響正式開始呢篇文章之前，要首先祝 東京迪士尼海洋 生日快樂！佢響2001年9月4日開幕，今日係佢嘅十二歲生日啊！先前講到，一入園就見到所有人都向著同一個方向衝過去，究竟佢地跑去邊到呢？原來係 東京迪士尼海洋 響上年暑假先至正式開幕嘅最新遊樂設施：Toy Story Mania！
上年我係響六月到訪 東京迪士尼海洋，嗰陣時佢都未開，所以今次響嚟之前，我一早已經決定咗佢係我第一個要玩嘅遊樂設施！只係過咗短短五分鐘，嚟到呢到嘅時候經已人頭湧湧！雖然酒店住客可以提早二十分鐘入場，不過遊樂設施都係會響原先嘅開園時間先至俾我地入去，所以嚟到都要等一陣。
踏正上午09:00，可以入去啦！穿過 胡迪 個口就嚟到室內！香港迪士尼樂園 反斗奇兵大本營 嘅故事就講述我地變成玩具，去到 安仔 嘅後花園見到好多玩具朋友；其實 Toy Story Mania 嘅故事都差唔多，我地都係變成玩具，周圍嘅物品再次變得非常巨大，唔同嘅就係今次唔係去後花園，而係去咗 安仔 嘅屋企入面。
安仔 啲玩具都真係幾亂，蠟筆、骨牌、積木，響香港嘅後花園都可以見到，今次入到去屋內參觀，又再見到呢啲玩具！除此之外，仲有木製飛機、搖搖、遊戲卡、木條等等，全部都係我地熟悉嘅玩具！安仔 真係亂咁擺野，有時放響戶外，有時放響室內，冇啲手尾！
但係講到 安仔 嘅最新一樣玩具，就係一盒嘉年華遊戲套裝！呢盒套裝其實包含好多種小遊戲，有擲飛鏢、拋圈等等；而每個小遊戲都會有我地熟悉嘅《反斗奇兵》迪士尼朋友 出現，有啲更加係響《反斗奇兵3》最新登場嘅玩具朋友！
睇嚟 安仔 都非常鍾意呢盒新玩具，響屋內都見到佢擺咗不同配件響各個位置；一入門口就見到遊戲介紹卡，再行入啲就見到一個大炮，對正玩具朋友木牌準備發射！佢地真係慘，要俾人用黎做鏢靶，哈哈！
旁邊亦有一啲小動物木牌，唔知係唔係後備鏢靶呢？不過我地而家所見到嘅都只係一啲額外配件，安仔 已經將真正嘅嘉年華遊戲響自己間房裡面設置好！我地繼續前進啦！
咦！係西部馬仔 紅心 喎！響佢身後嘅就係嘉年華遊戲套裝嘅包裝盒！要盡情享受陣間嘅遊戲，就記住要響包裝盒拎返一副3D眼鏡！拎完就準備要進入 安仔 嘅睡房！
好大道房門！仲有，好大張床！我地呢班新玩具要入黎玩啦！整間房都掛滿色彩繽紛嘅燈泡，但係要有咁燦爛嘅燈光，當然要插電制啦！又係好巨型！再抬頭望一望，窗外係暗暗嘅星空，都幾靚！
正式開始熱鬧嘅嘉年華會！登上遊玩車，我地將會去到 安仔 嘅床底，投入一個反斗世界！入口旁邊，有一個玩具箱，你認得佢嗎？呢個就係陪伴住 安仔 成長嘅玩具箱！響電影《反斗奇兵3》裡面，雖然 安仔 已經冇再同 胡迪 佢地玩，但係佢一直都將自己唔捨得扔嘅玩具放響呢個箱裡面...
