2013九月份焦點迪士尼朋友 - Oswald The Lucky Rabbit

九月來臨，暑假完結，學生們又要返學上課啦！講到呢個月份，相信各位樂園Fans必定會諗起 香港迪士尼樂園 嘅生日！不過，響樂園生日之前，仲有一位 迪士尼朋友 生日喎！佢就係 Oswald幸運兔子！佢嘅生日係響9月4日，咁今個月就由佢黎做焦點 迪士尼朋友 啦！

今年9月12日就係 香港迪士尼樂園 八週年，而除咗樂園生日，嗰日都有一個特別活動：迪士尼黑色世界2013 試玩夜！雖然園方就未有正式公佈，不過依據官網時間表預計，應該唔會有錯嘅！所以我都已經響今個月嘅樂園版本月曆標記咗。

講返 Oswald幸運兔子，其實佢係響1927年9月5日首次登場，今年已經係佢86歲生日，響到預祝佢生日快樂！首個屬於Oswald嘅動畫作品叫做《Trolley Trobles》，假如有興趣的話可以睇睇以下呢段短片。響片中，我地可以見到，原來 Oswald 都有一個特異功能，就係可以隨意將身體部份拆開，並且唔會受傷！

     

今次製作月曆嗰陣，我遇到一個難題，就係搵唔到合適嘅 Oswald 圖片。因為佢嘅所有動畫作品都係響好耐之前面世，畫面比較朦糊，唔可以用黎整月曆。最後用嘅呢幅圖片，係我先前玩《Epic Mickey》遊戲嘅時候影嘅，呢個遊戲有 Oswald 做其中一個主角，於是就有好多佢嘅圖片。圖中嘅 Oswald 都幾有型，唔知大家鍾唔鍾意呢？