招收怪獸大學生 活動，爆發咗一道怪獸熱潮！晶荷軒 特別創作咗 大眼雞包仔，都幾似 大眼仔 架！

接著落黎，就係 綠色小人菜肉包！我本身都幾鍾意 三眼仔，而我當日就著住咗一件 三眼仔 T恤，咁當然要同呢籠菜肉包影返張合照！

萬聖節臨近，南瓜王阿積 都黎到 晶荷軒，變成精緻嘅蝦餃！每一粒都係 阿積 嘅骷髏頭！又見到自己鍾意嘅 迪士尼朋友，好開心啊！

壓軸出場嘅，係我最愛嘅 迪士尼朋友：Duffy迪士尼小熊紅豆蓉包！我今次專登帶埋 小Duffy 黎，佢一見到呢籠點心就即刻變得好興奮！

雖然唔捨得，但最後都要搣開佢黎食落肚...  入面全部都係甜甜嘅紅豆蓉，能夠食到呢個為我帶來甜蜜感覺嘅 Duffy 點心，好有滿足感！

食完六款點心，好似都唔係好飽喎... 於是又叫多兩款食品！咦，睇餐牌嗰陣，發現 阿積 除咗變成蝦餃之外，亦都變成特飲喎！呢杯特飲名為 阿積世界，有荔枝汁、牛奶等等；我覺得甜咗少少，不過都幾好飲嘅！

最後輪到甜品啦！呢個甜品拼盤包括水果糯米糍、楊枝甘露、香芋凍糕以及皮蛋酥，相當豐富！當中，楊枝甘露係以玻璃杯裝住，再俾飲管我地啜黎飲，我覺得幾搞笑！

唔知係唔係將心思放咗響賣相嗰方面，我個人認為 迪士尼朋友 造型點心嘅味道只係一般，反而後來叫嘅食品就比較有水準。但其實我去都係為影相嘅啫，所以冇所謂啦，有機會親身試食咁可愛嘅點心經已超開心！