相信親愛嘅讀者們都知道我一貫既做法，就係唔會分享遊玩過程；因為想留返俾你地有機會嘅時候先至親身去到發掘！( 另一個原因係因為我掛住玩影唔到相，嘿嘿！) 不過都簡單講述一下玩法啦！
剛才就提及到整個嘉年華有不同嘅小遊戲，入到去之後係會逐個逐個遊戲咁玩嘅；雖然主題唔同，但玩法都係一樣，就係利用遊玩車上面嘅大炮進行發射！每個目標都會有各自嘅分數，愈難射中就會愈高分；但追求高分之餘都要注意命中率！因為結算嘅時候都會顯示架！我最終嘅命中率只得32%... 但係第一次玩，都算係咁啦！
裡面就玩完啦，至於外面嘅小廣場，我去到傍晚先至返黎再睇；為配合 Toy Story Mania 開幕，主題園區 美國海濱 嘅某個角落被改裝成一個小廣場，名為 Toyville Trolley Park，用作設置遊樂設施嘅入口。大家留唔留意到正門左右兩旁嘅頂端呢？係 泡泡龍、火腿 嘅銅像啊！
廣場上除咗遊樂設施入口、Fastpass 派發機 等實用性設施之外，都仲有一個部份係屬於休閒性質；呢個部份叫做 Carnival Corral，招牌上有一個 紅心 塑像。至於裡面就有少量小型遊樂擺設，包括哈哈鏡、玩偶箱等等，最啱小朋友玩！( 我作為一個小男孩，都有走埋去玩咗一陣！)
廣場上仲有一個不得不提嘅部份，就係小劇場！平時，呢個劇場係用布幕遮著，而幕後就係大名鼎鼎嘅 薯蛋頭先生！佢會不定時出黎同大家打招呼、傾下計！每次出黎，都必定會有好多觀眾圍住佢！不過，聽聞佢呢排好少出黎，要遇到佢真係少啲運氣都唔得；今次咁啱俾我見到，真係好彩！
黎到夜晚，再一次返到黎 Toyville Trolley Park，時間已經係晚上09:45，東京迪士尼海洋 都快將要關門啦... 響黑夜之中，廣場亮起一點一點嘅燈光，充滿懷舊嘅感覺；加上 胡迪 以及一班玩具朋友，懷舊感再配合歡樂嘅氣氛，非常特別。
再返黎呢到，原因只得一個！就係要玩多次 Toy Story Mania！我響早上大約11:00拎咗一張 Fastpass，而家終於有得玩啦！係，你冇睇錯，上午11:00拎，接近晚上10:00先至有得玩，呢啲就係 Toy Story Mania 嘅威力！事實上，響開幕初期，呢個遊樂設施嘅等待時間曾經高達350分鐘！就算過咗一年，好多時候都仍然需要排120分鐘！所以想玩就記住要早啲黎，又或者早啲拎 Fastpass！
好啦，各位見到以下呢張相片可能又會有疑問：點解我會拎到張 Fastpass 返黎？進入遊樂設施之後唔係會收咗佢架咩？其實，呢個又係 東京迪士尼渡假區 嘅一項窩心服務；假如你好想拎張 Fastpass 返屋企收藏，當演藝人員想收嗰陣，只要同佢講聲，佢就會用釘窿機響 Fastpass 上面打一個窿去代表經已使用；之後，就可以拎返屋企儲起佢架啦！
第二次玩，比起上次多咗五萬分，命中率亦都多咗2%！有進步喎，好耶！遊戲過後，車上嘅螢幕會顯示自己嘅得分，但係響落車前，牆上另外都仲有一塊大型電子排行榜，顯示開幕以來、一日內、一小時內嘅最高得分者；我研究排行榜嗰陣，竟然發現自己係一小時內嘅最高得分者！好開心，但其實我玩到手軟... 哈！
玩完，沿著出口通道慢慢行出去；時間已經過咗晚上10:00，Toy Story Mania 為我響 東京迪士尼海洋 嘅第一日劃上美滿嘅句號。不過，因為我呢篇文章係突然跳咗去夜晚，所以第一日仲有好多野未講；我之後將會陸陸續續再同大家分享，敬請繼續留意 Tho's Dreams！
Tds 有咩係一定要玩? :-)
回覆刪除想問有冇tips, 第一站跑去邊先?
早15分鐘入場, 係末必要?
門口check袋, 係末要排2個鐘? 幾時至, 冇咩人 (少過30mins時間,排check袋)?
其實, 我主要想影, 特別衫的characters同香港冇既characters. 同玩香港冇既attractions.
Thanks.
如果係去迪士尼海洋 第一站當然就係要沖去版主介紹既e個toy story game拎fp啦! 因為正如版主所講 e個遊戲既fp 好快就會派晒 around開park 一個鐘內就必定會截拎FP龍, walkin玩 最少排2-3個鐘!
刪除我上次去最少做30-45分鐘去門口等佢開門 都起碼排到開park後15分鐘先入到場。如果真係想盡玩 一定要勁早去阿
我冇用迪士尼朋友影相 所以唔清楚
其實你有冇話諗住幾時去呢? 因為不同月份去, 人流可以有相當大嘅差異.
刪除我暫時就未聽過會查袋都需要2個鐘咁誇張, 我相信大部份時間都會響15分鐘以內.
如果你本身都已經諗住一開園就去, 我會建議提早15-30分鐘去到門口
確保自己係首批入園賓客(撇開酒店賓客), 起碼可以唔洗排隊玩到一個attraction.
第一站我會建議衝去Toy Story Mania拎fastpass, 而唔係排隊玩
因為酒店賓客都有一定人數, 正式開園嘅時候都已經可能需要排30-45分鐘.
之後就可以去鄰近嘅Tower of Terror排隊玩, 呢個都係相當受歡迎嘅遊樂設施.
東京迪士尼海洋係一個完全獨立設計嘅樂園, 基本上所有attraction都係香港冇
出發前或者去到之後可以睇睇地圖, 再選擇有邊啲attraction係非常想玩嘅.
