雙重奇妙! 充滿繽紛驚喜的生日!

人，每年總有一次生日；但當我愈黎愈大，好似已經冇咗以前嗰種對生日嘅期待...  然而，提醒我就到自己生日嘅，係一封來自 香港迪士尼樂園 嘅電郵...

大約兩個星期前，我收到一封電郵，內容係祝我生日快樂，同埋提我響生日月份內，入園領取生日禮物包同埋享用生日獨家禮遇。於是，一踏入九月份，我就響樂園拎咗呢個生日禮物包。

今年嘅生日禮物包唔再係一個信封，而係一個布袋；上面釘有三個生日襟章，分別係 米奇生日帽、米奇手套、米奇短褲。睇真啲嗰三個襟章，佢地嘅釘扣方式呈現咗一個 隱形米奇！好特別啊！禮物包亦都附有一套優惠卷，我會遲啲先至用。

嚟到2013年9月3日，我嘅生日來臨啦！我又有機會入去樂園，所以就拎咗生日襟章。園內派發嘅生日襟章早前就換咗新款式，新款襟章色彩更為鮮艷，上面亦都有更多 迪士尼朋友。唔知你之前會唔會已經有機會獲得呢個生日襟章呢？

講到全日最開心嘅一件事，就係我響商店見到 Duffy小熊 經已穿上全新 萬聖節南瓜王服飾！不過最終我忍咗手，我打算遲啲等到所有萬聖節主題商品都推出之後先至一次過買。事實上，今日我都見到有唔少萬聖節商品上架，但係都係再睇定啲先。

其實，我今日入去樂園最主要嘅原因並非生日，而係因為今日係我再次成為樂園演藝人員嘅日子！創造奇妙嘅歷程又再開始啦！所以我形容今日係雙重奇妙！第一日返工，我帶咗三個我最鍾意嘅 迪士尼朋友 一直陪伴住我，佢地係：Duffy迪士尼小熊、Oswald幸運兔子、小熊維尼！

今日返工真係一啲都唔簡單，要適應一個全新嘅工作崗位...  不過我會努力架啦！放工後去咗食飯，然後就返屋企同我嘅 Duffy小熊 一齊食生日蛋糕！今年嘅生日美滿地完結！響到亦要多謝好多朋友、網友為我送上生日祝福！又大一歲啦，但係我仍然係唔想長大，所以我會繼續稱呼自己做男孩，哈哈！