至於characters, 除咗米奇家族之外, 我諗其他大部份都係香港冇嘅...
我遲啲會有一篇文章專講character, 到時可以留意下. (雖然唔知幾時出到, 哈哈)
一個小提示就係: 搵character可以係一個非常需時嘅過程, 所以盡量預多少少時間
希望以上嘅資料幫到你, 亦感謝上面嗰位網友幫忙解答! ;)
唔該唒 :-)
刪除因為有日本朋友, 佢地話我知要排2個鐘check袋, 可能溝通上問題。:-P 之後, 我係香港又問其他日本人, 都係同一個答案。(真係嚇餐死)
上網睇過, 我認為tds的characters特別d, 有幾個fixed的地點都大概知道。有人話parade後又有, 又人話而家冇左行黎行去既characters. (這2個地方,不知在那, 但知要搶 :-P) 問左日本朋友, 佢地話唔似香港咁, 一日可以搵唒characters同做唒所有野, 總之多人, 咩都多人...
睇左好多台灣人既blog, 只有一個話, 反方向玩, 但有人話要一早, 跑入去抽pass睇show, 抽唔到又冇得睇...@@唔係好明?! 咩show要抽? 同一家人去, 一group抽?
睇parade又同我地講坐2個鐘, 仲要位置好後, tds可唔可以係好後, 都可以睇到? 如：係香港, 我可以係城堡前到睇, 雖然只睇到高空個d, 但至少唔駛坐2個鐘。
我會打算年底或明年頭去, 咁我避開左聖誕, 係末只係冇christmas的mini show同少人d? 邊個月分, 係會少人d? :-) 都打算會4點, 過去tdl係門口,影一批characters, 玩1-2樣野, 再睇個著燈parade.
因為我末去過日本, 完全唔識日本係點, 所以會跟團一次先。跟團, 要去埋其他地方, 好似只有tds or tdl選擇.
雖然, 日本朋友話會帶我地 (做導遊)，但始終由朝帶到晚, 都唔好意思。
太多問題啦, sorry.
我會繼續等你篇blog, thanks and add oil :-)
睇完你話響網上收返黎嘅資料, 我嘅結論係: 好多都唔準確!! 我逐樣講.
刪除check袋我唔肯定, 可能有部份超旺嘅日子真係要排兩個鐘都唔定
所以我成日都同人講, 一定要揀淡季去, 就算就唔到淡季都千祈唔好週末去!
其實日本嘅character係好自由嘅, 會行黎行去, 並且唔需要排隊 (部份除外)
只要你夠主動, 拎住部相機行埋去/遞本簽名簿, 正常黎講需時唔會好耐
但係我會話, 同character玩係一件好奇妙嘅事, 盡量預多少少時間
的確, 一日未必夠時間搵哂所有character, 玩哂所有遊樂設施
所以去之前最好諗定, 到時萬一要取捨嘅時候, 應該要skip邊啲
至於抽籤嘅show叫做big band beat, 但係我覺得全個show30分鐘,
只得大約5分鐘係好睇, 其餘時間都比較悶, 可以考慮係唔係要睇
如果真係想睇, 如果你唔追求靚位, 其實都唔一定要抽pass,
響開show前20-30分鐘去到劇院門口排隊, 會有較後較高嘅位置
海上巡遊, 坐兩個鐘係霸最前排, 唔介意有遮擋, 開show先行埋去都得,
個海咁大, 總會有啲位係冇咁多人, 但大前提係嗰日唔係旺季
過咗聖誕之後嘅嗰段日子都冇特別活動, 所以會少咗啲節日表演
但人的確會少好多, 由1月中去到復活節前都係淡季, 遊園會較為舒服
不過有一樣野要注意, 一日門票係唔可以兩邊都去哂嘅, 只可以二選一
所以你話想同一日過埋去TDL就未必得啦...
唔好意思, 覆得比較慢... 如果有問題的話歡迎再問! :)
唔該唒你 :-) 我都係而家至睇。 :-) 我巳經了解左好多。
刪除tds冇陸地巡遊? tdl都要抽pass睇show嗎?
我可能會額外買多張3點定4點既飛, 過tdl, 便好多。
另外, 同characters玩, 係玩完至卑相機個greeter? 因為好似香港咁, 好多時greeter拎左部機, 都唔會影你同characters玩。我打算2人同行, 扮唔識, 雖然2人冇合照, 但至少2人都有得影同有機會玩。
應該再冇問題啦, 唔該唒 :-)
TDS係冇陸上巡遊嘅, 就有海上巡遊.
刪除TDL有其中一個show係點都要抽pass, 冇得stand by, 叫做One Man's Dream
呢個show都幾多character出現, 鍾意character的話值得一睇
Pass可以響"太空山"至"賽車"之間有個位置會攞到, 張pass仲會劃埋位
的確, 我覺得信自己好過信greeter, 所以玩完先俾機greeter係明智抉擇!!